1, 2. Habwaki twina kutwara okusaba nk’eky’omugisa, kandi habwaki twina kumanya Baibuli eky’eyegesa ha kusaba?

ENSI ntaito muno obw’ogirengesaniza n’obuhangwa bwoona. Gali mananu, hali Yahwe, “ayakozire iguru nensi,” amahanga gali nk’akatonyezi kamu k’omunsoha. (Zabuli 115:15; Isaya 40:15) Kyonka Baibuli egamba “Mukama ali haihi na boona abamukunga. Boona abanyakumukunga namananu. Uwe alihikiriza okwegomba kwabo abanyakumutina; Ahu’ra oku’ra kwabu, kandi alibajuna.” (Zabuli 145:18, 19) Hati tekereza hali ekyo eki kikumanyisa! Omuhangi waitu ali haihi naitwe aratuhu’raga ‘obuturamukunga n’amananu.’ Ka mugisa gw’amaani kuhiki’ra Ruhanga nituraba omu kusaba!

² Obu turaba nitugonza Yahwe ahu’re okusaba kwaitu, twina kumusaba omu mulingo ogw’asiima. Kinu turakikora tuta obu turaba tutamanyire Baibuli eky’eyegesa ha kusaba? Kikuru muno kumanya Ebyahandiikirwe eki bigamba ha kusaba, habwokuba okusaba nukwo kutukonyera kui’ra haihi na Yahwe.

3. Nsonga ki enkuru eyakutuletire kusaba Yahwe?

³ Ensonga enkuru habwaki twina kusaba Yahwe eri  nti: natugambira tumusabe. Ekigambo kye nikitugamba: “Mutatuntura nakake, baitu omukusaba kwona nokwesengereza hamu nokusima mumanyisege ebimuse’ra hali Ruhanga. Kandi nobusinge bwa Ruhanga oburukukira kumanya kwona bulirinda emitima yanyu nebitekerezo byanyu omu Kristo Yesu.” (Abafiripi 4:6, 7) Mazima kwo titwakugondeze kugayarra entekaniza enu ennungi muno erugire hali Omulemi Arukuki’rayo kimu ow’obuhangwa!

4. Kusaba Yahwe butoosa kigumya kita enkoragana yaitu nawe?

⁴ Ensonga endi eri nti kusaba Yahwe butoosa kigumya enkoragana yaitu nauwe. Abanywani ab’amananu tibalinda obu baba baina eki bakugonza nubwo nibabaza. Baitu bafayo buli omu ha mugenzi we, buli omu nagambira mutahi we ekimuli ha mutima kandi kinu kigumya obunywani bwabu. Obundi nukwo kityo kiba na ha nkoragana yaitu na Yahwe Ruhanga. Kuraba omu kitabu kinu, oyegere bingi Baibuli eby’eyegesa hali Yahwe, emiringo ye, n’ebigendererwa bye. Ohikire ha kumumanya nk’omuntu wonyini. Okusaba kukuha omugisa kusoborra So ow’omuiguru enyehu’ra yaawe ey’omunda. Buli obwobaza nawe oyeyongera kui’ra haihi nawe.—Yakobo 4:8.

5. Kiki ekikwoleka ngu Yahwe tahuliriza buli kusaba kwoona?

⁵ Yahwe ahuliriza buli okusaba kwoona? Cumitiriza hali eki y’agambiire Abaisareri abajeemu omu biro bya nabbi Isaya: “Nobumurasabaga muno timpu’rega; engaro zanyu zijuire esagama.” (Isaya 1:15) Ebikorwa ebimu bisobora kuletera okusaba kwaitu butahu’rwa Ruhanga. Nahabwekyo okusaba kwaitu kuhu’rwa Ruhanga, haroho ebi twina kuhikiriza.

6. Ruhanga kuhu’ra okusaba kwaitu, kintu ki ekikuru eki twina kuhikiriza kandi nitusobora kukihikiriza tuta?

⁶ Ekikubandiza kimu kiri nti twina kuba n’okwikiriza. (Marako 11:24) Omukwenda Paulo akahandika ati: “Hataloho kuikiriza tikisoboka okumusimwa: baitu anyakuija hali Ruhanga kimuhikirire okuikiriza ati a[r]oho, kandi ati ahera abo abanyakumuse’ra.” (Abaheburaniya 11:6) Kuba n’okwikiriza okugumire nikikiraho ha kumanya bumanya ngu Ruhanga aroho, ahu’ra okusaba kwaitu kandi akugarukamu. Okwikiriza kumanyirwa ha bikorwa byaitu. Twine kwoleka omu bikorwa byaitu by’abuli kiro ngu twine okwikiriza.—Yakobo 2:26.

7. (a) Habwaki twina kw’ebundazaga obu tuba nitubaza na Ruhanga omu kusaba? (b) Nitusobora tuta kwoleka obw’ebundazi n’amazima nitusaba Ruhanga?

⁷ Kandi Yahwe agonza abo abamuhiki’ra omu kusaba kukikora n’obwebundazi hamu n’amazima. Tikyakwetagisize mali kwebundaza obu tuba nitubaza na Yahwe? Abantu obu batunga omugisa kubaza n’omukama rundi omwebembezi w’ihanga, mirundi nyingi bebundaza habw’ekitinisa kye ekingi. Tikyakukizireho muno nituhiki’ra Yahwe! (Zabuli 138:6) Nuwe “W’obusobozi byoona.” (Okubanza 17:1) Obu tuhiki’ra Ruhanga omu kusaba, twina kwebundaza kwoleka ngu nitumanya ali wa haiguru muno kutukira. Obw’ebundazi bw’amulingo ogwo nibwija kutukonyera kumuhiki’ra omu mananu kurugira kimu  ha mutima, tuta kugarukanganamu ebigambo omu kusaba.—Matayo 6:7, 8.

8. Tusobora tuta kuko’ra hali ekyo eki tusabire?

⁸ Ekindi eki twina kuhikiriza okusaba kwaitu kuhu’rwe Ruhanga kiri, twina kuko’ra hali ekyo eki tusabire. Yahwe natunihiramu kulengeho n’agaitu goona kuko’ra hali eki tusabire. Nk’eky’okurorraho, kakusangwa tusaba, “Otuhe ebyokulya byaitu ebyahati,” twina kukora n’amaani omulimo gwoona ogu tukusobora. (Matayo 6:11; 2 Abasesalonika 3:10) Obu tusaba obukonyezi kwetantara okwegomba kw’omubiri, twina kwegendereza emiringo n’ebikaro ebisobora kuturugi’raho kwohebwa. (Abakolosayi 3:5) Oihireho ebintu bikuru binu, haroho ebikaguzo ebirukukwata ha kusaba ebi tukugonza kugarukwamu.

9. Noha ou twina kusaba kandi kuraba omuli oha?

⁹ Noha ou twina kusabaga? Yesu akegesa abakurasi be kusabaga “Isitwe ali omu iguru.” (Matayo 6:9) Ekyo nikimanyisa ngu twina kusaba Yahwe Ruhanga wenka. Kyonka, Yahwe agonza tutemu ekitinisa ekiikaro ky’Omwana we eyazairwe omu wenka, Yesu Kristo. Nk’oku twayegere omu Suura 5, Yesu akatumwa omu nsi kuhayo obwomezi bwe nk’ekihongwa kutucungura kuruga omu kibi n’okufa. (Yohana 3:16; Abarumi 5:12) Nuwe akomerwe nka Nyakatagara Omukuru kandi Omucwi w’emisango. (Yohana 5:22; Abaheburaniya 6:20) Nahabwekyo ebyahandiikirwe bitutere’ra okusaba kwaitu tukurabye muli Yesu. Nawe wonyini akagamba: “Ninyowe muhanda obwomezi namananu. Busaho aija hali Isenyowe kuihaho araba omuli nyowe.” (Yohana 14:6) Okusaba kwaitu kusobora kuhu’rwa, twina kusaba Yahwe wenka nituraba omu Mwana we.

10. Habwaki hataroho mulingo gwoona ogw’embaganiza ogu twina kusabiramu?

 ¹⁰ Haroho omulingo gwoona ogw’embaganiza ogu tusemerire kusabiramu? Nangwa. Yahwe tatuterireho omulingo ogw’embaganiza ogu twina kubamu nitusaba. Baibuli eyegesa ngu nikikirizibwa okuba omu mulingo gwoona. Nitusobora kuba twikalire, twinamizeho omutwe, tutiize amaju rundi twemerire. (1 Ebyomubusinge 17:16; Nehemiya 8:6; Danieri 6:10; Marako 11:25) Ekikukira obukuru nugwo omutima gwaitu ogucwekere hatali omulingo ogu tulimu rundi twemeriremu. Kandi n’obutuba nitukora emirimu yaitu eya buli kiro rundi tukagwerwa ekizibu kya bwangu, nitusobora kusabira omu mutima gwaitu hoona hali tukali. Yahwe ahu’ra okusaba kwa mulingo ogwo gonze abatuli haihi nobubaraba batakyetegereize ngu tubaire nitusaba.—Nehemiya 2:1-6.

11. Bintu ki ebikutukwataho ebi tusemerire kusaba?

¹¹ Bintu ki ebi tukusobora kusaba? Baibuli esoborra ngu “Obutusaba ekintu kyona nkokwagonza, atuhu’ra.” (1 Yohana 5:14) Nahabwekyo, nitusobora kusaba ekintu kyoona nk’okugonza kwa Ruhanga oku kuli. Kuli kugonza kwe tusabe hali ebyo ebikutukwataho? Ego mali! Kusaba Yahwe nikisisanaho n’okubaza n’amunywani wawe mali. Nitusobora kubaza na Ruhanga hali ‘ekyo ekiri ha mitima yaitu’ tutainamu kutiina kwoona. (Zabuli 62:8) Kirungi kumusaba omwoyo ogurukwera, habwokuba omwoyo ogurukwera nigwija kutukonyera kukora ekihikire. (Luka 11:13) Nitusobora n’okusaba kuragi’rwa tusobole kuhika ha kucwamu okw’amagezi hamu n’amaani kugumira ebizibu. (Yakobo 1:5) Obu tusisa tusabege kuganyirwa kuraba omu kihongwa kya Kristo. (Abafeso 1:3, 7) Baitu, titusemerire kusabaga ebyo byonka ebikutukwataho. Tugazihyege okusaba kwaitu nitutamu n’abantu abandi—abali omu maka gaitu n’abaramya bagenzi baitu.—Engeso 12:5; Abakolosai 4:12.

12. Nitusobora tuta kuha ensonga ezirukukwata hali Isiitwe ow’omwiguru ekikaro eky’okubanza omu kusaba kwaitu?

 ¹² Ensonga ezirukukwata hali Yahwe Ruhanga ziina kuhebwa ekikaro eky’okubanza omu kusaba kwaitu. Mananu twina ensonga nyingi ezituletera kumuhaisaniza n’okumusiima habw’oburungi bwe. (1 Ebyomubusinge 29:10-13) Yesu akatekaho eky’okurorraho eky’okusaba ekirukusangwa omu Matayo 6:9-13, nambere yatwegeseze kusaba ngu ibara lya Ruhanga lyezebwe, nukwo kugamba ngu lihebwe ekitinisa. Ngu Obukama bwe bwije, eby’agonza bikorwe omu nsi nkoku bikorwa omuiguru, nibyo bihonderaho. Hanyuma y’okubanza kumarayo engiga ezirukukwata hali Yahwe nubwo Yesu y’abalize ha bikutukwataho. Omu mulingo nugwo gumu, omu kusaba kwaitu obu tuta ebya Ruhanga agonza mu kikaro ky’okubanza, kiba nikyoleka ngu titwina mutima gw’okwefaho itwenka.

13. Ebyahandiikirwe byoleka ki ha buraira bw’esaara ezirukwikirizibwa?

¹³ Esaara zaitu zisemerire kuba ndaira kwingana nkaha? Baibuli teyoleka buraira rundi bugufu bw’esaara y’omuntu rundi ey’abantu baingi. Nesobora kuba saara ngufu gamba nk’ey’okusabira ebyokulya, rundi endairaho nk’ey’okwesabira itwenka nitwanju’ra Yahwe emitima yaitu. (1 Samuiri 1:12, 15) Kyonka, Yesu akajumirra abefora abahikirire, n’esaara endaira kweyoleka hali abantu abandi. (Luka 20:46, 47) Esaara za mulingo ogu tizisemeza Yahwe. Ekikuru kiri nti tumusabe kurugira kimu ha mutima gwaitu. Nahabwekyo oburaira bw’esaara ezikusiimwa nibusobora kusigiki’ra ha by’etago by’omuntu n’omulingo ogw’arumu.

14. Baibuli eba n’emanyisa ki obw’egamba ngu “musabege butoosa,” kandi kinu kikugarramu kita amaani?

¹⁴ Tusemerire kusaba emirundi ingaha? Baibuli n’etutererra ‘Mwikale nimusaba,’ “mwekambe omu kusaba,” “musabege obutosa.” (Matayo 26:41, NW; Abarumi 12:12; 1 Abasesalonika 5:17) Kyonka ebyahandiikirwe binu  tibikumanyisa ngu twine kusaba Yahwe buli dakiika. Kyonka, Baibuli etutere’ra kusaba buli kasumi, kandi butoosa, nitusiima Yahwe habw’oburungi bwe, nitumwesengereza aturagi’re, atuhumuze kandi atugumye. Tikikutugarramu amaani kumanya ngu Yahwe tatuterireho enkango ha bwire n’esaha ezi twina kubalizamu nawe? Obu turaba mali nitusiima obugabe bw’okusaba nitwija kukozesa buli kagisa koona kubaza na Isiitwe ow’omwiguru.

15. Habwaki twine kugamba “Amiina” buli hanyuma y’okwesabira rundi okusabira hamu n’abandi?

¹⁵ Habwaki twina kugamba “Amiina” ha mpero y’esaara? Ekigambo “amiina” kimanyisa “ego” rundi “nukwo kibe.” Eby’okurorraho omu byahandiikirwe byoleka ngu tusemerire kugamba “amiina” hanyuma y’esaara yaitu rundi eya baingi. (1 Ebyomubusinge 16:36; Zabuli 41:13) Kugamba “Amiina” hanyuma y’esaara eyi twesabiire kyoleka ngu ebi tubalize tubihire ha mutima. Obu tugamba “Amiina“ omu ruijwire rundi tutatwiire—hanyuma y’esaara esabirwe omuntu ondi, kyoleka ngu twiki’ranize n‘ebigambirwe omu saara egyo.—1 Abakolinso 14:16.

16. Kugumya ki okutukusobora kuba nakwo ha kusaba?

¹⁶ Yahwe agarukamu okusaba? Ego, mali! Twina obujulizi obukugumya ngu “Anyakuhu’ra okusaba” agarukamu okusaba kw’obukaikuru n’obukaikuru bw’abantu okurugire ha mitima yabu. (Zabuli 65:2) Yahwe agarukamu okusaba kwaitu omu miringo ekwahukana.

17. Habwaki nitusobora kugamba ngu Ruhanga akozesa bamaraika be n’abahereza be abali omu nsi kugarukamu okusaba kwaitu?

¹⁷ Yahwe akozesa abamaraika be n’abahereza be abali omu nsi kugarukamu okusaba. (Abaheburaniya 1:13, 14) Haroho eby’okurorraho bingi eby’abantu abasabire Ruhanga nibagonza obukonyezi basobole kwetegereza Baibuli  eky’eyegesa hanyuma y’akasumi kake, bakahikirwa omu ha bahereza ba Yahwe. Eby’okurorraho nk’ebyo bitugumya ngu bamaraika baturagi’ra omu mulimo gw’okutebeza Obukama. (Okusuku’rwa 14:6) Kusobora kugarukamu esaara ezi tusaba omu kasumi ak’obuzibu mali, Yahwe asobora kukozesa Omukristayo mugenzi waitu kutukonyera.—Enfumo 12:25; Yakobo 2:16.

18. Yahwe akozesa ata omwoyo gwe ogurukwera n’ekigambo kye kugarukamu okusaba kw’abahereza be?

¹⁸ Nakozesa omwoyo gwe ogurukwera n’Ekigambo kye  Baibuli, Yahwe Ruhanga kandi agarukamu okusaba kw’abahereza be. Obu tumusaba kutukonyera kugumira ebizibu, agarukamu okusaba kwaitu n’atuhereza okuragi’ra okurungi n’amaani kuraba omu omwoyo gwe ogurukwera. (2 Abakolinso 4:7) Emirundi erukukira obwingi okusaba kwaitu okw’okuragi’rwa kugarukwamu kuraba omu Baibuli, kuraba mu yo, atukonyera kucwamu omu mulingo ogw’amagezi. Kuraba omu kwesomesa Baibuli n’okukozesa ebitabo by’Ekikristayo nka kinu, n’osobora kutunga Ebyahandiikirwe ebikusobora kukukonyera. Obukonyezi obu tukwetaga nitusobora kubutunga kuraba omu kucumitiriza hali ebyo ebigambirwe abagurusi n’Abakristayo bagenzi baitu tuli omu nsorrokano z’Ekikristayo.—Abagaratiya 6:1.

19. Kiki eki tukutekwa kumanya ha kusaba kwaitu obu kurabaga nikusisana nk’okutagarukirwemu?

¹⁹ Obu kizooka nka Yahwe aikaireho kugarukamu okusaba kwaitu, kinu tikimanyisa ngu alemerwe kukugarukamu. Kyonka tusemerire kwijuka ngu Yahwe agarukamu okusaba okusigikira ha by’agonza kandi omu kasumi ke akasemerire. Amanyire ebi twetaga n’omulingo gw’okubituha kukira itwe oku tubimanyire. Kukira muno atuha omugisa gw’okwikara “nitusaba, nituse’ra, kandi nitweranga.” (Luka 11:5-10) Okwekamba kw’amulingo ogu  nikwoleka Ruhanga okugonza kwaitu oku kuli kandi ngu twina okwikiriza okw’amananu. Kwongerezaho, Yahwe asobora kugarukamu okusaba kwaitu omu mulingo ogu tutarukengeraho omu kasumi ako. Nk’eky’okurorraho, nasobora kugarukamu okusaba kwaitu natuha amaani okugumira okulengesebwa okumu baitu atakwihireho.—Abafiripi 4:13.

20. Habwaki twina kukozesa kurungi omugisa gw’okusaba ogu twina?

²⁰ Tikyakutuletile okusiima itwena kukimanya ngu Omuhangi w’obuhangwa bwoona ngu aba haihi na boona ab’amuhiki’ra nk’okwasiima omu kusaba! (Zabuli 145:18) Leka tukozese kurungi buli kagisa koona akatwina ak’okusaba. Obu turakora tutyo, nitwija kwongera kugumya enkoragana yaitu na Yahwe, ogu Ahu’ra okusaba.