Omwana obw’azaarwa kileetera abazaire okusemererwa kwingi, baitu basobora kutandika kweralikirra omulingo baramurole’ramu. Besaanga ngu obwire oburukukira obwingi n’amaani gaabu babimarra ha kurole’ra omwana waabu. Bajwaha muno habw’obutahumura kurungi omu kiro, kandi basobora n’okwesaanga batakyatunga bwire obw’okuba hamu. Mwine kukora empinduka ezirabasobozesa kurole’ra kurungi omwana waanyu kandi mukasigara nimuhangana obwire. Baibuli erumu amagezi agasobora kubakonyera.

BAIBULI EGAMBA: “Okugonza nukugumisiriza, kuba nembabazi; . . . okugonza tikwenyumiza kwonka, . . . tikubihirwa.” (1 Abakolinso 13:4, 5) Obw’ofooka maama, obwire bwawe oburukukira obwingi obumarra ha mwana waanyu. Omusaija waawe asobora kuhu’ra omunagirize, baitu oteebwa ngu nauwe n’akyakwetaaga. Mpora mpora osobora kumuleetera kuhu’ra ngu akyali w’omugaso kandi okamwoleka omulingo asobora kukukonyeramu kurolera omwana waanyu.

“Inywe abasaija nukwo muikalege muti nabakazi banyu nokwetegereza.” (1 Petero 3:7) Oina kukyetegereza ngu mutahi waawe obwire bwe oburukukira obwingi naija kubumarra ha kurolera omwana waanyu. Habw’obujunanizibwa bunu obweyongireho, asobora kuhu’ra ajwahire obwire bwona kandi ayetuntwire. Obwire bumu asobora kukutabukira hataroho ensonga, baitu weyongere kumugumisiriza habwokuba “aikaraho kubihirwa akira abamani.” (Enfumo 16:32) Okwoleka amagezi nikiija kukukonyera kumanya eky’okukora kweyongera kumusagika.—Enfumo 14:29.

EKY’OKUKORA:

• Taata: N’omu bwire bw’ekiro, mutahi waawe mukonyere ha mwana. Osobora kukehya ha bwire obw’obaire n’omara n’okora ebintu ebimu, okabumara na mukazi waawe hamu n’omwana waanyu

• Maama: Mutahi waawe obw’akusaba kukukonyera ha mwana, mwikirize. Eky’omuhaire kukora n’obwaraaba atakikozere kurungi, otamukunganiza baitu mwoleke omulingo aine kukikoramu

BAIBULI EGAMBA: “Baliba omubiri gumu.” (Okubanza 2:24) Nobu muraaba mutungire omwana, musemerire kukiijuka ngu inywe muli “omubiri gumu.” Nahabwekyo, mweyongere kugonzangana.

Abakazi, musiimege obusagiki bw’abatahi baanyu. Kusiima kigarramu abandi amaani. (Enfumo 12:18) Abasaija, abakazi baanyu mwikalege nimuboleka ngu b’omuhendo kandi ngu nimubagonza muno. Mubasiime habw’omulingo barukurolerramu amaka.—Enfumo 31:10, 28.

“Omuntu wena aleke okuse’ra ebye wenka baitu ase’re ebyandi.” (1 Abakolinso 10:24) Mutahi waawe muko’re ebintu ebirukukirayo oburungi. Mutunge obwire kuba hamu nimunyumya. Kirungi kusiima buli omu eby’akoliire mutahi we. Obukihika ha nsonga z’okweteerana, otefaaho weenka, faaho enyehu’ra ya mutahi waawe. Baibuli egamba: “Mutaimangana, rundi obumuba muragaine.” (1 Abakolinso 7:3-5) Nahabwekyo ensonga enu mugibazeho hataroho kwetiinirra. Obu murayetegerezangana omu nsonga zinu, nikiija kugumya engonzi zaanyu.

EKY’OKUKORA:

• Mwetekereho obwire kuba hamu

• Mutahi waawe osobora kumuko’rayo ekintu ekirungi rundi n’okumuhayo ekisembo

BAIBULI EGAMBA: “Kandi okuruga omu buto okamanya ebyahandiikirwe ebirukwera, ebirukusobora okukuhaisa amagezi hali okujunwa.” (2 Timoseo 3:15) Mutegeke ebimurayegesa omwana waanyu. Omwana aine obusobozi bw’okwega gonze atakazairwe. Nobwaba akyali omu nda, aba n’asobora kuhu’ra amaraka gaanyu. Nahabwekyo mutandikiraho kumusomera. Nobwaraaba atarukwetegereza ebimurukumusomera, kiija kumukonyera kugonza kusoma akuzire.

Mutakitwara ngu akyali muto muno kwega ebirukukwata hali Yahwe. Musabe Yahwe omwana n’ahu’ra ebimurukubaza. (Ekyebiragiro 11:19) N’obu muraaba nimuzaana nauwe, mumwegese ha bintu Ruhanga ebi y’ahangire. (Zabuli 78:3, 4) Nikiija kumukonyera kukura n’agonza Yahwe.

EKY’OKUKORA:

• Musabe Yahwe kubaha amagezi g’okukuzaamu omwana waanyu

• Mwikare nimugarukamu ebi mumwegesize nukwo asobole kubikwata