Omu bicweka bingi eby’ensi, habaireyo okusandaara kw’amaizi okutalibaniize abantu baingi. Wetegereze ripooti zinu:

•   “Ebiro bike enyuma, orubuga orukuru rwa China rutungire enjura ekyakizireyo kuba nyingi omu myaka 140. ,Kuruga Kyamukaaga kuhika Kyakasatu, hagwire enjura erukuhika omu mirimita 744.8 (inci 29.3).”—Amakuru ga AP, Agusto 2, 2023.

•   “Kyakana, kikaba kiro ekyakabiri, ekiyaga eky’amaani ekirumu enjura ekirukumanywa nka Typhoon Khanun obukyalesereho okusandaara kw’amaizi omu masirimuka ga Japan kandi abantu babiri baafa. . . . Nikinihirwa ngu ekiyaga kinu nikiija kuleetaho enjura erukuhika omu mita 0.6 (fuuti 2) omu bicweka by’ensozi omu ihanga lya Taiwan.”—Deutsche Welle, Agusto 3, 2023.

•   “Okusandaara kw’amaizi okubaireho ha wiikendi [omu Nova Scotia] kuleserweho enjura ekyakizireyo kuba y’amaani eyakagwa ha mwaro gwa Atlantic Canada omu myaka 50.”—Amakuru ga BBC, Julaayi 24, 2023.

 Baibuli ebazaaho okusandaara kw’amaizi okurukubaho?

 Baibuli eyoleka ngu tuli omu kasumi ‘ak’ebiro bya hanyuma.’ (2 Timoseo 3:1) Yesu akagamba ngu omu kasumi kanu twakurozere ‘ebirukukanga,’ rundi “ebirukutiinisa.” (Luka 21:11) Empindahinduka ey’obwire niyo ekyakizireyo kuleetaho ebigwererezi eby’amaani.

 Baibuli etugambira ngu ebintu bingi ebirukutiinisa ebirukubaho kasumi kanu, bisemeriire kutuleetera kuba n’okunihira. Habwaki? Yesu akagamba ati: “Obumulikarora ebi nibihikirra, mulimanya Obukama bwa Ruhanga buli haihi.”—Luka 21:31; Matayo 24:3.

 Ebigwererezi ebiturukurora nibibaho kasumi kanu, nibyoleka ngu Obukama bwa Ruhanga buli haihi kumaraho ebizibu ebirukuleetwa ebigwererezi, otwaliremu n’ebirukuleetwa enjura nyingi.—Yobu 36:27, 28; Zabuli 107:29.

 Kumanya ebirukukiraho ha mulingo Obukama bwa Ruhanga bulimaraho ebizibu ebirukuleetwa eby’obuhangwa, rora ekicweka “Nooha Alijuna Ensi?”