Nk’Oku Yahandiikirwe Yohana 9:1-41
9 Yesu obu akaba naagenda, yarora omusaija ayazairwe afiire amaiso
2 Abegeswa be baamukaguza bati: “Rabbi, omusaija onu kuzaarwa afiire amaiso, nooha yasiisire, uwe wenyini, rundi bazaire be?”
3 Yesu yabagarukamu ati: “Omusaija onu atasiise, kandi n’abazaire be batasiise, baitu nukwo kyabaire kiti nukwo emirimo ya Ruhanga esobole kurorwa omuli uwe.
4 Tusemeriire kukora emirimo y’ogu ayantumire bukyali nyamusana, habwokuba obwire nibwija kwira omuntu weena nambere atasobora kukora omulimo gwona.
5 Obu ndaaba nkyali omu nsi, ndi kyererezi ky’ensi.”
6 Hanyuma y’okubaza ebintu ebi, yacwa ebicwanta hansi, yabitabura n’itaka, yabisiiga omu maiso g’omusaija,
7 kandi yamugambira ati: “Genda onaabe omu kiijongo Siroamu” (obu kihindurwa kimanyisa “Agatumirwe”). Yagenda yanaaba kandi yagaruka amaiso ge nigarora.
8 Nubwo bataahi be hamu n’abo abaamuroraga naasabiiriza, baatandika kugamba bati: “Onu tali nuwe omusaija ayaikaraga naasabiiriza?”
9 Abamu bakaba nibagamba bati: “Ka nuwe.” Abandi baagamba bati: “Nangwa, naamusisana kwonka.” Omusaija yaikara naagamba ati: “Ninyowe.”
10 Baamukaguza bati: “Amaiso gaawe gaigukire gata?”
11 Yabagarukamu ati: “Omusaija arukwetwa Yesu, atabwirege itaka yalisiiga omu maiso gange kandi yangambira ati, ‘Genda Siroamu onaabe.’ Na nyowe nagenda nanaaba kandi narora.”
12 Nubwo baamukaguza bati: “Omusaija ogu ali nkaha?” Yabagarukamu ati: “Timmanyire.”
13 Omusaija ow’akaba afiire amaiso baamutwara hali Abafalisaayo.
14 Ekiro Yesu obu yatabwire itaka kandi yaigura amaiso g’omusaija onu ekaba eri Sabbiti.
15 Abafalisaayo na bo baatandika kukaguza omusaija ogu nk’oku amaiso ge gaigukire. Yabagarukamu ati: “Atabwirege itaka, yalisiiga omu maiso gange, nanaaba, kandi natandika kurora.”
16 Bamu h’Abafalisaayo baatandika kugamba bati: “Omusaija ogu tarukuruga hali Ruhanga, habwokuba tarukukwata Sabbiti.” Abandi baagamba bati: “Omuntu omusiisi naasobora ata kukora ebyamahano ebya mulingo gunu?” Nahabweki haabaho okwebaganizaamu omuli bo.
17 Baayongera baakaguza omusaija ow’afiire amaiso bati: “Omusaija ogu noomubazaaho ki, nk’oku nuwe aigwire amaiso gaawe?” Omusaija yabagarukamu ati: “Ali nabbi.”
18 Baitu Abayudaaya batakiikirize ngu akaba afiire amaiso kandi gaiguka kuhikya obu baayesere abazaire b’ogu ow’akaba atandikire kurora.
19 Baabakaguza bati: “Onu nuwe mutabani wanyu ou murukugamba ngu akazaarwa afiire amaiso? Hati asoboire ata kurora?”
20 Bazaire be baagarukamu bati: “Tukimanyire ngu onu mutabani waitu kandi akazaarwa afiire amaiso.
21 Baitu titurukumanya nk’oku asoboire kurora, kandi n’ow’amwigwire amaiso titumumanyire. Mumukaguze, muntu mukuru. Leka ayebalize wenka.”
22 Bazaire be bakabaza ebi habw’okutiina Abayudaaya, habwokuba Abayudaaya bakaba baikirraniize ngu, ow’aramwikiriza ngu nuwe Kristo, omuntu ogu naija kubingwa omu isorrokaniro.
23 Egi niyo ensonga habwaki bazaire be baagambire bati: “Muntu mukuru, mumukaguze.”
24 Omurundi ogwakabiri, baayeta omusaija ow’akaba afiire amaiso baamugambira bati: “Kugiza Ruhanga; habwokuba tumanyire musaija onu musiisi.”
25 Yabagarukamu ati: “Tindukumanya obu araaba ali musiisi, ekintu kyonka eki ndukumanya nikyo ngu, nkaba nfiire amaiso, baitu hati nimpweza.”
26 Nubwo baamukaguza bati: “Kiki eki akukozere? Aigwire ata amaiso gaawe?”
27 Yabagarukamu ati: “Mbagambiirege baitu timwagonza kuhurra. Habwaki nimugonza kwongera kukihurra? Na inywe nimugonza kufooka abegeswa be?”
28 Nubwo baamujuma nibamugambira bati: “Iwe oli mwegeswa w’omusaija ogu, baitu itwe tuli begeswa ba Musa.
29 Tukimanyire ngu Ruhanga akabaza na Musa, baitu omusaija onu titumanyire nambere yarugire.”
30 Baitu omusaija yabagarukamu ati: “Mali nikihuniiriza ngu timumanyire nambere yarugire, kandi kunu aigwire amaiso gange.
31 Tukimanyire ngu Ruhanga tahurra abasiisi, baitu ogu anyakutiina Ruhanga kandi akakora ebi agonza nuwe ahuliiriza.
32 Kuruga kara tikikahulirwaga ngu omuntu weena aigwire amaiso ag’omuntu ayazairwe afiire amaiso.
33 Kakuba omusaija onu atararugire hali Ruhanga, tiyakusoboire kukora ekintu kyona.”
34 Baamugarukamu bati: “Iwe ayazaaliirwe omu kibi, oliyo nooyegesa itwe?” Kandi baamunaga aheeru!
35 Yesu yahurra ngu bamunagire aheeru, kandi obu yamurozere yamukaguza ati: “Noikiririza omu Mwana w’omuntu?”
36 Omusaija yagarukamu ati: “Waitu, nuwe oha nukwo mmwikiririzeemu?”
37 Yesu yamugambira ati: “Omurozere, kandi nuwe aliyo naabaza na iwe.”
38 Omusaija yagamba ati: “Mukama wange, nimmwikiririzaamu.” Kandi yateeza amaju yainama hansi omu maiso ge.
39 Yesu yamugambira ati: “Nkaija omu nsi abantu bacwerwe omusango, nukwo abo abatarukurora basobole kuhweza kandi abo abarukurora basobole kufooka bafu b’amaiso.”
40 Abafalisaayo abaakaba ali na bo obu baahuliire ebintu ebi, baamukaguza bati: “Na itwe tuli bafu b’amaiso?”
41 Yesu yabagarukamu ati: “Kakuba mubaire muli bafu b’amaiso timwakubaire n’ekibi. Baitu hati nimugamba ngu, ‘Niturora.’ Ekibi kyanyu kiikaraho.”
