Ego, Sitaani aroho. Nuwe “omulemi wensi,” ekihangirwe eky’omwoyo ekyafookere kibi muno kandi kyajeemera Ruhanga. (Yohana 14:30; Abefeso 6:11, 12) Baibuli n’esoborra omulingo Sitaani ayetwazaamu kurabira omu mabara ganu:

•   Sitaani, ekirukumanyisa “Omuhakaniza.”—Yobu 1:6, NWT.

•   Diabolo, ekirukumanyisa Omuhangirizi.—Okusuku’rwa 12:9.

•   Ekijoka, kinu kikozesebwa omu Baibuli kumanyisa ‘Omubiihi.’—2 Abakolinso 11:3.

•   Omwohi.—Matayo 4:3.

•   Mubiihi w’ebisuba.—Yohana 8:44.

Teri entekereza mbi enyakuli omu bantu

 Abamu bagamba ngu Sitaani niyo entekereza embi enyakuli omu bantu. Baitu Baibuli ebazaaho orubazo orukaba ruli hagati ya Ruhanga na Sitaani. Ruhanga ahikiriire, taine ntekereza yoona embi, nahabweki akaba atasobora kubaza n’entekereza embi ey’etamurumu. (Ekyebiragiro 32:4; Yobu 2:1-6) Ekindi, Sitaani akoohya Yesu ow’ataine kibi. (Matayo 4:8-10; 1 Yohana 3:5) Nahabweki, Baibuli n’eyoleka ngu mali Sitaani aroho kwo kandi ngu teri nterekereza embi enyakuli omu bantu.

 Kisemeriire kutuhuniiriza kakuba abantu baingi banga kwikiriza ngu Sitaani aroho? Nangwa, habwokuba Baibuli n’egamba ngu Sitaani akozesa ebisuba kuhikiiriza ebigendererwa bye. (2 Abasesalonika 2:9, 10) Kamu ha bukodyo obw’amaani obw’akozesa, nukwo kuleetera abantu kutekereza ngu taroho.—2 Abakolinso 4:4.

Ekitahikire: Lusifa niryo ibara lya Sitaani erindi.

 Ekihikire: Ekigambo ky’Oruheburaniya ekihindurwa “Lusifa” omu Baibuli ezimu, nikimanyisa “arukwangasana.” (Isaya 14:12, NWT) Enkarra ez’etoroire orukurra oru nizooleka ngu ekigambo ekyo kyakozesebwaga kumanyisa abakabama ba Baburoni, Ruhanga abakaba nagenda kuhwerekereza habw’emyehembo yabo. (Isaya 14:4, 13-20) Ekigambo “arukwangasana” kyakozesebwaga kusekereza abakama ba Baburoni hanyuma y’okusingurwa.

Ekitahikire: Ruhanga akozesa Sitaani kufubira abantu.

 Ekihikire: Sitaani munyanzigwa wa Ruhanga; tali muheereza we. Sitaani ahakaniza kandi ahangirra abantu abarukuheereza Ruhanga.—1 Petero 5:8; Okusuku’rwa 12:10.