Ruhanga Aine Amabara Aingaha?

TEKAHO

Ekyokugarukamu kuruga omu Baibuli

Ruhanga aine ibara limu lyonka. Omu Ruheburaniya rihandiikwa riti יהוה kandi omu Rutooro likira kwaturwa nka “Yahwe”. a Kurabira omu nabbi we Isaya, Ruhanga akagamba ati: “Ninyowe YAHWE; niryo ibara lyange.” (Isaya 42:8) Ibara linu nirisangwa omu Baibuli emirundi erukuhika omu 7,000 kandi omu bihandiiko bya Baibuli ebya kara niribazibwaho kukira ebitiinisa bya Ruhanga ebindi rundi amabara agandi ag’abantu. b

Yahwe aine amabara agandi?

N’obukiraaba ngu Baibuli obw’eba n’ebazaaho Ruhanga ekozesa ibara lye limu, ekozesa n’ebitiinisa bye ebindi bingi hamu n’ebikubyo. Ebimu ha bitiinisa binu hamu n’ebikubyo ebyolekerwe hansi nibyoleka kiki Yahwe ekyali rundi muntu wa mulingo ki.

Ekitiinisa	Nambere Kirukusangwa	Amakuru
*Allah*	(Tiharoho)	“Allah” tiriri ibara lya Ruhanga baitu kigambo ky’Oruharabbu ekirukumanyisa “Ruhanga.” Empindura za Baibuli ez’Oruharabbu hamu n’endimi ezindi zikozesa ekigambo “Allah” kumanyisa “Ruhanga.”
Ow’obusobozi Bwona	Okubanza 17:1	Aine amaani ataine bugarukiro. Ekigambo kyOruheburaniya ʼEl Shad·daiʹ, ekirukumanyisa “Ruhanga Wobusobozi bwona,” nikisangwa omu Baibuli emirundi musanju.
Alufa na Omega	Okusuku’rwa 1:8; 21:6; 22:13	“Okubanza kandi okumalirra,” rundi “okubanza kandi empero,” ekirukumanyisa ngu busaho Ruhanga ondi Ow’obusobozi bwona ayabandize Yahwe kandi tihalibaho ondi hanyuma ye. (Isaya 43:10) Alufa nyuguta ey’Oruyonaani erukutandika kandi omega niyo ey’okumalirra.
Omukuru Ayahikize Ebiro Bingi	Danieri 7:9, 13, 22	Taine ntandikwa; aikaireho habw’ebiro n’ebiro omuntu ondi wena atakabaireho kandi n’ebintu byona bitakabaireho.—Zabuli 90:2.
Omuhangi	Isaya 40:28	Nuwe yasobozeseze ebintu byona kubaho.
Isiitwe	Matayo 6:9	Nuwe agaba obwomeezi.
Ruhanga	Okubanza 1:1	Nuwe asemeriire kuramibwa; ow’amaani. Ekigambo ky’Oruheburaniya ʼElo·himʹ kikozesebwa ha bintu bingi, ekirukwoleka obukuru bwa Yahwe, ekitiinisa kye hamu n’oburungi bwe.
Ruhanga wa baruhanga	Ekyebiragiro 10:17	Nuwe Ruhanga arukukirayo, kakuba omulengesaniza na baruhanga abandi abataine mugaso abaramibwa.—Isaya 2:8.
Omwegesa Arukukirayo Obukuru	Isaya 30:20, 21	Atwegesa kandi atuheereza oburagirizi obutugasira.—Isaya 48:17, 18.
Ayakozere Byona	Zabuli 149:2	Nuwe yakozere ebintu byona.—Okusuku’rwa 4:11.
Ruhanga Anyakusemeriirwe	1 Timoseo 1:11, NWT.	Asemeriirwe.—Zabuli 104:31.
Anyakuhurra Okusaba	Zabuli 65:2	Ahuliiriza esaara zoona ezaabo abamusaba baine okwikiriza.
Ndi nkokundi	Okuruga 3:14	Afooka kyona ekyarukugonza kusobora kuhikiriza ekigendererwa kye. Ebigambo binu nibisobora kuhindurwa ngu “Ninyija kufooka kyona kindukugonza kufooka” rundi “Ninyija Kufooka Kyona Ekindacwamu Kufooka.” (The Emphasised Bible, by J. B. Rotherham; New World Translation) Ebigambo binu nibikonyera kusoborra amakuru g’ibara lya Ruhanga, Yahwe, eriri omu rukarra orukuhonderaho.—Okuruga 3:15.
W’ihali	Okuruga 34:14	Taikiriza omuntu kumuramya ha murundi nugwo gumu n’aramya n’abaruhanga abandi. Ebigambo binu haroho obubihindurwa nka “taikiriza abamuhakaniza” rundi “agonza nuwe aramibwe wenka.”—; New World Translation.
Omukama owaira naira	Okusuku’rwa 15:3	Obulemi bwe tibwine ntandikwa rundi obugarukiro.
Mukama	Zabuli 135:5	Ebintu byona bye kandi nuwe mukama wabyo; omu Ruheburaniya ʼA·dhohnʹ na ʼAdho·nimʹ.
Mukama w’amahe	Isaya 1:9; Abarumi 9:29	Aduumira ihe erikooto ery’abamalaika. Ekitiinisa “Mukama wamahe” nikisobora n’okuhindurwa nka “Yahwe w’amahe” na “Mukama w’amahe [ag’omu iguru].”—Abarumi 9:29, New World Translation; NET Bible, footnote.
Anyakuli Haiguru Muno	Zabuli 47:2	Ali omu kiikaro ekirukukirrayo kimu kuba ekya haiguru.
Ogu Arukwera Muno	Enfumo 9:10	Nuwe arukukirayo kwera (nayera muno kandi taine kamogo koona).
Omubumbi	Isaya 64:8	Aine obusobozi ha buli muntu hamu n’amahanga goona, nk’oku omubumbi aine obusobozi ha ibumba.—Abarumi 9:20, 21.
Omucunguzi	Isaya 41:14	Acungura rundi ajuna abantu kuruga omu kibi n’okufa kurabira omu kihongwa kya Yesu Kristo.—Yohana 3:16.
Mwandara	Zabuli 18:2, 46	Ali bwirukiro kandi ndugirro ey’okujunwa.
Omujuni	Isaya 45:21	Ajuna kuruga omu kabi rundi omu kuhwerekerra.
Omuliisa	Zabuli 23:1	Arolerra abaheereza be.
Mukama Ruhanga	Okubanza 15:2	Nuwe arukukirrayo kimu obusobozi; Omu Ruheburaniya ʼAdho·naiʹ.
Anyakuli Haiguru Muno	Danieri 7:18, 27	Nuwe arukukirayo obusobozi.

Amabara g’ebiikaro omu Byahandiikirwe eby’Oruheburaniya

Amabara ag’ebikaro ebimu omu Baibuli garumu ibara lya Ruhanga, baitu ganu tigali mabara agandi aga Ruhanga.

Ibara ly’ekiikaro	Nambere Kirukusangwa	Amakuru
Yahwe-yire	Okubanza 22:13, 14	“Yahwe nuwe araagaba.”
Yahwe-nisi	Okuruga 17:15	“Yahwe [Bberu] yange.” Yahwe ali Ruhanga nambere abantu be bairukira kutunga obulinzi n’obukonyezi.—Okuruga 17:13-16.
Yahwe-saromu	Ekyabacwi 6:23, 24	“Yahwe businge.”
Yahwe-sama	Ezekyeri 48:35,	‘Yahwe nuho ali.’

Ensonga habwaki tusemeriire kumanya n’okukozesa ibara lya Ruhanga

Ruhanga aine kuba nayehurra ngu ibara lye Yahwe, likuru muno, habwokuba akaliteeka omu Baibuli emirundi nyingi muno.—Maraki 1:11.
Yesu Omwana wa Ruhanga, akaikara n’ayoleka omugaso gw’ibara lya Ruhanga. Ekyokurorraho, akasaba Yahwe nagamba ati: “Ibara lyawe dyezebwe.”—Matayo 6:9; Yohana 17:6.
Abo abamanya Ruhanga kandi bakakozesa ibara lye bateera orutambu orw’okubanza rw’okutandika kufooka banywani ba Ruhanga. (Zabuli 9:10; Maraki 3:16) Enkoragana enu ebasobozesa kugasirwa omu murago gwa Ruhanga ogurukugamba ngu: “Baitu antaireho okugonzakwe, nikyo ndimujunira: ndimunyumiza haiguru, baitu amanyire ibara lyange.”—Zabuli 91:14.
Baibuli egamba eti: “Nobubaraba baloho baingi abarukwetwa baruhanga, haiguru, rundi hansi; nkokubali baruhanga baingi nabakama baingi.” (1 Abakolinso 8:5, 6) Baitu eyoleka kurungi Ruhanga ow’amananu n’ekozesa ibara lye, Yahwe.—Zabuli 83:18.

a Abayudaaya abaseruliiriza bagonza kukozesa “Yahweh” obubaba nibaatura ibara lya Ruhanga.

b Omu bugufu ibara lya Ruhanga lihandikwa nka, “Ya,” nirisangwa omu Baibuli emirundi nka 50, otwaliiremu n’omulingo likozesebwa omu kigambo “Haleruya,” ekirukumanyisa “Mukugize Ya.”—Okusuku’rwa 19:1.