Аллаһы һәр милләт кешесен тыңлый (Мәдхия 144:18, 19). Безгә үзебезне борчыган һәрнәрсә турында аңа сөйләргә кирәк. Шулай эшләргә аның Сүзендә — Изге Язмаларда язылган сүзләр дәртләндерә (Филипиялеләргә 4:6, 7). Шулай да, Аллаһыга кайбер догалар, мәсәлән, ятлап һәм кабатлап әйтелгән догалар ошамый. (Маттай 6:7 не укыгыз.)

Йәһвәгә шулай ук аның законнарын белә торып бозган кешеләрнең догалары ошамый (Гыйбрәтле сүзләр 28:9). Мәсәлән, борынгы заманда Аллаһы кан коюда гаепле исраиллеләрнең догаларын тыңламаган. Димәк, Аллаһы догаларыбызны тыңласын өчен, без билгеле таләпләрне үтәргә тиеш. (Ишагыйя 1:15 не укыгыз, ЯД: «Сез кулларыгызны сузганда мин сезгә түгел, ә читкә карыйм. һәм сез күп тапкыр дога кылсагыз да, мин тыңламыйм. Сезнең кулларыгыз канга баткан».)

Аллаһыга дога кылганда, моны иман белән эшләргә кирәк (Ягъкуб 1:5, 6). Без Аллаһының барлыгына һәм безнең турында кайгыртканына шикләнмәскә тиеш. Без иманыбызны Изге Язмаларны өйрәнеп ныгыта алабыз, чөнки чын иман Аллаһы Сүзендәге дәлилләргә нигезләнгән. (Еврейләргә 11:1, 6 ны укыгыз.)

Дога кылганда, эчкерсез һәм басынкы булырга кирәк. Хәтта Гайсә пәйгамбәр дә дога кылганда, үзен басынкы тоткан (Лүк 22:41, 42). Аллаһыга нәрсә эшләргә кирәк икәнен әйтеп торганчы, безгә аның Сүзен укып аның таләпләрен аңларга тырышырга кирәк. Шул чакта без аның ихтыяры буенча дога кыла алачакбыз. (1 Яхъя 5:14 не укыгыз.)