Йошуа 6:10—15, 20 дә язылганча, исраилле гаскәриләр алты көн дәвамында көнгә бер тапкыр Әрихә шәһәрен әйләнеп чыккан. Җиденче көнне алар шәһәрне җиде тапкыр әйләнеп чыккан, һәм Аллаһы Әрихәнең гаять зур, нык диварларын нигезенә кадәр җимергән. Шулай итеп исраиллеләр Әрихәгә кереп, аны яулап алган. Изге Язмалардагы Әрихәнең кыска вакыт эчендә яулап алынганы турындагы хәбәрне раслаучы археологик дәлилләр бармы?

Борынгы вакытларда басып алучылар гадәттә ныгытылган шәһәрләрне камап алган. Гаскәриләрнең шәһәрне камалышта күпме вакыт тотуларына карамастан, җиңүчеләр шәһәрне талап, бар байлыкны, шул исәптән шәһәрдәге бар азык-төлекне үзләре белән алып чыккан. Әмма Әрихәнең җимерекләре арасында археологлар бик күп ризык тапкан. Моның турында бер журналда болай диелгән: «Җимерекләр арасында балчык әйберләрдән тыш бик күп ашлык та табылган булган... Бу Палестина археологиясендә уникаль очрак. Гадәттә бер я ике савыт ашлык табыла, әмма шулкадәр күп ашлык табылуы бу — гадәти булмаган очрак» («Biblical Archaeology Review»).

Изге Язмалардан күренгәнчә, исраиллеләрнең Әрихәдә калган ашлыкны үзләренә алмас өчен, җитди сәбәбе булган. Йәһвә боерыгы буенча, аларга шәһәрдән бернәрсәне дә алып чыгарга ярамаган (Йош. 6:17, 18). Исраиллеләр Әрихәгә яз көне, урак өсте вакыты узгач һәм шәһәрдә ашлык мул булган чакта һөҗүм иткән булган (Йош. 3:15—17; 5:10). Әрихәдә бик күп ашлык калган булуы исраиллеләрнең бу шәһәрне кыска вакыт эчендә, нәкъ Изге Язмаларда язылганча, яулап алганнарын раслый.