Мәсәлән, Изге Язмалардагы мондый пәйгамбәрлекләрне карап чыгыйк:

• «Халык халыкка, патшалык патшалыкка каршы күтәрелер, урыны-урыны белән ачлык һәм җир тетрәүләр булыр» (Маттай 24:7).

• «Соңгы көннәрдә аеруча авыр вакытлар киләчәк. Чөнки кешеләр үзләрен генә сөючән, акча яратучан, мактанчык, тәкәббер, көфер сүз сөйләүче, ата-анасын тыңламаучы, яхшылыкның кадерен белмәүче, тугрылыксыз, кеше яратмаучы, килешмәүчән, яла ягучан, тотнаксыз, рәхимсез, яхшылыкны яратмаучы, хыянәтче, дуамал, масаючан, Аллаһыны түгел, ә ләззәтне яратучы булырлар» (2 Тимутигә 3:1—4).

Бу пәйгамбәрлекләр сурәтләгән дөнья турында кайберәүләр идарәсез дип әйтер. Ниндидер дәрәҗәдә безнең дөнья чыннан да идарәсез: аның белән кешеләр идарә итми. Изге Язмалар буенча, кешеләрнең җирдәге проблемаларны тулысынча чишәр өчен зирәклеге дә, көче дә юк. Бу мондый шигырьләрдә ассызыклана:

• «Кайбер юллар кешегә туры булып күренә, әмма ахырда алар үлемгә китерә» (Гыйбрәтле сүзләр 14:12).

• «Кешенең башка кеше өстеннән хакимлек итүе зыян гына китерә» (Вәгазьче 8:9).

• «Кеше... хәтта үз адымнарына да юнәлеш бирә алмый» (Ирмия 10:23).

Кешеләр ихтыярына калдырылса, дөньяның дөньякүләм афәткә дучар булуы бик ихтимал. Ләкин бу беркайчан да булмаячак! Ни өчен? Изге Язмаларда менә нәрсә диелә:

• Аллаһы «җирне нигезләренә нык урнаштырган, җир беркайчан да үз урыныннан кузгалмас» (Зәбур 104:5).

• «Бер буын китә дә, икенчесе килә, ә җир мәңге тора» (Вәгазьче 1:4).

• «Тәкъвалар җирне мирас итеп алачак һәм анда мәңге яшәячәк» (Зәбур 37:29).

• «Җир йөзендә ашлык мул булыр, тау башларында ул артыгы белән булыр» (Зәбур 72:16).

 Шулай итеп, Изге Язмаларның бу тәгълиматлары ачык җавап бирә. Кешеләр мохитнең пычрануы, ризык һәм су җитмәве я дөньякүләм үләттән үлеп бетмәячәк. Дөнья атом-төш сугышыннан юк ителмәячәк. Ни өчен? Җиребезнең киләчәге Аллаһының күзәтүе астында. Әлбәттә, Аллаһы кешеләргә ихтыяр ирекләрен кулланырга рөхсәт итә. Ләкин алар үз карарларының нәтиҗәләрен урачак (Гәләтиялеләргә 6:7). Дөнья үз һәлакәтенә бик тиз барган бөтенләй идарәсез поезд кебек түгел. Аллаһы кешеләрнең үзләренә күпме зыян китерә ала икәненә чик куйган (Зәбур 83:18; Еврейләргә 4:13).

Аллаһы хәтта күбрәкне эшләячәк. Ул «чиксез тынычлык» китерәчәк (Зәбур 37:11). Бу мәкаләдә аңлатылган яхшы киләчәк миллионлаган Йәһвә Шаһитләре Изге Язмаларны өйрәнеп белгән якты киләчәкнең бер кечкенә өлеше генә.

Йәһвә Шаһитләре — төрле яшьтәге һәм төрле милләттәге ир-атлар һәм хатын-кызлардан торган бөтендөнья җәмгыяте. Алар бер хак Аллаһыга гыйбадәт кыла. Аның исеме, Изге Язмалар ачыклаганча, Йәһвә. Алар киләчәктән курыкмый, чөнки Изге Язмаларда болай диелә: «Күкләрне Барлыкка Китерүче, хак Аллаһы, җирне булдырган, аны нык урнаштырган Яратучы, аны юкка гына түгел, ә кешеләр яшәсен өчен булдырган Йәһвә болай ди: „Мин Йәһвә, һәм бүтән берәү дә юк“» (Ишагыя 45:18).