Mateu 23:1-39
23 Jimajkani, Jesúsi arhiaspti kʼuiripuechani ka imeeri chúxapatiichani:
2 “Karariicha ka fariseuechaksï jandiajku pʼitsïkuarhisti paraksï imani ambe úni enga Moisési ueenga.
3 Ísï jimbo, ú je ambe engaksïni imeecha arhiaka joperu asï imani ambe ú je engaksï imeecha újka, jimbokaksï imeecha uandasïnga ambe ma ka jiniksï no ísï úni.
4 Ambe engaksï juramujka, ísïisti komu ambe ma enga kánikua kʼuetsapeka ka uékasïndiksï eskaksï kʼuiripuecha kuíparhatini* paaka ka jiniksï imeecha méntku no uékasïndi pʼárhini.
5 Úsïndiksï ambe ma nomasi paraksï kʼuiripuecha exeani. Sánderuksï kʼéri uaasïndi imani kaja sapirhatiichani* engaksï paajka paraksï kuájchakukuarhini ka sánderuksï kósti jatsimukuntasïndi imeecheeri xukuparhakuani.
6 Ka tʼirekuecharhu, tsitisïndiksï uaxakani jima engaksï imeecha uaxakajka engaksï sánderu kʼéri ambeeka ka ístuksï tsitisïndi orhepani* uaxakani jima engaksï judiuecha tánguarhijka para Tata Diosïni kómarhini.
7 Ka tsitisïndiksï eskaksï kʼuiripuecha uandajpauaka merkadurhisï ka eskaksï jorhentpiri* arhiauaka.
8 Joperu chá asï jurajku je eskaksïni jorhentpiri* arhiaka, jimboka májkusï chaari Jorhentpiriika ka chájtsï iámindu erachiiska.*
9 Ístu, asï nemani arhi je taati* ixú echerirhu, jimboka májkusï jaka enga chaari Taatiika, ima enga auandarhu jaka.
10 Ístu, asï jurajku je eskaksïni kʼuiripuecha arhiaka eskajtsï chá orhekupaaxaka, jimboka májkusï jaka engaksïni Orhechepajka enga jindeeka Kristu.
11 Sánderu sési, ima enga sánderu kʼéri ambeeka chánksïni jingoni, eska jántspikuauaka máteruechani.
12 Ima enga kʼéri ambe exekuarhijka, kʼuratsekua jingoni pakaraati, joperu ima enga kaxumbikua jingoni jámajka kʼéri ambe exenhaati.
13 ”¡Lástima chá karariicha ka fariseuecha! ¡Chájtsï ísku apariiska! Jimbokajtsï no jurajkuasïnga kʼuiripuechani paraksï auandarhu anapu Reinurhu inchani. Chájtsï no inchasïnga ka nijtujtsï jurajkuajki imeechani engaksï jánguarhintani jaka inchani.
14 *
15 ”¡Lástima chá karariicha ka fariseuecha! ¡Chájtsï ísku apariiska! Jimbokajtsï iápurisï jámasïnga echerirhisï ka marirhu parajtsï jakajkutarani kʼuiripuni ma.* Ka engajtsï jakajkutarajkia, úsïngajtsï eska ima kʼuiripu tsimani xanhari sánderu jukanchaaka Jeenarhu* kʼuanijpanhani ka eska chá.
16 ”¡Lástima chá, orhekupaasïngajtsï kʼuiripuechani joperujtsï no úsïnga exeni! Jimbokajtsï uandasïnga: ‘Ískuesti enga nema templuni jimbo jurariijka, joperu ima enga oru jimbo jurariijka enga templurhu jaka, ima kʼóru jatsisti para ísï úni eska na aiatspeni jaka’.
17 ¡Chájtsï no sáni jánhaskasïnga ka nójtsï exesïnga! ¿Andi ambe sánderu jukaparhakueski? ¿Oru o templu enga pímbinhajkuntajka oruni?
18 Ístu, chájtsï uandasïnga: ‘Ískuesti enga nema altarini jimbo jurariijka, joperu ima enga jurariijka imani kéjtsïtakuani jimbo enga altarirhu jaka, ima kʼóru jatsisti para ísï úni eska na aiatspeni jaka’.
19 ¡Chájtsï no exesïnga! ¿Andi ambe sánderu jukaparhakueski? ¿Kéjtsïtakua o altari enga pímbinhajkuntajka kéjtsïtakuani?
20 Ísï jimbo, ima enga altarini jimbo jurariijka, altarini jimbosï jurarini jati ka iámindu imani ambe jimbo enga jima kéjtsïtanhajka;
21 ima enga templuni jimbo jurariijka, templuni jimbosï jurarini jati ka Tata Diosïni jimbo enga jima irekaka,
22 ka ima enga auandani jimbo jurariijka, Tata Diosïiri kʼéri uaxantskuani* jimbosï jurarini jati ka imani jimbo enga jima uaxakatini jaka.
23 ”¡Lástima chá karariicha ka fariseuecha! ¡Chájtsï ísku apariiska! Jimbokajtsï íntspisïnga diesmu kuatsitesïiri, eneldueri ka kominusïiri, joperujtsï no úsïnga ambe enga sánderu jukaparhakueka enga Leirhu karakata jaka: sési jámani, pʼamojpini ka mintsinharhikueni. Ísïisti, jatsispkajtsï para diesmu íntspini, joperu ístujtsï jatsispka para úni ambe enga sánderu jukaparhakueka.
24 ¡Orhekupaasïngajtsï kʼuiripuechani joperujtsï chá mismu no úsïnga exeni, tsarhantasïngajtsï sïpimuni* joperujtsï kunajkasïnga kameiuni!
25 ”¡Lástima chá karariicha ka fariseuecha! ¡Chájtsï ísku apariiska! Jimbokajtsï kutsuparhakuntasïnga kopani ka platuni, joperujtsï incharinisï tsitisïnga sïpatspeni ka no sési jásï ambe úni.
26 Fariseu engari no újka exeni, orheta incharinisï kutsunharhiku kopani ka platuni ka ísï úparini, nóteru jáxeatia uérakisï.
27 ”¡Lástima chá karariicha ka fariseuecha! ¡Chájtsï ísku apariiska! Jimbokajtsï ísïiska eskaksï tumbeecha engaksï iásï sáni atantskata jaka* ka uérakisïksï kánikua sési xarharani jarhani, joperuksï incharinisï uinirini jarhani uarhiriicheeri úniicha jingoni ka no sési jásï ambe.
28 Chájtsï ísïiska jimbokajtsï uérakisï, kʼuiripuni japarini, ísï xarharasïnga enajkijtsï sési jámajki, joperujtsï ísku apariiska ka incharinisïjtsï uinirixaka no sési jásï ambe.*
29 ”¡Lástima chá karariicha ka fariseuecha! ¡Chájtsï ísku apariiska! Jimbokajtsï tumbeechani úkuasïnga Tata Diosïiri uandakua páriichani* ka sésijtsï jájkuantasïnga tumbeechani ima kʼuiripuecheeri engaksï sési jámeenga.
30 Ka chájtsï uandasïnga: ‘Engachi jucha imani jurhiatikuechani jimbo irekapiringa engaksï juchaari ióntki anapu parientiicha irekapka, jucha no jarhuajpepiringa uándikuani Tata Diosïiri uandakua páriichani’.
31 Ka ini ambe jingoni, chájtsï mismu uandakuarhintaxaka eskajtsï imeecheeri uájpeeska engaksï Tata Diosïiri uandakua páriichani uándikuaka.
32 Ísï jimbo, kʼamara je úni ambe engaksï chaari ióntki anapu parientiicha ueenaka úni.
33 ”Akuitsiicha, akuitsi uájpeecha, ¿nénajtsï uaa sïpakuarhini parajtsï no kastigarinhani ka Jeenarhujtsï* kʼuanijpanhani?
34 Ísï jimbo, axauaka Tata Diosïiri uandakua páriichani, jánhaskatiichani ka jorhentpiriichani. Chájtsï máru uándikuauaka ka máteruechantsï chkarirhu ma tirhipauaka ka máteruechantsï kʼuikirhiauaka jima engajtsï chá tánguarhijka para Tata Diosïni kómarhini ka no sésijtsï káuaka ireteecharhu.
35 Jimbosï chaari jimbo niuati* iámu ima iurhiri engaksï ima kʼuiripuecha engaksï sési jámeenga tsïtaminhakia ixú echerirhu, Abeliiri iurhirini jimbo ueenani enga sési jámeenga, asta Sakaríasiiri iurhirini jimbo, Barakíasi uájpa, imani engajtsï chá uándikuka templurhu ekuaru, jimeesïsï enga altari jaka.
36 Jíksïni sési jimbo arhisïnga eskaksï iásï anapu kʼuiripuecha jatsiaka para maiampintani iámindu ini ambe jimbo.*
37 ”Jerusaléni, Jerusaléni, ima enga uándikuajka Tata Diosïiri uandakua páriichani ka enga tsakapu jimbo ataajka imeechani engaksï jima axanhajka..., ¡namuni xanhari uékaski tánaantani chiiti sapiichani ísï eska tsíkata na tánaantajka pipichuechani para kʼirauani! Joperujtsï chá no uékaska.
38 ¡Exe je! Tata Diosï kéndikuati chaari kʼumanchikuarhu.
39 Jimbokaksïni ji sési jimbo arhisïnga eska iásï uératini, chájtsïni nóteru exeakia asta jiáni enga uandanhaaka ‘¡Újchakuranhasti ima enga Tata Diosï Jeobaeri nombri jimbo jurhani jaka!’”.
Notecha
^ O “apoparhatini”.
^ Ini kaja sapirhatiicha jimbo, jatasptiksï máru karakateecha engaksï Leirhu karakata japka ka tsʼérukuarhuksï jukarhuasïreendi ka ístuksï uikixkandani jukaxurhasïreendi.
^ O “sánderu ambakiti uaxantskuecharhu”.
^ O “rabí”.
^ O “rabí”.
^ O “ermanueska”.
^ O “padre”. Ixú Jesúsi uandaxapti eska no sési jarhaska arhini nemani taati o padre para janhanharhikua jingoni uandajpani relijioniiri orhejtsïkutini ma.
^ Exe je ambe enga arhijka nota enga Mateu 17:21 jimbo jaka.
^ O “paraka kʼuiripu ma judiu úkuarhiaka”.
^ Exe je Glosario, Jeena.
^ O “tronuni”.
^ O “sïpini”.
^ O “engaksï kurhirakua jingoni atantskata jaka”.
^ Griegu jimbo: “méntkujtsï no úsïnga ambe enga lei arhijka”.
^ O “profeteechani”.
^ Exe je Glosario, Jeena.
^ O “Jimbojtsïsï chá maiampintaaka”.
^ O “eska iásï anapu kʼuiripuechani jimbo niuaka iámindu i ambe”.
