Primeru Karakata Juanueri 4:1-21
4 Juchiiti erachiicha* engaksïni ji xáni xénchajka, asï iámindu ambe jakajku je nájkiruka uandanhaaka eska Tata Diosïiri ambeeska,* sánderu sési, jánguarhinta je míteni sini Tata Diosïiriiski inde ambe enga ísï xarharajka enajki Tata Diosïiri ambee,* jimbokaksï uánikua Tata Diosïiri uandakua pári* arhikateecha jarhaskia parhakpinirhu.
2 Ísïjtsïsï uaaka míteni sini Tata Diosïiriiski inde ambe enga uandanhajka: enga uandanhaaka eska tata Jesukristu jurhaska komueska kʼuiripu ma, inde ambe Tata Diosïiriisti.
3 Joperu enga no Jesúsiiri ambeuaka ambe enga uandanhaaka, jiájkani no Tata Diosïiriisti. Inde ambe enga uandanhajka imeeriisti enga ikiakujka Kristuni,* ima engajtsï chá kurhandipkia eska jupiringa ka enga parhakpinirhu jakaia.
4 Juchiiti sapiicha,* chájtsï Tata Diosïiriiska ka andaaskajtsïa imeechani;* jimboka ima enga chánksïni jingoni jaka, sánderu kʼéri ambeesti eska ima enga parhakpini anapuechani jingoni jaka.
5 Imeechaksï parhakpini anapuesti, jimboksïsï parhakpini anapu ambe uandajti ka parhakpini anapuechaksï kurhajchaasïndi.
6 Juchachi Tata Diosïiriiska. Ima enga mítejka Tata Diosïni kurhajchasïndijtsïni; ima enga no Tata Diosïiriika nójtsïni kurhajchasïndi. Ka ísïchisï niárajka míteni sini jurhimbikua ambeeski ambe enga uandanhajka o chkuanderakua ambeeski.
7 Juchiiti erachiicha engaksïni ji xáni xénchajka, ju je seguiriini iáminduecha xénchperani jimboka Tata Diosï ueenaska xénchpeni; ka ima enga xénchpejka, Tata Diosïiri uájpeesti ka mítesti Tata Diosïni.
8 Ima enga no xénchpejka nótki niáraxati míteni Tata Diosïni, jimboka Tata Diosï xénchperakueska.
9 Ka ísïchisï exeka jucha eskajtsïni Tata Diosï xénchasïnga: Tata Diosï axasti parhakpinirhu imeeri máechakua Uájpani parakachi jucha imani jimbo úpiringa tsípikua jatsini.
10 Ísïsï jindeeti para xénchpeni: nóchi jucha ueenaska xénchani Tata Diosïni, sánderu sési, imajtsïnisï xénchati juchantsïni ka axasti imeeri Uájpani para kéjtsïtanhani juchaari pekaduechani jimbo parachi úni sési pájperantani Tata Diosïni jingoni.
11 Juchiiti erachiicha engaksïni ji xáni xénchajka, engajtsïni Tata Diosï ísï xénchaka juchantsïni, jiájkani juchajtuchi jatsiska para iáminduecha xénchperani.
12 Méntku no nema exexati Tata Diosïni. Engachi seguiriini jauaka iáminduecha xénchperani, Tata Diosï seguiriini jauati juchantsïni jingoni jarhani ka imajtsïni niáraati sésimindu xénchani.*
13 Ini ambe jimbochisï míteka eskachi seguiriixaka imani jingoni jarhani ka eska imajtu seguiriixaka juchantsïni jingoni jarhani: jimbokajtsïni ima íntskuska imeeri espirituni.
14 Ka ístu, juchachi exekuarhiska eska Taati axaska imeeri Uájpani para iámu parhakpinini pʼímutantani ka juchachi indeni ambesï uandantajka.
15 Enga nema uandajka eska jakajkusïnga eska Jesúsi Tata Diosïiri Uájpeeska, Tata Diosï seguiriini jarhasïndi imani jingoni jarhani ka imajtu seguiriini jarhasïndi Tata Diosïni jingoni jarhani.
16 Ka juchachi míteskia na engajtsïni xáni xénchajka Tata Diosï ka jakajkusïngachi eskajtsïni xénchasïnga.
Tata Diosï xénchperakuesti ka ima enga seguiriini jarhajka xénchpeni, seguiriini jarhasïndi Tata Diosïni jingoni jarhani ka Tata Diosïjtu seguiriini jarhasïndi imani jingoni jarhani.
17 Ka ísï jimbochisï jucha niárajka sésimindu xénchpeni parakachi uaaka no sáni chéparini uandani ima jurhiatikua enga jusgarpinhaaka, jimboka ini parhakpini jimbo, juchajtuchi májkueniiska eska ima.*
18 Enga kʼuiripu ma xénchpejka no chésïndi; sánderu sési, sésimindu xénchpeni jarhuajpesïndi paraka nema méntku no sáni chéaka,* jimboka engachi chéjka nóchi uánikua ambe úsïnga.* Ísï jimbo, ima enga chéjka nótki niárasïndi sésimindu xénchpeni.
19 Juchachi xénchpesïnga jimbokajtsïni ima ueenaska xénchani.
20 Enga nema uandajka “Ji xénchasïnga Tata Diosïni” ka jini ikiakuni jarhani erachi jémbani, chkuanderani jarhasïndi. Jimboka ima enga no xénchajka erachi jémbani ka jini exeni jarhani, no uaati xénchani Tata Diosïni, imani enga no exejka.
21 Imajtsïni ísï juramuchisti: ima enga xénchajka Tata Diosïni, ístu jatsisti para xénchani erachi jémbani.
Notecha
^ O “ermanuecha”.
^ Griegu jimbo: “asï iámindu espiritu jakajku je”.
^ Griegu jimbo: “sinksï Tata Diosïiriiski inde espirituecha”.
^ O “profeta”.
^ Griegu jimbo: “antikristueriisti”.
^ O “uátsïtiicha”.
^ Ixú profeta arhikateechani arhikuekaaxati.
^ Indenisï arhikuekani jati eskajtsïni kánikua xénchaaka, xáni eska ima na xáni újka xénchpeni.
^ Ixú tata Jesukristuni arhikuekaxati.
^ O “xénchpeni chútasïndi chétapuni”.
^ O “jimbokajtsïni chétapu pʼíngusïnga”.
