Úkuecha 20:1-38
20 Enga na pínandipkia, Pablu pʼitajkuarhiaspti chúxapatiichani ka enga na uinhaperaantapkia ka uandanuantani, Masedonia niraspti.
2 Enga na uinhaperaantapkia jima anapu chúxapatiichani, Gresia niáraspti.
3 Jima pakaraspti tanimu kutsï; joperu enga na barkurhu jatani jámeengia para Siria nirani, mítespti eskaksï judiuecha jirinhakuntaxapka néna uándikuni, jimbosï Masedoniaisï kʼuanhatsentapti.
4 Imani jingoni jámaxapti Sópateri enga Pirru uájpeepka Berea anapu, Aristarku ka Segundu Tesalónika anapu, Gaiu Derbe anapu, Timoteu ka ístu Tíkiku ka Trófimu Asiaisï anapuecha.
5 Imeechaksï orhepaspti ka Troasijtsïni erokaspti.
6 Enga na nitamapkia Kʼuínchikua enga Kurhinda No Xarhipiti* Jukari Únheenga, jucha barkuni ma jataspka Filipusï, ka sinko jurhiatikisï tátsekua, Troasichi exejperantaspka imeechani jingoni. Ka jimachi pakaraspka siete jurhiatikua.
7 Primeru jurhiatikua semaneeri,* engachi jima japkia para tʼireni, Pablu ueenaspti uandontskuarhekuani imeechani engaksï jima japka, jimboka pauandikua níntapiringia. Ka ima seguiriixapti arhijtsïkuani terujkani chúrisï jamberi.
8 Ka jima karhakua engachi tánguarhintatini japka, uánikua kandelechaksï* jarhaspti.
9 Ka tumbi ma enga Eutiku arhinheenga, bentanarhu uaxarhukuspti ka kʼuíeraspti enga Pablu útasï uandani japka. Ka terseru pisurhu uératini uekorhespti jimboka kʼuíeraspka ka engaksï nípka jauatani, ima tʼuini uarhisptia.
10 Joperu Pablu kétsespti, kápchakuspti tumbini ka kamanharhispti. Ka uandaspti: “Asï uandanhia je. Tsípiti jarhasti”.
11 Jimajkani ménderu karhantaspti, arhukuspti kurhindani ka úndaspti tʼireni. Ka ménderu ióni sáni uandontskuarhekuaspti astaka erandepka ka tátsekua níntaspti.
12 Ka tsípitiksï pántaspti tumbini ka kánikua tsípinhaxapti.
13 Jimajkani juchachi barkurhu jataspka ka Asónisïchi niraspka, jimachi pʼimapiringa Pabluni ísï eskajtsïni ima na arhipka, jimboka ima xanharapapiringa jima jamberi.
14 Ísï jimbo, enga ima na niárapkia Asóni, juchantsïni jingoni jataspti barkurhu ka Mitilenechi niraspka.
15 Ka jima uératini, ísï pauandikua, ménderuchi barkurhu jatantaspka ka Kíosi jiniani uanamukutenchi niáraspka. Pauandikua, anhaxurhispkachi sáni Samosi, ka ménderuchi pauandikua Miletu niáraspka.
16 Pablu no uékaspti eskachi Éfesu anhaxurhipiringa, jimboka no uékasïreenga Asiaisï pakareerani, kókuani nikuekaxaptia jimboka uékasïreenga sóntku niárani Jerusaléni aberi sienga úpiringa niárani ima jurhiatikua enga Pentekostesiiri Kʼuínchikua úkuarhijka.
17 Joperu Miletu uératini, uandakua axakuaspti Éfesu anapu orhejtsïkutiichani parakaksï jupiringa.
18 Engaksï exejperantapkia imani jingoni, arhiaspti: “Chájtsï sési mítetixaka na engani jámaka chánksïni japarini desde engani ueenaka Asiaisï jámani.
19 Kaxumbikua jingoni marhuakuska Tatani ísï eska jántspiri ma, ueraska ka kánikua no sési nitamakuarhiska engajtsïni judiuecha méntku úndaka xáni no sési kámani.
20 Ka nájkirukani ísï nitamakuarhika, jíksïni méntkisï aianguska ambe engaksïni jarhuatapiringa ka ístuksïni méntkisï jorhendaska kʼuiripuechani japarini ka kʼumanchikuecharhu.
21 Ji sési aianguaska iámindu ambe judiuechani ka ístu grieguechani eskaksï jatsiska para móantani ka andarhientani Tata Diosïni ka ístu eskaksï jatsiska para mintsikani Jesúsini, juchaari Tatani.
22 Joperu iásï Jerusaléni niuaka jimbokarini espiritu santu ísï arhiska, nájkirukani no míteka ambe úkuarhinchaa jini,
23 joperu ante de ireta ma jimbo niárani, espiritu santurini méntku aianguni jarhasïndi eskani ónhanhaaka ka no sési nitamakuarhini.
24 Joperu no arhiati ambe uéjkini úkuarhinchani* jini engani kʼamaraaka indeni ambe engani jatsika para úni, ka kʼamarani indeni ánchikuarhitani engareni Jesúsi* arhika, inde ánchikuarhita jindeesti sési aianhpini ambakiti aianhperakuani eska Tata Diosï kánikua kóntpintasïnga.
25 ”Joperuni sési mítetixakaia eskajtsïni chá nóteru méni exeakia jíndeni engaksïni Tata Diosïiri Reinueri ambe aianguka.
26 Jimboksïnisï pʼitajkuarhika parakajtsï exekuarhiaka eskani ji no kulpa jatsiska enga nema niáraska uarhini,*
27 jimbokaksïni méntku iámu ambe aianguska ambe enga Tata Diosï uéjka.*
28 Chá kuidarikuarhi je ka chá sáni exeani ja je karichiichani, jimbokaksïni espiritu santu erakuska parajtsï orhejtsïkutiini ka parajtsï exeani jarhani imeechani engaksï Tata Diosïiri kúnguarhikuarhu jaka, imeechani enga Tata Diosï imeeri Uájpeeri iurhirini jimbo piaaka.
29 Ji sési mítetixaka eska jiáni engani nóteruni chánksïni jingoni jauakia, eskaksï juuaka jiuatsïicha engaksï no sési jámajka ka engaksï no sáni uékperakua jingoni káuaka karichiichani,
30 ka máru achamasïicha engaksï chánksïni jingoniuaka, chkuanderakua ambeksï jorhentpiati paraksï támisï jánhastaani chúxapatiichani ka paraksï imeechani jingoni paani.
31 ”Ísï jimbo, jingontku ja je ka miá je eskaksïni tanimu uéxurhini, chúrikua ka jurhiakua, juchaksïni méntku úndaska ueparini arhistachini iámindu chánksïni.
32 Ka iásïksïni Tata Diosïiri jájki jimbo jurajkuxaka ka imeeri uandakueri enga xarhatajka eska Tata Diosï kánikua kóntpintasïnga, indeni uandakua engaksïni uaaka uinhaperantani ka enga uaaka úni eskajtsï chájtu intsïnhaaka ima ambe enga Tata Diosï íntspijka, ísï eska na íntsauaka imeechani enga ima erakuaka paraksï pímbinhasïini.
33 Ji méntkuni no nemani jámaska tsitikuni plata, oru nijtu xukuparhakua ambe.
34 Chájtsï sési mítetixaka eskani ji uinhamu ánchikuarhiska parani jatsikuarheni ambe engani uétarhinchapiringa ji ka ístu imeecha engaksï jíndeni jingoni jámani jaka.
35 Iámindu ambe jimbo, jíksïni xarhatacheska eskajtsï jatsiska para uinhamu ánchikuarhini parakajtsï uaaka jarhuataani imeechani engaksï chkérini jaka, ka ístu eskajtsï no mirikurhiaka ambe enga Jesúsi* uandaka: ‘Ma sánderu sési pʼikuarherasïndi intsïmpini ka eska intsïmbinhani’”.
36 Enga na kʼamarapkia ísï arhiani, tinguixurhispti imeechani jingoni ka ueenaspti kómarhini Tata Diosïni.
37 Jimajkani iáminduechaksï pʼiáraspti uerani ka kamajchakusptiksï Pabluni ka uékperakua jingonksï putinharhikuspti,
38 jimbokaksï iáminduecha kánikua kómu pʼikuarheraxapka ka sánderia jimboka Pablu arhiaspka eskaksï nóteru méni exepiringia. Ka tátsekua, nirasptiksï barkurhu jamberi pámbetani.
Notecha
^ O “No Kʼúratarakua”.
^ I jurhiatikua jindeesti engachi iásï ísï arhijkia domingu. Para judiuecha, i jindeespti primeru jurhiatikua semaneeri.
^ O “lámpareechaksï”.
^ O “Joperuni ji no sáni pʼamojkusïnga juchiiti tsípikuani”.
^ Griegu jimbo: “Tata Jesúsi”.
^ O “eska indeecheeri iurhiri no juchiiti jimbo niuaka”.
^ O “ambe enga Tata Diosï uéjka úni”, “ambe engaksïni Tata Diosï uéjka arhistachini”.
^ Griegu jimbo: “Tata Jesúsi”.
