Ni psaliwe a Paddington, ndhawu leyi a ku hanya vanhu va vanyigi a Inglaterra. A ni tshama ni mamana wa mina ni vamakwavu va mina vanharhu va vakulu ka mina. Papayi wa hina a a nga swi rhandzi ku tshama kaya hileswi a a li xidakwa.

Nkama a na ha li mutsongo, mamana wa mina a ni djondzisile ku khongela niwusiku. A ni ni Bibele la litsongo leli a li ni buku la Tipisalema, naswona a ni li tirhisa swaku ni hamba tinsimu swaku ni ti yimbelela. Ni khumbuka marito ni nga tshama ni ma djondza ka buku lin’wana lawa a ma nga suki ka mimpimiso ya mina, wona a ma ku: “Siku lin’wana hi ta yetlela hi nga ha pfuki.” Marito lawa ma ni yentxi ni nga li kumi wurhongo hi ku pimisa hileswi swi nga ta yentxeka ka nkama lowu taka. Kambe ni game ni tibyela swaku ‘wutomi li fanele li va ni xikongomelo’ ni tlhele ni tivutisa ni ku ‘ni hanyela yini’ a ni chava ku fa.

Ni sungule ku tipeta ka swa wunyanga. Ni zame ku vulavula ni vafi, ni ya masirheni ni vanghanu va mina hi tlhela hi sixtira mafilmi ya ku chavisa. Hambileswi a ma chavisa a ma hi tsakisa.

Nkama a ni ni 10 wa malembe a ni nga ha lavi ku yingisa munhu. Ni sungule ku dzaha masigari ni tlhela ni nga ha swi koti ku ma tshika, hi ku famba ka nkama ni sungule ku dzaha mbangi. Nkama a ni ni 11 wa malembe ni sungule ku nwa byala, hambileswi a ni nga li twi li nandzika a ni rhandza leswi a li ni yentxa swona. Naswona a ni rhandza ku yingisela tinsimu ni ku txina, a ni ya mafexteni ni madixkoteka. A ni baleka ni famba ni vuya nimpundzu na ni nga voniwi hi munhu. Leswi a lixa na ni karhalile minkama ya yinyingi a ni nga yi ni xikola, loko ni tshuka ni ya a ni nwa byala hi nkama wa intervalo.

Ka lembe la mina la wugamu a xikola ni xumbarile. Mamana a kwatile hintamu hikusa a a nga swi tivi swaku a ni ni mahanyelo ya ku biha, hi holovile ni za ni suka ni ya tshama kule ni kaya. Hi ku famba ka nkama ni game ni ya tshama ni namorado wa mina lweyi a a li murhasta, yena a a li ka ntlawa wa vanhu lava a va yiva va tlhela va xavisa madroga naswona a a tiviwa na a li xigevenga, loko ni ni 16 wa malembe ni kumi nyimba ni tlhela ni psala n’wana wa wanuna.

Khambi la ku sungula ni nga vulavula ni Timboni ta Yehovha a ni tshama ka ndhawu leyi a ku tshama vamamana lava kalaka va nga na vavanuna, naswona ndhawu ya kona a yi li ya mfumu. A ku ni Timboni timbirhi ta vavasati leti a ti pfuxela vamamana van’wana lava a va tshama ka ndhawu yoleyo. Siku lin’wana ni yile ni ya yingisela leswi a ti vulavula swona na ni lava ku ti komba swaku a ti djondzisi ntiyiso. Kambe ti hlamulile swivutiso swa mina hinkwaswu na ti tirhisa Bibele naswona a ti vulavula na mina kahle, leswi ti nga vulavulisa xiswona na mina swi ni yentxi ni navela ku djondza Bibele.

Hi nkamanyana ni djondze minchumu ya yinyingi ka Bibele leyi yi nga txintxa wutomi la mina. Ku sukela loko ni li muntsongo a ni chava ku fa, kambe swoswi a ni djondzisiwile swaku la va nga fa va ta pfuxiwa! (Yohani 5:28,29) Ni tlhele ni djondza swaku Xikwembu xi ni mhaka na mina. (1 Pedru 5:7) A marito ma nga ni khumba hintamu hi lawa ma kumekaka ka Yeremiya 29:11, lawa ma nge: “‘Hikusa niswi tiva kahle leswi nimi navelelaka swona,’ kuvula Yehovha, ‘nimi navelela kurhula, kunga li makhombo, kumi nyika wumundzuku ni ntshembo.’” Ni sungule ku kholwa swaku a swi ta koteka ku hanya wutomi la ku kala li nga heli a paradesi lana misaveni. — Tipisalema 37:29.

Timboni ta Yehovha ti ni kombile swaku a ti ni rhandza hikakunene. Siku la ku sungula ni nga ya mintlhanganwini swi ni tsakisile hintamu ku va kona ni leswi va nga ni yamukelisa xiswona! (Yohani 13:34, 35) A swi hambanile ni leswi va nga ni yamukelisa xiswona ka kereke ni nga tshama ni ya. Timboni ti ni yamukelile kahle hambileswi a ni ni swikarhatu, a va kombisa swaku va ni mhaka na mina va tlhela va ni pfuna ku hlula swikarhatu swa mina. Ni titwe na ni lumba djangu wa wukulu lowu nga ni lirhandzu.

Loko ni ya ni djondza Bibele, ni tsumbule swaku a ni fanele ni txintxa mahanyelo ya mina swaku ni tsakisa Xikwembu. Kambe a swi ni karhatela hintamu ku tshika ku dzaha naswona ni tsumbule swaku tinsimu leti a ni ti yingisela a ti ni yentxa ni ya ni navela ku dzaha, hi mhaka leyo ni swi vonile swi yampsa ni tshika ku ti yingisela. Leswi a ni lava ku tshika ku nwa byala ni tshike ku ya mafexteni ni madixkoteka lawa a ma ta ni yentxa ni navela ku nwa byala, ku tlula leswo ni yentxe munghanu wa vanhu lava a va ta ni pfuna ku txintxa mahanyelo ya mina. — Swivuriso 13:20.

Hi nkama wolowo Tony na yena a a djondza Bibele ni Timboni ta Yehovha. Leswi a va hlamula swivutiso leswi a a swi yentxa, swi mu yentxe a kholwa swaku leswi a a swi djondza a ku li ntiyiso. A txintxe minchumu ya yinyingi ka wutomi la yena, a tshika vanghanu va ku biha lava a a li na vona, a nga ha lavi ku va xigevenga, ni ku tshika ku dzaha mbangi. Mina na Tony hi voni swaku a hi fanele hi txintxa wutomi la hina la ku biha swaku hi tsakisa Yehovha hi tlhela hi kulisa n’wana wa hina ka ndjangu wa wunene, hi mhaka leyo hi chadile hi 1982.

Ni khumbuka swaku a ni yentxa mapexkiza ka Murindzi ni ka khindlimuka! * na ni lava ku tiva swaku vanhu va swi kotise ku yini ku txintxa wutomi la vona ku fana ni leswi mina a ni swi lava. Swikombisu swa vona swi ni pfunile hintamu! Swi ni yentxe ni tama ni tikarhata swaku ni txintxa, a ni khongela ni kombela Yehovha swaku a nga godoli ku ni pfuna, se 1982 mina na Tony hi tsakamisiwile.

Kuva munghanu wa Yehovha swi huluxe wutomi la mina. Mina na Tony hi swi vonile swaku Yehovha a hi pfunile nkama na hi ni swikarhatu. Hambileswi a hi ni swikarhatu hi djondze ku tshemba Yehovha, naswona hi swi vonile swaku Yehovha wa hi pfuna a tlhela a hlayisa ndjangu wa hina. — Tipisalema 55:22.

Swi hi tsakisile kuva hi pfune vana va hina swaku na vona va va vanghanu va Yehovha, ni swoswi ha tsaka hi ku vona vatukulu va hina va djondza hi Yehovha.

Swoswi a na ha pfumali wurhongo hi ku pimisa hileswi swi nga ta yentxeka ka nkama lowu taka kumbe hi ku chava ku fa. Mina na Tony vhiki ni vhiki hi pfuxela vamakwerhu a mabandleni leswaku hi va tiyisa. Hina ni vamakwerhu hi djondzisa vanhu van’wana swaku loko va kholwa ka Yesu va ta hanya wutomi la ku kala li nga heli.