1. Yehovha a vule swaku akuta yendleka yini aminkameni ya hina?

YEHOVHA a vule leswi hi nkama wa hina: “Amasikwini wolawo, 10 wa vavanuna va tirimi hinkwatu ta matiko vata khoma, ina, vata khoma nguvu ya wanuna lweyi anga Muyuda, na va ku: ‘Hi lava kufamba na n’wina, hikusa hiswi twile leswaku Xikwembu xi na n’wina.’” (Zak. 8:23) Laha “Muyuda” a fanekisela lava Xikwembu xiva toteke hi moya wokwetsima. Vona va vitaniwa “Israyele wa Xikwembu.” (Gal. 6:16, NM) A “10 wa vavanuna” va fanekisela lavanga ni ntshembo wa kuhanya hi laha kunga heliki laha misaveni. Vaswi tiva swaku Yehovha hi yena anga langa ntlawa lowu wa vatotiwa naswona vaswi tsakela kugandzela xikan’we na vona.

2. A“10 wa vavanuna” va “fambisa” kuyini ni vatotiwa?

² Hambi leswi namuntlha wa siku swi kalaka swinga koteki kutiva mavito ya mun’wana ni mun’wana wa vatotiwa, * lava vanga ni ntshembo wa kuhanya laha misaveni vangaswi kota “kufamba” na vona. Hi mhaka muni hi vula leswo? Hi mhaka Bibele yi li: “10 wa vavanuna . . . vata khoma nguvu ya wanuna lweyi anga Muyuda, na va ku: ‘Hi lava kufamba na n’wina, hikusa hiswi twile leswaku Xikwembu xi na n’wina.’” Ndzimana ya Bibele yi vulavula hi Muyuda mun’we. Kambe loko yi ku, “n’wina” yi vulavula hi ntlawa wa vanhu. Leswi swi vula leswaku Muyuda mun’we a fanekisela ntlawa hinkwawu wa vatotiwa. Lava va kukala vanga totiwanga va tirhela Yehovha  xikan’we ni vatotiwa. Hambi leswo ahi va teki tani hi varhangeli, hikusa haswi tiva swaku Murhangeli wa hina i Yesu. — Mat. 23:10.

3. Hi swihi swivutiso leswi hingataswi hlamula ka djondzo leyi?

³ Leswi kaha liki ni vatotiwa kuta fikela namuntlha axikarhi ka vanhu va Xikwembu hinga tivutisa leswi: 1) Vatotiwa va fanele va tivonisa kuyini? 2) Hi fanele hiva khomisa kuyini? 3) Hi fanele hi karhateka hi swaku i vangani lava dlaka pawu ni kunwa vhinyu? Djondzo leyi, yita hlamula swivutiso leswi.

4. Kutsaliwe swaku yini ka 1 Vakorinto 11:27-29, naswona hi mhaka muni vatotiwa va fanele va yanakanyisisa kahle hi swona?

⁴ Lava totiweke va fanele va yanakanyisisa kahle hi leswinga tsaliwa ka 1 Vakorinto 11:27-29. (Lerha.) Swinga yendlekisa kuyini kuva mutotiwa adla pawu a nwa ni vhinyu hi “ndlela leyingalulamangiki” ka xitsundzuxo? Leswo swinga yendleka loko ku li swaku angayi yingisi minawu ya Yehovha. (Hev. 6:4-6; 10:26-29) Vatotiwa vaswi tiva swaku va fanele va tshama va tshembekile loko va lava ‘kukuma hakelo,  kunga kuvitana ka Xikwembu ha Yesu Kriste’. — Filp. 3:13-16.

5. Vakreste lava totiweke va fanele va tivonisa kuyini?

⁵ Moya wokwetsima wa Yehovha wu pfuna malandza ya yena leswaku manga tibyeli, kambe mati veka hansi. (Efe. 4:1-3; Kol. 3:10, 12) Hi mhaka leyo, vatotiwa ava tivoni na va yampsa kutlula van’wana. Vaswi tiva swaku Yehovha angava nyikanga moya wokwetsima wa kutlula van’wana. Ava tivoni navali twisisa kuyampsa Bibele kutlula van’wana. Nakambe ava tshuki va byela munhu swaku na yena i mutotiwa anga sungula kutidlela pawu ni kunwa vhinyu ka Xitsundzuxo. Leswi va tivekaka hansi, vaswi twisisa swaku kova Yehovha ntsena anga rhambaka vanhu leswaku va ya matilweni.

6. Hikuya hi 1 Vakorinto 4:7, 8, Vakreste lava totiweke va fanele va tikhomisa kuyini?

⁶ Hambi leswi vatotiwa va titwaka nava li ni lunghelo lohlawuleka la kuya matilweni, ava nyimelanga swaku van’wana vava khoma hi ndlela yohlawuleka. (Filp. 2:2, 3) Vona vaswi tiva swaku ankama Yehovha angava tota, anga zanga a byela munhu. Hi mhaka leyo, ava hlamali loko van’wana vanga tekeli kukholwa swaku va totiwile. Nakambe vaswi tiva swaku Bibele lihi byela swaku ahi fanelanga hi hantlisela kukholwa loko munhu wokarhi ahi byela swaku a nyikiwe wutihlamuleli lohlawuleka. (Nhla. 2:2) Mukreste lweyi a totiweke anga nyimelanga leswaku van’wana vamu teka na a hlawulekile, naswona anga byeleteli vanhu lava a kumanaka na vona swaku yena i mutotiwa. Futshi anga tsuki a gwira hi mhaka leswi anga mutotiwa. — Lerha 1 Vakorinto 4:7, 8.

7. Vatotiwa va fanele va tivonela ka yini naswona hi mhaka muni?

⁷ Vakreste lava totiweke ava titwi ingi hi loko va fanele va heta nkama ni vatotiwa van’wana, ingi hi loko vo lumba xintlawana xokarhi. Ava fambi va lavetela vatotiwa van’wana leswaku va bula hi wutotiwa la vona kumbe kuva va djondza Bibele hi xivona. (Gal. 1:15-17) Loko vo yendla leswo a bandla alingevi ni vun’we, naswona va tava va lwisana ni moya wokwetsima lowu pfunaka vanhu va Xikwembu leswaku vava ni kurhula ni vun’we. — Rhom. 16:17, 18.

8. Hi mhaka muni hi fanele hi tivonela ka leswi hiva khomisaka xiswona lava dlaka swifanekiselo ka Xitsundzuxo? (Vona ni ntlhamuselo ya le hansi.)

⁸ Hi fanele hiva khomisa kuyini vamakwerhu lava totiweke? Hambi leswi vanga vamakwavu va Kreste ahi fanelanga hiva hlonipha kutlula mpimu. (Mat. 23:8-12) Loko Bibele li  vulavula hi madoda, li li hi fanele hi ‘tekelela lipfumelo la vona.’ Kambe a li vuli swaku hingaha teka munhu wokarhi tani hi murhangeli wa hina. (Hev. 13:7) I ntiyiso swaku Bibele li li kuni lava faneliwaka hi ‘kuxiximiwa swinene’ kambe xivangelo xa kona hileswi va rhangelaka “khwatsi” ni leswi va ‘tikarhatelaka Rito kumbe kuvulavula ni kujondzisa’. Ali vuli swaku ku ni lava faneliwaka hi kuhloniphiwa hileswi vanga vatotiwa. (1 Tim. 5:17) Loko hi hlonipha vatotiwa kutlula mpimu kumbe hiva dzunisa, hitava yendla va titwa tingana. * Xa kubiha ngopfu, hi leswaku vanga sungula kutibyela. (Rhom. 12:3) Anga kona ka hina lweyi a lavaka kuyendla nchumu lexinga yendlaka mun’we wa vatotiwa va Kreste a wela ka xihoxo xolexo lexikulu! — Luk. 17:2.

9. Hingaswi kombisa kuyini swaku hava hlonipha Vakreste lava totiweke?

⁹ Hingaswi kombisa kuyini swaku hava hlonipha vatotiwa va Yehovha? Ahi fanelanga hiva vutisa swaku va totisiwe kuyini. Ahina nfanelo ya kuswi tiva leswo hikusa i mhaka leyi lumbaka vona ntsena. (1 Tes. 4:11; 2 Tes. 3:11) Nakambe ahi fanelanga hi pimisa swaku loko munhu wokarhi a totiwile, swi vula swaku nsati kumbe nuna wa yena ni maxaka ya yena na wona ma totiwile. Ntshembo wa kuhanya matilweni munhu angawu kumi ka vapsali kumbe maxaka ya yena. Kambe awu kuma ka Xikwembu. (1 Tes. 2:12) Nakambe ahi fanelanga hi yendla swivutiso leswingata vavisa vanhu van’wana. Hi xikombiso, ahi fanelanga hi vutisa nsati wa mutotiwa swaku a titwisa kuyini hi kutiva swaku ata hanya hi laha kunga heliki laha misaveni na angana nuna wa yena. Hikusa hinga tiyiseka hi kuhelela leswaku amisaveni leyimpsha, Yehovha ata “yenelisa kunavela ka xilo xin’wana ni xin’wana lexi hanyaka.” — Pis. 145:16.

10. Loko hinga hloniphi munhu kutlula mpimu, hiva hi tivhikela ka yihi?

¹⁰ Loko hinga khomi Vatotiwa ingi hiloko vali va lisima kutlula van’wana, hitava hi tivhikela. Hi mhaka muni? Hikusa Bibele li vula swaku vatotiwa van’wana vangaha tshika kutshembeka. (Mat. 25:10-12; 2 Pet. 2:20, 21) Kambe loko hinga hloniphi munhu kutlula mpimu, ahingata tshuka hi landzelela vanhu, hambi vova vatotiwa kumbe vamakwerhu lava tiviwaka ngopfu hambi hi lava vanga tirhela Yehovha malembe ya kutala. (Yudha 16) Kutani loko va tshika kutshembeka kumbe va tihambanisa ni bandla, ahingata lahlekeliwa hi lipfumelo la hina kumbe kutshika kutirhela Yehovha.

11. Kuyendleke yini hi lava dlaka pawu ni kunwa vhinyu ka Xitsundzuxo?

¹¹ Kuringana malembe manyingi, lava dlaka pawu ni kunwa vhinyu ka Xitsundzuxo ava ya va pumbeka. Kambe ka malembe ya swoswi nyana va ya va yengeteleka. Leswo swi fanele swihi karhata? Inhim. Ahi voneni swaku hi mhaka muni hinga fanelanga hi karhateka hi mhaka leyo.

12. Hi mhaka muni hinga fanelanga hi karhateka hi swaku lava dlaka pawu ni kunwa vhinyu ka Xitsundzuxo va ya va tala?

¹² Yehovha ‘wava tiva lavanga va yena.’ (2 Tim. 2:19) Kuhambana na Yehovha, vamakwerhu lava kontaka lava dlaka pawu ni kunwa vhinyu ka Xitsundzuxo avaswi tivi leswaku hi mani anga mutotiwa hikakunene. Kutani va patsa ni lava pimisaka swaku  i vatotiwa kuve ava totiwanga. Hi xikombiso, van’wana lava ava dla, hi kufamba ka nkama va game va nyima. Van’wana hi mhaka kukala tingateki va pimisa swaku vataya fuma na Kreste amatilweni. Ntiyiso wa mhaka hi leswaku ahiswi tivi hi kukongoma swaku kusale vatotiwa vangani laha misaveni.

13. Bibele la vula swaku akuta va kusale vatotiwa vangani loko kusungula nhlomulu lowukulu?

¹³ Kaha tava ni vatotiwa ka tindhawu ta kutala la misaveni loko Yesu a tela kutava teka vaya matilweni. (Mat. 24:31) Bibele li vula swaku ka masiku ya wugamu akutava ni vatotiwa va vatsongo laha misaveni. (Nhla. 12:17) Kambe ali vuli swaku akuta va kusale vangani loko kusungula nhlomulu lowukulu.

14. Hi laha Varhoma 9:11, 16 yiswi kombisaka ha kona, hi djondza yini hi kulangiwa ka vatotiwa?

¹⁴ Yehovha hi yena a langaka nkama lowu angata hlawula vatotiwa ha wona. (Rhom. 8:28-30) Yehovha a sungule kulanga vatotiwa loko Yesu se a pfuxiwile. Swi tikomba ingi nkameni wa vapostola, Vakreste hinkwavu ava li vatotiwa. Ka malembe lama landzeleke kutala ka lava tivuleke Vakreste avanga li Vakreste va ntiyiso. Hambi leswo, ka malembe wolawo, Yehovha a lange Vakreste vatsongo ka lava ava li va ntiyiso. Vona ava fana ni trigu leli Yesu a vuleke swaku alita kula xikarhi ka mabyanyi kumbe mfava. (Mat. 13:24-30) Ka masiku lawa ya wugamu, Yehovha a tama a langa vanhu akuva va vumba ntlawa wa lava 144.000. * Kutani loko Yehovha a langa van’wana na makumu mali kusuhi hintamu ni kufika, ahi fanelanga hi sola wutlhari la yena.  (Lerha Varhoma 9:11, 16.) * Hi fanele hi tivonela leswaku hinga fani ni vatirhi lava Yesu a vulavuleke hi vona ka xin’we xa swifaniso swa yena. Va sole leswi mulungu wa vona angava khomisa xiswona lavanga sungula kutirha ka wora la wugamu. — Mat. 20:8-15.

15. Kungava leswaku vatotiwa hinkwavu va lumba nandza wotshembeka ni wotlhariha lweyi kuvulavuliwaka hi yena ka Matewu 24:45-47? Tlhamusela.

¹⁵ Ahi hinkwavu lavanga ni ntshembo wa kuya hanya amatilweni vanga va ntlawa wa “Nandza Wotshembeka ni Wotlhariha.” (Lerha Matewu 24:45-47.) Kufana ni ka minkama ya vapostola Yehovha na Yesu va tirhisa vanhu vatsongo namuntlha leswaku va phamela kumbe kudjondzisa vanhu votala. Naswona i Vakreste vatsongo lava totiweke va tirhisiweke kutsala Matsalwa ya Wukreste ya Xigriki. Ni namuntlha i Vakreste vatsongo lavanga nyikiwa ntirho wa kuphamela vanhu va Xikwembu a “swakuja hi nkarhi wakona.”

16. U djondze yini ka nhlokomhaka leyi?

¹⁶ U djondze yini ka nhlokomhaka leyi? Yehovha a lange kunyika malandza ya yena yotala wutomi lelinga heliki laha misaveni, kambe a lange van’wana va vatsongo leswaku va ya fuma na Yesu amatilweni. Yehovha ata hakela malandza ya yena hinkwawu, “Muyuda” ni “10 wa vavanuna” naswona a lava leswaku va yingisa minawu ya kufana vatlhela va tshama va tshembekile. Hinkwerhu hi fanele hi tama hi tiveka hansi hi tlhela hi gandzela xikan’we hi vun’we. Naswona hi fanele hi lwa hiva ni kurhula ni vamakwerhu. Leswi magamu manga kusuhi, ahi tameni hi tirhela Yehovha ni kulandzela Yesu tanihi “ntlhambi wun’we”. — Yoh. 10:16.