1. Hingamu tekelelisa kuyini B’ava wa hina wa lirhandzu Yehovha?

YEHOVHA ahi rhandza hintamu swinene. (Yoh. 3:16) Hi mhaka leyo hi fanele himu tekelela. Hingaswi maha leswo hi ‘kutwelana vusiwana, hiva ni rirhandzu ka vamakwerhu, [ni] kuva ni mbilu ya vumunhu’ ka vanhu hinkwavu, kambe ngopfungopfu ka “va njangu wa lavapfumeleke.” (1 Pet. 3:8; Gal. 6:10) Leswo swi vula leswaku loko vamakwerhu abandleni va kumana ni swikarhatu hi fanele hiva pfuna.

2. I mpsini leswi hingata bula hi swona ka nhlokomhaka leyi?

² Hinkwavu lava lavaka kutirhela Yehovha vata kumana ni swikarhatu. (Marka 10:29, 30) Leswi magamu ma yaka ma tshinela hita kumana ni swikarhatu swa swinyingi. Hinga pfunanisa kuyini? Ahi voneni leswaku hinga djondza yini ka xikombiso xa Lota, Yobo na Nawomi. Hita tlhela hi vona leswaku hi swihi swikarhatu leswi vamakwerhu va kumanaka naswona namuntlha ni leswaku hingava pfunisa kuyini leswaku va tiyisela.

3. Hi laha swi kombisiweke ha kona ka 2 Petro 2:7, 8, hi xihi xihoxo lexi Lota axi yendleke, naswona kuve lihi vuyelo la kona?

³ Lota anga yendlanga kahle hi kuya tshama xikarhi ka vanhu vobiha swinene va Sodoma. (Lerha 2 Petro 2:7, 8.) Doropa la Sodoma a li ganyile. Kambe Lota a hakele kuvava hi leswi a yeke aya tshama kona. (Gen. 13:8-13; 14:12) Swinga yendleka nsati wa yena a a sungule kutolovelana ni vanhu va Sodoma lakakuva a tshike ni kuyingisa Yehovha. A file loko Xikwembu xi nisa “ndzilo ni xivavula” hi le tilweni. Pimisa hi vana vambirhi va Lota va tintombhi. Vavanuna lava ava tshembisane kutekana na vona va file loko kulovisiwa a doropa la Sodoma. Lota a  luze munti wakwe ni swibya swakwe. Xa kuvava kutlula hinkwaswu, Lota a luzekeliwe hi nsati wa yena. (Gen. 19:12-14, 17, 26) Kambe ka kukarhateka hinkwaku loku a kumaneke na kona, Yehovha a ngamu tshikanga.

4. Yehovha amu lehiselise kuyini mbilu Lota? (Vona xifaniso ka tluka lorhanga.)

⁴ Hambileswi Lota angayo tikhetela hi yexe kuya tshama a Sodoma, Yehovha amu kombe timpsalu hi kurhumela tintsumi leswaku tiyamu ponisa yena ni ndjangu wa yena. Hambi leswo, matshan’wini ya kuyingisa xilerhiso xa tintsumi xa leswaku va huma a Sodoma hi kuhantlisa, Lota ave ni mihoni. Hi mhaka leyo tintsumi ti khome Lota hi voko swin’we ni ndjangu wa yena tiva humesa a Sodoma. (Gen. 19:15, 16) Kutani tiva byele leswaku va baleka vaya tintshaveni. Kambe matshan’wini ya kuyingisa Yehovha, Lota a kombele kuya ka doropa leli ali li kusuhi. (Gen. 19:18-20) Hi kumu lehisela mbilu, Yehovha amu pfumelelile. Hi kufamba ka nkama Lota a sungule kuchava kutshama ka doropa lelo, kutani a rhurhile aya tshama tintshaveni, kola Yehovha a amu byele leswaku aya kona kusunguleni. (Gen. 19:30) Ndlela leyi Yehovha a lehiseke mbilu ha yona ya hlamalisa! Hingamu tekelelisa kuyini?

5-6. Hikuya hi 1 Vatesalonika 5:14, hinga maha yini leswaku hi tekelela Xikwembu?

⁵ Kufana na Lota, swinga yendleka makwerhu wokarhi a bandleni a yendla xiboho lexi hoxeke ivi a gama a tshovela kuvava hikolaho ka xona. Loko swoleswo swi maheka hita kuyini? I ntiyiso leswaku makwerhu lweyo atava na a tshovela leswi aswi byaleke. Kambe akuna xilaveko xa kuva himu byela leswo. (Gal. 6:7) Hambileswo hinga maha swa swinene kutlula leswo. Hingaswi mahisa kuyini? Hi kutekelela leswi Yehovha amu pfuniseke xiswona Lota.

⁶ Yehovha anga rhumanga tintsumi leswaku tita tsundzuxa Lota tsena, kambe ni kumu pfuna leswaku a baleka makhombo lawa amata wela Sodoma. Hi kufanana hi fanele hiva ba ndleve vamakwerhu loko hiva vona va maha swiboho swa kukala swingali kahle. Kambe a holava kuva khumbuza tsena, hi lava ni kuva pfuna. Hambiloko va hlwela kutirhisa switsundzuxu swa Bibele leswi hiva nyikeke swona, hi fanele hiva lehisela mbilu kufana ni tintsumi letiya ta timbirhi. Matshan’wini ya kugodola kumbe hi huma ka vona, hi fanele hi lava tindlela tin’wana ta kuva pfuna. (1 Yoh. 3:18) Hi ndlela yofanekisela swilava himu khoma hi voko, himu pfuna kutirhisa switsundzuxu leswinene leswi himu nyikaka swona. — Lerha 1 Vatesalonika 5:14.

7. Hingaswi tekelelisa kuyini leswi Yehovha amu voniseke xiswona Lota?

⁷ Yehovha anga dzikanga ka kukala kuhetiseka ka Lota. Matshan’wini ye leswo hi kufamba ka nkama a huhutele mupostola Petro kuva a kombisa leswaku Lota a ali wanuna wa kululama. Hatsaka swinene hi kutiva swaku Yehovha wa rivalela! (Pis. 130:3) Hingaswi tekelelisa kuyini leswi Yehovha amu voniseke xiswona Lota? Loko hi dzika ka wumunhu lelinene leli vamakwerhu vangana lona naswona hiva lehisela mbilu, na vona vangahaswi tsakela swinene ku yamukela mpfunu wa hina.

8. I mpsini leswi ntwelawusiwana wungatahi susumetela kuswi maha?

⁸ Kuhambana na Lota, Yobo ahlupekile hambi leswi a anga wonhanga nchumu. A luzekeliwe hi swilo leswi a ali na swona, kuhloniphiwa kakwe mugangeni atlhela a ngheniwa hi mavabyi. Xa kubiha kutlula hinkwaswu vana va yena hinkwavu va file. Naswona vanghanu vakwe va vanharhu va mavun’wa va fike vamu  lumbeta. Hi mhaka muni va pfumale ntwelawusiwana loko vamu chavelela? Ava zamanga kutwisisa swaku kumaheka yini. Leswo swive ni vuyelo la kubiha, va fikelele makumu ya kukala mangali wona naswona va yavanyise Yobo hi tihanyi. Hingaswi balekisa kuyini swihoxo swakufana ni leswi? Phela kutiva leswaku Yehovha hi yena ntsena a xitivaka kahle xiyimo xa munhu switahi pfuna leswaku himu yingisela kahle munhu lweyi akerhatekaka loko a khuluma. Zama kutitwisa leswi na yena atitwisaka xiswona loko umu yingisela. Loko u maha leswo swita kuvevukela kukombisa ntwelawusiwana ka vamakwerhu hinkwavu.

9. Loko hi kombisa ntwelawusiwana i mpsini leswi hingata kala hingaswi yendli naswona hi mhaka muni?

⁹ Ntwelawusiwana wutahi pfuna leswaku hinga ndzaveti hi swikarhatu leswi vanhu van’wani va kumanaka na swona. Phela van’wamandzendze ava pfuni bandleni kambe vohahlula. (Swi. 20:19; Rhom. 14:19) Ava pimisi na vangase vulavula. Naswona marito ya vona manga tlhava mbilu ya munhu lweyi se anga kuxanisekeni. (Swi. 12:18; Efe. 4:31, 32) Swa yampsa swinene loko hi cuvuka swilo leswinene ka vamakwerhu naswona hi zama kuva pfuna loko vali kuxanisekeni.

10. Marito lamanga ka Yobo 6:2, 3, mahi djondzisa yini?

¹⁰ Lerha Yobo 6:2, 3. Minkama yin’wana Yobo a apfa a vulavula marito ‘lamahumeke andleleni.’ Kambe hi kufamba ka nkama a game a tisola. (Yobo 42:6) Kufana na Yobo, munhu lweyi anga kukarhatekeni angaha vula swilo leswi humeke ndleleni, kambe hi kufamba ka nkama a gama a tisola. Hingaku yini loko kumaheka swilo swofana ni leswo? Matshan’wini ya kumu solasola hi kolaho ka leswi aswi vulaka, hitamu lehisela mbilu. Khumbuka leswaku loko Yehovha a vumba vanhu akungali xikongomelo xa yena kuva va kumana ni swikarhatu leswi va kumanaka naswona nyamuntlha.  Swa twala leswaku hi mhaka muni malandza ya Yehovha yotshembeka ma tshuka ma vulavula swilo leswi humeke ndleleni loko ma karhatekile mbilwini. Hambi loko a vulavula kubiha hi Yehovha kumbe hi hina, ahingata hantlisela ku kwata kumbe kumu yavanyisa. — Swi. 19:11.

11. Madoda mangamu tekelelisa kuyini Elihu loko ma lava kulaya munhu?

¹¹ Makhambi man’wana munhu lweyi a langutanaka ni kukarhateka ambilwini angaha lava xitsundzuxu xokarhi kumbe kulayiwa. (Gal. 6:1) Madoda manga yendlisa kuyini leswaku mamu pfuna? Manga tekelela Elihu, lweyi amu yingiseleke kahle Yobo loko ali karhi a tiphofula. (Yobo 33:6, 7) Elihu a laye Yobo ntsena ndzhaku ka loko aswi twisise kahle leswi a ati twisa xiswona. Madoda manga tekelela xikombiso xa Elihu hi kumu yingisela kahle munhu lweyi a xanisekaka ni kuzama kumu twisisa. Ndzhaku ka leswo, hi kona vangata kota kufikelela mbilu ya yena hi leswi vangataswi vula.

12. Lifu la nuna wa Nawomi xikan’we ni vana vakwe limu khumbise kuyini?

¹² Nawomi a ali wansati wotshembeka lweyi a arhandza Yehovha. Kambe ndzhaku ka loko a feliwe hi nuna ni vana va yena va vambirhi, a lave kucinca vito la yena leswaku matshan’wini yaku a vitaniwa Nawomi, a hamba a vitaniwa “Mara” leli vulaka “Kubava”. (Rhuti 1:3, 5, 20, 21) N’wingi [kumbe mawokazani] wakwe Rhuti, ave na yena ka swikarhatu hinkwaswu leswi a kumaneke na swona. Rhuti angamu pfunanga hi swiyendlo ntsena kambe a tlhele a vula marito ya kumu chavelela. Rhuti a vule marito lawa ama sukela mbilwini, lama kombiseke lirhandzu ma tlhela mamu tiyisa swinene Nawomi. — Rhuti 1:16, 17.

13. Hi mhaka muni lava feliweke hi nuna kumbe nsati va lava leswaku hiva seketela?

¹³ Loko makwerhu a bandleni a feliwa hi lweyi a chadeke na yena a lava himu seketela. Nuna na nsati hingava fanisa ni minsinya yimbirhi leyi kuleke kusuhi na kusuhi. Hi kufamba ka malembe timintsu ta yona tingaha bohelelana. Loko wun’we wu tsuvuliwa kumbe wu dlayiwa, lowun’wana wa khumbeka. Hilaha kufanaka, loko munhu a feliwa hi nuna kumbe nsati angaha karhateka nkama wa kuleha swinene. Paulina, * lweyi nuna wa yena a feke hi xitshuketa, a te: “Wutomi la mina li djime hi nhloko, naswona ni titwe ningana ntamu. Ni luzekeliwe hi munghanu wa mina lwenkulu. Xin’wana ni xin’wana ani byela yena. Ahi tsaka xikan’we naswona a ani seketela ka swiyimo swokarhata. Nkama hinkwawu a ani yingisela loko ni vulavula hi swilo leswi aswini karhata. Loko a file, ni titwe ingi hi loko ku susiwe xokarhi amuzimbeni wa mina.”

14-15. Hingamu chavelelisa kuyini munhu lweyi a feliweke hi nuna kumbe nsati?

¹⁴ Hingava chavelelisa kuyini lava va feliweke hi nuna kumbe hi nsati? Xa kusungula lexi hi faneleke hixi maha i kubula na yena hambi loko hi titwa hini tingana kumbe hinga tiyiseki hi leswi hingatamu byela swona. Paulina lweyi hi buleke ha yena kusunguleni a te: “Naswi twisisa leswaku lifu li yendla vanhu va titwa vanga khululekanga kuvula xokarhi. Va chava leswaku vanga tshuka va vula swilo leswinga vavisaka lweyi a feliweke, kambe leswo swa yampsa kutlula kumiyela.” Munhu lweyi a rilaka hi leswi a feliweke anga nyimelanga leswaku himu byela marito lama kombisaka leswaku hi tiva ngopfu. Paula a li: “Aniswi khensa swinene loko vanghanu va mina va vula va ku, ‘ni rila na wena hi kolaho ka leswi humeleleke.’”

 ¹⁵ Wiliyamu, lweyi a feliweke hi nsati malembe nyana ma hundzeke a te: “Na tsaka loko vanhu va vulavula swilo leswinene leswi vahaswi kumbukaka hi nsati wa mina. Leswo swini kholwisa leswaku a arhandziwa ni kuhloniphiwa. Machavelelelo lawa mani pfunile swinene. Marito ya vona mani chavelelile swinene hikusa nsati wa mina a ali wa lisima swinene ka mina naswona animu rhandza.” Mufelakazi mun’wana lweyi hingatamu vitanaka Biatriz a li: “Na chaveleleka loko van’wana va khongela na mina ni kuni lerhela tindzimana tokarhi. Swin’wani leswini pfunaka i kuva twa va vulavula hi nuna wa mina ni kuni yingisela loko ni vulavula hi yena.”

16. a) I mpsini leswi hi faneleke hiswi yendlela lava feliweke hi lweyi vamu rhandzaka? b) Hikuya hi buku la Yakobo 1:27, hi lihi wutihlamuleli leli hingana lona?

¹⁶ Kufana na Rhuti lweyi a tshameke na Nawomi wa mufelakazi, hi fanele hi pfuna lava feliweke hi munhu lweyi vamu rhandzaka. Paulina lweyi se hi buleke ha yena a te: “A nkama nuna wa mina angafa, vanhu vanyingi va tile leswaku vatani pfuna ni kuni chavelela. Kambe ndzhaku ka nkama nyana va tlhelele ka mintirho ya vona ya siku ni siku. Hambileswo, wutomi la mina li cincile hi kuhelela. Swi pfuna hintamu loko van’wana va twisisa leswaku munhu lweyi a feliweke a lava kupfuniwa ka tiwheti ni malembe lama landzelaka ndzaku ka kufeliwa.” I ntiyiso leswaku hina vanhu ha hambana. Van’wana vati komba va hantla va tolovelana ni swiyimo. Kasi van’wanyana swi hambanile. Xin’wana ni xin’wana lexi avaxi maha ni murhandziwa wa vona xiva yendla vamu khumbuka ni kutwa kuvava hi leswi vamu luzeke. Marilelo ya lava feliweliweke ma hambana. Khumbuka leswaku  Yehovha ahi nyika mukhandlu ni wutihlamuleli la kuchavelela lava feliweke hi nuna kumbe hi nsati. — Lerha Yakobo 1:27.

17. Hi mhaka muni lava tshikiweke hi lava tekaneke na vona va lava kuchaveleliwa?

¹⁷ Van’wana va tshoveke timbilu hi leswi va tshikiweke hi lweyi ava chade na yena. Joise, lweyi nuna wa yena amu tshikeke a teka nsati mun’wana, a vule leswi: “Kuvava loku niku tweke hi leswi ani tsikeke, ku tlula loku anita kutwa loko a ayofa. Loko a ayofa ka nghozi kumbe a dlayiwa hi mavabyi aswi yampsa hikusa a atava angayoswi lava. Kasi ka mhaka leyi, ayoswi lava hi yexe kuni tshika. Leswo swini yendle ni titwa ninga pfuni nchumu.”

18. Hinga maha yini leswaku hi pfuna lava luzekeliweke hi nuna kumbe nsati?

¹⁸ Loko hi kombisa wunene ka lava va luzekeliweke hi nuna kumbe nsati, hi va hiva komba leswaku hava rhandza. Xa xikulu ka hinkwaswu va lava vanghanu lavanene. (Swi. 17:17) Ungaswi kombisa kuyini leswaku u munghanu ka vona? Ungava rhamba leswaku mitadla xikan’we. Nakambe ungati nyika nkama wa kuhungata na vona kumbe kuhuma na vona nsimu. Xin’wana ungaxi yendlaka i kuva rhamba leswaku vatava na n’wina ka wugandzeli la ndjangu. Loko u yendla leswo uta tsakisa mbilu ya Yehovha, hikusa yena “akusuhi ni lava tshovekeke mbilu” naswona i “muyavanyisi [kumbe musirheleli] wa vafelakazi”. — Pis. 34:18; 68:5.

19. I mpsini leswi 1 Petro 3:8, yihi byelaka leswaku hiswi maha?

¹⁹ Kungali khale, loko Mfumu wa Xikwembu wu fuma misava “maxangu yosungula ma ta khohlwiwa”. Hiwu rindzela swinene nkama lowo loko swilo leswingata hundza swingata kala swingaha khumbukiwe, “hambi ambilwini aswingeheti.” (Esa. 65:16, 17) Kambe, na siku lelo lingase fika, ahi pfunaneni, hi tlhela hi kombisa hi marito ni hi swiyendlo swa hina leswaku hava rhandza vamakwerhu hinkwavu. — Lerha 1 Petro 3:8.