1. I mpsini leswi munhu lweyi a nga tsakamisiwa a faneleke a tama a swi yentxa?

SE U tsakamisiwile? Loko se u tsakamisiwile, u kombe vanhu hinkwavu swaku u ni lipfumelo ka Yehovha funtshi u lava ku mu tirhela ni nhlengeletanu ya yena. * I ntiyiso swaku lipfumelo la wena li fanele li tama li kula naswona u fanele u li tiyisa hi ku tshemba swaku nhlengeletanu ya Yehovha yi yentxa leswi yena a swi lavaka namuntlha.

2-3. Kombisa swaku Yehovha a yi kongomisisa ku yini nhlengeletanu ya yena namuntlha.

² Swoswi Yehovha a tirhisa a nhlengeletanu ya yena swaku a kombisa wumunhu la yena, leswi a swi lavaka ni minawu ya yena. A hi kambisiseni swaku Yehovha a swi yentxisa ku yini leswo hi ku tirhisa nhlengeletanu ya yena.

³ Xa ku sungula, “Xikwembu axiyi hi nghohe.” (Mint. 10:34) Lirhandzu la Yehovha li yentxe swaku a nyikela hi N’wana wa yena swaku a va “muponisi wa vanhu hinkwavu.” (1 Tim. 2:6; Yoh. 3:16) Yehovha a tirhisa vanhu va yena swaku va chumayela mahungu ya ku tsakisa. Hinkwavu lava yingisaka va nga ha ponisiwa hi ku tirhisa lifu la N’wana wa yena. Xa wumbirhi, Yehovha i Xikwembu lexi tsakaka loko swilo swi famba kahle ni loko ku va ni ku rhula. (1 Kor. 14:33, 40) Hi mhaka leyo, lava va mu tirhelaka i vanhu va ku rhula funtshi va hlelekile. Xa wunharhu, Yehovha i “Mudjondzisi Lwenkulu.” (Esa. 30:20, 21) Hi mhaka leyo, nhlengeletanu ya yena yi yentxa hinkwaswu leswi yi nga swi kotaka swaku yi djondzisa vanhu Bibele amintlhanganwini ni nsin’wini.  Swilo leswi swa swinharhu, a swi vonekisa ku yini a nkameni wa vapostolo? Naswona swi vonekisa ku yini ka nkama wa hina? Se moya wa ku kwetsima wu nga hi pfunisa ku yini ku tama hi tirhela Yehovha ka nhlengeletanu ya yena?

4. Hi ku ya hi Mintirho 1:8, i mpsini leswi Yesu a nga rhuma vadjondzisiwa va yena swaku va swi yentxa naswona a va ta pfuniwa hi yini?

⁴ Aminkameni ya vapostolo. Leswi Yesu a a swi djondzisa vanhu a swi va yentxa va va ni ntshembo. (Luk. 4:43) A byele vadjondzisiwa va yena swaku va tama va yentxa ntirho lowu yena a a wu sungulile, ‘kuyafika magan’wini ya misava.’ (Lerha Mintirho 1:8.) Phela a va nga ta swi kota ku yentxa ntirho lowu hi matimba ya vona, a va ta pfuniwa hi moya wa ku kwetsima, lowu Yesu a nga va tshembisa swaku wu ta va pfuna. — Yoh. 14:26; Zak. 4:6.

5-6. Moya wa ku kwetsima wu va pfunise ku yini vadjondzisiwa va Yesu?

⁵ Vadjondzisiwa va Yesu va yamukele moya wa ku kwetsima ka Pentekoxta la 33 aminkameni ya vapostolo. Moya wa ku kwetsima hi wona wu nga va pfuna swaku va sungula ku chumayela naswona hi nkamanyana vanhu va vanyingi va yamukele mahungu ya ku tsakisa. (Mint. 2:41; 4:4) A nkama vanhu va nga sungula ku va xanisa, a va chavanga kumbe va tshika ku chumayela. Kambe va khongele va ku: ‘Nyika malandza ya wena kuvula rito la wena na vatiyile vangachavi nchumu’. Va game va tala hi moya wa ku kwetsima va tlhela ‘va vula rito la Xikwembu na vatiyile.’ — Mint. 4:18-20, 29, 31.

⁶ Vadjondzisiwa va Yesu a va kumana ni swikarhatu swin’wana. Hi xikombiso, a va nga na Mabibele ya manyingi kumbe mabuku ya ku fana ni lawa hi ma tirhisaka namuntlha. Naswona a va fanele va chumayela vanhu lava vulavulaka hi tirimi ta ku hambanahambana. Hambileswi a va ni swikarhatu swa swinyingi, a va nga pimisi swaku a va nge swi koti ku yentxa ntirho lowu. Hikusa loko se ku hundze kolomu ka 30 wa malembe a va chumayele mahungu ya ku tsakisa ka ‘swivumbiwa hinkwaswu leswinga hansi ka tilo.’ — Kol. 1:6, 23.

7. Ka malembe ya 100 lawa ma nga hundza, vanhu va Yehovha va swi tivise ku yini leswi a a swi lava naswona va yentxi yini?

⁷ Aminkameni ya hina. Yehovha a tama a tiyisa ni ku kongomisa a nhlengeletanu ya yena. Swoleswo a swi yentxa hi ku tirhisa a Bibele. Ka lona hi kuma hinkwaswu leswi Yesu a nga swi yentxa ni swaku a rhume Vadjondzisiwa va yena swaku va tama va chumayela. (Mat. 28:19, 20) Ka Murindzi wa Julho wa 1881 (hi Xinghiza), a ku tsaliwe leswi: “Yehovha a nga hi langanga swaku hi ta hloniphiwa hi vanhu kumbe hi ganya kambe a hi langile swaku hi tirhisa hinkwaswu leswi hi nga na swona leswaku hi chumayela mahungu ya ku tsakisa.” Ka xibukwana lexi nge: To Whom the Work Is Entrusted (I Mani A Nga Rhumiwa Ntirho Lowu?) lexi nga humesiwa hi 1919, a ku tsaliwe leswi: “Ntirho wu tikomba na wu li wunyingi kambe i ntirho wa Hosi, naswona yona yi ta hi pfuna swaku hi wu yentxa.” Ku fana ni vamakwerhu va minkameni ya vapostolo, vamakwerhu va tirhe hi matimba hikusa a va tshemba swaku moya wa ku kwetsima wu ta va pfuna ku chumayela vanhu hinkwavu. Hi mhaka leyo, na hina ha tshemba swaku moya wa ku kwetsima wu ta tama wu hi pfuna.

8-9. I mpsini swin’wana leswi nhlengeletanu ya Yehovha yi nga swi yentxa swaku ku chumayeliwa mahungu ya ku tsakisa?

⁸ Nhlengeletanu ya Yehovha yi tirhisa swilo swa kahle swa ku chumayela mahungu ya ku tsakisa. Khale a ku tirhisiwa swilo swa ku fana ni mabuku, Mafotodrama, michini ya ku gravhara, mimovha ni maradiyo. Kambe swoswi se ku tirhisiwa ni makomputadori ni swin’wana  leswi tirhisaka interneti. Naswona nhlengeletanu ya Yehovha yi hundzuluxela swilo hi tirimi ta tinyingi ta ku a ti se tshama ti hundzuluxeliwa. Hi mhaka muni yi yentxa leswo? Hi mhaka yi lava ku pfuna vanhu hinkwavu swaku va djondza mahungu ya ku tsakisa hi lirimi la vona. Leswi Yehovha a kalaka a nga na xikheto, a vule swaku mahungu ya ku tsakisa a ma ta chumayeliwa ka ‘vanhu va matiko hinkwawu, ni va tinxaka hinkwatu, ni va tirimi hinkwatu, ni va swib’ongo hinkwaswu.’ (Nhla. 14:6, 7) Phela o swi lava swaku vanhu hinkwavu va twa mahungu lawa ya ku tsakisa.

⁹ Se hi nga ku yini hi vanhu lava swi karhataka ku nghena ma kaya ka vona hi va chumayela? Leswaku vanhu lava na vona va chumayeliwa, Yehovha a pfune nhlengeletanu ya yena swaku yi chumayela ka tindhawu leti ku hundzaka vanhu hinkwavu. Hi xikombiso, hi 2001 Ntlawa lowu Rhangelaka wu pfumelele swaku mabuku ma vekiwa ka swikarinyana a tikweni la França ni ka tindhawu tin’wana. Leswo swi pfune vanhu va vanyingi. Hi 2011 ku hambiwe kampanya aEstados Unidos ka doropa leli ku nga ni vanhu va vanyingi, aNova York. Hi lembe lin’we ntsena, ku nyikeliwe 102.129 wa mabuku ni 68.911 wa marevhixta. Naswona 4.701 wa vanhu, va kombele ku djondzeliwa Bibele. Phela swa tikomba swaku Yehovha a tirhisa moya wa yena wa ku kwetsima swaku a seketela ntirho lowu. Hi mhaka leyo, Ntlawa lowu Rhangelaka wu pfumelele swaku amisaveni hinkwayu ku chumayeliwa hi ku tirhisa swikarinyana.

10. Hi nga yentxa yini swaku hi yampsisa matirhelo ya hina ansin’wini?

¹⁰ Leswi u faneleke u swi yentxa. Tirhisa leswi Yehovha a hi djondzisaka loko hi li mintlhanganwini swaku u kota ku chumayela kahle. Tirha ni grupu la wena la nsimu nkama ni nkama. Vamakwerhu lava mi nga xikan’we ka grupu la nsimu, va nga ku pfuna swaku u tiva ku chumayela kahle ni ku djondzisa kahle funtshi leswi va swi yentxaka swi ta ku tiyisa. Tama u chumayela hambiloko u kumana ni swikarhatu. Ndzimana leyi nga khoma nhlokomhaka leyi, yi hi khumbukisa swaku lexi hi pfunaka ku yentxa ku rhandza ka Xikwembu a hi ntamu wa hina kambe hi pfuniwa hi moya wa ku kwetsima. (Zak. 4:6) Ha tiyiseka swaku Yehovha a ta hi nyika ntamu hikusa hi yentxa ntirho wa yena.

11. Ntlawa lowu rhangelaka wu swi kotise ku yini swaku vanhu va Xikwembu va tama va twanana aminkameni ya vapostolo?

¹¹ Aminkameni ya vapostolo. Ntlawa lowu rhangelaka lowu a wu li Yerusalema a wu yentxa hinkwaswu swaku swilo swi famba kahle ku tlhela ku va ni ku rhula ka vanhu va Xikwembu. (Mint. 2:42) Hi xikombiso a nkama ku nga pfuka guwa hi mhaka ya ku soka hi lembe la 49, ntlawa lowu rhangelaka wu kambisise mhaka leyi hi ku pfuniwa hi moya wa ku kwetsima. Loko mhaka a yi yo yentxa swaku bandla li yavana, mahungu ya ku tsakisa a ma nga ta chumayeliwa kahle. Hambileswi vapostolo ni madoda ya ntlawa lowu rhanghelaka a va li Vayuda, a va pfumelelanga swaku leswi va nga kulisisiwa xiswona swi nghenelela ka ku tsema mhaka leyi. Ku hambana ni leswo, va kambisise Rito la Xikwembu va tlhela va pfumela ku kongomisiwa hi moya wa xona. (Mint. 15:1, 2, 5-20, 28) Ku game ku yentxeka yini? Yehovha a katekise xiboho xa vona. Ku ve ni ku rhula ni ku twanana naswona va tame va chumayela mahungu ya ku tsakisa. — Mint. 15:30, 31; 16:4, 5.

12. I mpsini leswi kombisaka swaku nhlengeletanu ya Yehovha yi ni ku rhula funtshi swilo swi famba kahle?

¹² Aminkameni ya hina. Nhlengeletanu ya Yehovha yi yentxa hinkwaswu swaku swilo swi famba kahle ku tlhela ku va ni ku rhula. Hi 1895, revhixta la Zion’s Watch Tower and Herald of Christ’s Presence (leli swoswi a nga Murindzi) la 15 ka Novembro, a li ni nhlokomhaka leyi nge: “A Swi Yendliwe Khwatsi Ni Hi Nawu Wakona” leyi nga susiwa ka buku la 1 Vakorinto 14:40. A ku tsaliwe leswi: “Vapostolo va tsale swilo swa swinyingi leswi a swi vulavula hi ku va swilo swi famba khwatsi . . . I swa lisima ku landzela leswi nga tsaliwa hikusa ‘switsaliwile leswaku hidjondza ha swona.’” (Rhom. 15:4) Ni namuntlha, nhlengeletanu ya Yehovha yi yentxa hinkwaswu leswi yi nga swi kotaka swaku swilo swi famba kahle ku tlhela ku va ni ku rhula ku fana ni minkameni ya vapostolo. Hi xikombiso, loko u lava ku vona Djondzo ya Murindzi ka bandla lin’wana kumbe ka tiko lin’wana a wu karhateki hikusa wa swi tiva swaku yi ta fambisisiwa ku yini ni swaku hi yini nhlokomhaka leyi nga ta djondziwa. Phela i moya wa Xikwembu lowu yentxaka swaku leswo swi koteka! — Sof. 3:9.

13. Hi swini swivutiso leswi hi faneleke hi tivutisa swona hi ku ya hi Yakobo 3:17?

 ¹³ Leswi u faneleke u swi yentxa. Yehovha a lava swaku vanhu va yena va ‘hlayisa vun’we’ va tlhela ‘vahanyisana hi kurhula.’ (Efe. 4:1-3) Se tivutisi leswi: ‘Na yentxa swaku ku va ni ku rhula abandleni? Na va yingisa vamakwerhu lava rhangelaka? Na va pfuna van’wana ngopfu ngopfu loko ni ni mintirho abandleni? Na swi rhandza ku fika hi nkama funtshi na va tirhela van’wana?’ (Lerha Yakobo 3:17.) Loko u vona swaku ku ni lomu u faneleke u yampsisa kona, khongela u kombela moya wa ku kwetsima. Loko u pfumelela Yehovha swaku a ku pfuna u txintxa, vamakwerhu abandleni va ta ku rhandza funtshi va ta ku vona na wu li munhu wa lisima.

14. Hi ku ya hi Vakolosa 1:9, 10, Yehovha a va djondzisise ku yini vanhu va yena aminkameni ya vapostolo?

¹⁴ Aminkameni ya vapostolo. Yehovha wa swi rhandza ku djondzisa vanhu va yena. (Pis. 32:8) A lava swaku hi mu tiva, hi mu rhandza hi tlhela hi va vana va yena. Phela swoleswo a swi nga ta koteka loko a a nga hi djondzisi. (Yoh. 17:3) Aminkameni ya vapostolo Yehovha a a tirhisa bandla swaku a djondzisa vanhu va yena. (Lerha Vakolosa 1:9, 10.) Moya wa ku kwetsima lowu Yesu a nga tshembisa vadjondzisiwa va yena swaku a va ta wu kuma, na wona wu va pfunile hintamu. (Yoh. 14:16) Wu va pfunile swaku va twisisa leswi nga tsaliwa ka Bibele ni ku khumbuka swilo hinkwaswu leswi Yesu a nga swi vula ni leswi a nga swi yentxa. Swilo leswi swi game swi tsaliwa ka mabuku ya Matewu, Marka, Luka na Yohane. Wutivi leli li pfune Vakreste va minkameni ya vapostolo swaku va tiya lipfumelweni, va rhandza Xikwembu, N’wana wa xona ni ku tlhela va rhandzana.

15. Yehovha a xi hetisisa ku yini xitshembiso xa yena lexi nga ka Esaya 2:2, 3?

¹⁵ Aminkameni ya hina. Yehovha a vule swaku “axiphen’wini xa masiku yohetelela” vanhu va matiko hinkwawu a va ta ya ka “ntshava” ya  yena swaku va ya djondzisiwa minawu ya yena. (Lerha Esaya 2:2, 3.) Ha ku vona ku hetiseka ka wuprofeta leli swoswi. Phela vanhu va Yehovha va yampsa ku tlula hinkwavu lava nga ka wukhongeli la mavunhwa naswona Yehovha a va djondzisa swilo swa swinyingi leswi nga ka Bibele. (Esa. 25:6) A tirhisa “mutirhi lweyi atshembekeke, ni kutlhariha” swaku a hi djondzisa swilo swa swinyingi hi tindlela ta ku hambanahambana. Hi xikombiso, a hi nyika mabuku, wukaneli ni mavhidiyo. (Mat. 24:45) Hi titwa ku fana na Elihu munghanu wa Yobo, lweyi a nga te: “I mani mudjondzisi lweyi a fanaka [ni Xikwembu]?” — Yobo 36:22.

16. U nga yentxa yini swaku u pfuniwa hi leswi Yehovha a ku djondzisaka swona?

¹⁶ Leswi u nga swi yentxaka. Moya wa Xikwembu wu ta ku pfuna ku tirhisa leswi u nga swi djondza ka Bibele. Khongela ku fana na mupisalema lweyi a nga te: “Oh Yehovha, nidjondzisi ndlela ya wena. Nitafamba antiyisweni wa wena. Yendla mbilu ya mina yiva ni wun’we leswaku yichava vito la wena.” (Pis. 86:11) Hi mhaka leyo, tama u djondza Bibele ni mabuku man’wana lawa nhlengeletanu yi ma humesaka. Phela a xa lisima a hi ku kuma wutivi ntsena kambe i ku tirhisa leswi u swi djondzaka. Moya wa Yehovha wu nga ku pfuna ku yentxa leswo. Kambe na wena u fanele u tiyisa vamakwerhu abandleni. (Hev. 10:24, 25) Hi mhaka muni? Hikusa hinkwerhu hi ndjangu wun’we. Khongela u kombela Yehovha a ku pfuna, u nyikela tinhlamulu leti khumbaka mbilu loko u li mintlhanganwini. Loko u nyikiwa xiyenge, yentxa hinkwaswu leswi u nga swi kotaka swaku u xi yentxa kahle. Loko u yentxa leswo, u ta va u komba Yehovha na Yesu swaku wa va rhandza vamakwerhu. — Yoh. 21:15-17.

17. U nga yentxa yini swaku u kombisa swaku wa yi seketela nhlengeletanu ya Yehovha?

¹⁷ Ku yo sala nkamanyana swaku ku va ni wukhongeli lin’we amisaveni, leli rhangeliwaka hi moya wa Xikwembu. Hi mhaka leyo, tirha hi matimba ni nhlengeletanu ya Yehovha. Kombisa swaku u rhandza vanhu hinkwavu ku fana na Yehovha hi ku chumayela vanhu hinkwavu lava u kumanaka na vona. Tekelela Yehovha hi ku yentxa swaku ku va ni ku rhula naswona yentxa swaku swilo swi famba kahle abandleni. Yingisa Mudjondzisi Lwenkulu hi ku tirhisa swilo hinkwaswu leswi a hi nyikaka swona swaku a hi djondzisa. Phela loko misava ya Sathana yi ta helisiwa a hi nga ha ta chava nchumu. Ku hambana ni leswo, hi ta tiya naswona hina ni vamakwerhu hi ta tama hi tirhela Yehovha hi ku tshembeka.