1-2. Hi mhaka muni minkama yin’wani hi nga ha titwa ingi Yehovha a nga swi hlamuli swikhongelo swa hina?

 A BUKU la Tipisalema 37:4 li li: “Kuma ku tsaka kakukulu ka Yehovha, naswona a ta ku nyika leswi mbilu ya wena yi swi navelaka.” Xitshembiso lexi xi tsakisa ndjhani! Kambe indjhe hi nga nyimela leswaku Yehovha a hi hlamula swikhongelo swa hina hi nkama wun’wani ni wun’wani lowu hi wu lavaka? Hi mhaka muni swi li swinene ku tivutisa xivutiso lexi? Pimisa hi swikombiso leswi: Makwerhu wa xisati wa ku kala a nga chadanga a khongela swaku a ya ka Xikola Xa Vachumayeli Va Mfumu, kambe ku hundza malembe ya manyingi na a nga se vitaniwa. Makwerhu wa xinuna lweyi a nga jovhem a khongelela ku yampsa ka mavabyi ya yena swaku a ta kota ku yendla mintirho ya yinyingi abandleni kambe a mavabyi ya yena a ma yampsi. Vapsali lava va nga Vakreste va khongela swaku a n’wana wa vona a tama a li ka ntiyiso kambe a langa ku nyima ku tirhela Yehovha.

² Swi nga yendleka na wena u khongela u kombela Yehovha swaku a ku nyika nchumu kambe swi nga yendleki leswi u kombelaka swona. Se leswo swi nga ha yendla u pimisa swaku Yehovha wa swi hlamula swikhongelo swa van’wani kambe swa wena a nga swi hlamuli. Kumbe u pimisa swaku ku ni xan’wanchumu xa ku biha lexi u nga xi yendla lexi yendlaka Yehovha a nga xi hlamuli xikhongelo xa wena. Phela leswo swi mu yendlekelile Janice, b yena ni nuna wa yena a va khongela ka Yehovha va kombela swaku a va pfuna kuva va ya tirhela Betele. Makwerhu Janice a vula leswi: “A ni tiyiseka swaku Yehovha a a ta hi pfuna swaku hi ya tirhela Betele kambe ku hundze nkama wa wunyingi na Janice ni nuna wa yena va nga rhambiwanga swaku va ya tirhela Betele.” Yena a tlhele a ku: “Leswo a swi ni tsakisanga nikatsongo naswona a ni sungula ku pimisa swilo swa swinyingi. Se, ni sungule ku tivutisa swaku ‘indjhe ni yo yendla nchumu lexi xi nga mu kwatisa Yehovha?’  Phela a ni khongelile hi ku kongoma ni mu byela swaku a ni navela ku ya tirha aBetele, se hi mhaka muni a nga xi hlamuli xikhongelo xa mina?”

3. Hi ta djondza hi yini ka nhlokomhaka leyi?

³ Minkama yin’wani hi nga ha tivutisa swaku ‘indjhe Yehovha wa swi twa swikhongelo swa hina?’ Phela hambi hi vavanuna van’wani va ku tshembeka va khale va titwise xileswo. (Yobo 30:20; Pis. 22:2; Hab. 1:2) I ntxini xi nga ku kholwisaka swaku Yehovha wa swi twa swikhongelo swa wena? (Pis. 65:2) Swaku hi hlamula xivutiso lexo hi ta rhanga hi ku hlamula swivutiso leswi landzelaka: 1) I mpsini leswi hi nga nyimelaka swaku Yehovha a swi yendla loko hi khongela? 2) I mpsini leswi Yehovha a lavaka swaku hina hi swi yendla? 3) Hi mhaka muni minkama yin’wani swi nga lavaka hi txintxa leswi hi swi khongelelaka, hi khongelela swilo swin’wani?

4. Hi ku ya hi Yeremiya 29:12, i yini leswi Yehovha a hi tshembisaka swona?

⁴ Yehovha a tshembisa ku yingisa swikhongelo swa hina. (Lerha Yeremiya 29:12.) Yehovha wa va rhandza vanhu va yena va ku tshembeka naswona a tinyimisele ku yingisa swikhongelo swa vona. (Pis. 10:17; 37:28) Hambileswo, leswi a swi lavi ku vula leswaku Yehovha a ta hlamula xin’wani ni xin’wani lexi hi mu kombelaka xona. Minkama yin’wani swi ta lava hi nyimela misava ya nyuwani swaku Yehovha a hi nyika leswi hi swi lavaka.

5. I yini leswi Yehovha a pimisaka hi swona na a nga se hlamula swikhongelo swa hina? Tlhamusela.

⁵ Na a nge se hlamula swikhongelo swa hina, Yehovha a rhanga hi ku vona swaku swa fambelana ni xikongomelo xa yena. (Esa. 55:8, 9) Xikongomelo xa Yehovha i ku va vanhu lani misaveni va hanya na va tsakile va tlhela va twanana na va fumiwa hi Mfumu wa yena. Kambe Sathana a vula swaku a vanhu swi ta va fambela kahle loko va tifuma hi xivona. (Gen. 3:1-5) Leswaku Yehovha a kombisa swaku Sathana o hemba, a pfumelele swaku vanhu va fuma vanhu van’wani. Leswo swi yendla swaku ku va ni swikarhatu swa swinyingi lani misaveni swoswi. (Ekl. 8:9) Leswo swi hi yendla hi twisisa swaku Yehovha a nge ngheneleli ka swikarhatu hinkwaswu leswi hi kumanaka na swona swoswi. Phela loko Yehovha a wo yendla leswo, a swi ta yendla swaku vanhu van’wani va pimisa swaku ku fumiwa hi mimfumu ya vanhu swi kahle naswona mimfumu yoleyo yi nga swi kota ku lulamisa swikarhatu leswi vanhu va kumanaka na swona namuntlha.

6. Hi mhaka muni minkama hinkwayu hi fanele hi tiyiseka swaku Yehovha a ta hlamula swikhongelo swa hina hi ndlela yayinene?

⁶ Yehovha a nga hlamula swikombelo swa ku fana hi tindlela ta ku hambana. Hi xikombiso, nkama Hosi Hezekiya a a vabya hintamu a kombele Yehovha swaku a mu pfuna naswona Yehovha a mu hanyisile. (2 Tiho. 20:1-6) Kambe mupostolo Pawulo a kombele Yehovha swaku a mu susa “muntwa ka muzimbha,” a muntwa lowu swi nga yendlela a ku li mavabyi; kambe Yehovha a nga xi susanga xikarhatu lexi. (2 Kor. 12:7-9) Tlhela u pimisa hi xikombiso xa mupostolo Yakobo na Pedru. Hosi Heroda a a lava ku va dlaya. Se, a bandla li khongelile leswaku Yehovha a pfuna Pedru naswona swi nga yendleka va khongelele leswaku a pfuna na Yakobo kambe Yakobo a dlayiwile kuve Pedru hi singita a ponisiwile. (Mint. 12:1-11) Se hi nga ha tivutisa: ‘Hi mhaka muni Yehovha a ponise Pedru kambe Yakobo a dlayiwa?’ Bibele a li vuli, c kambe hi nga tiyiseka swaku tindlela ta Yehovha minkama hinkwayu ti lulamile. (Det. 32:4) Naswona ha swi tiva swaku Yehovha a a mu tsakela Pedru na Yakobo. (Nhla. 21:14) Se, minkama yin’wani Yehovha a nga hlamuli swikhongelo swa hina hi ndlela leyi hina hi yi lavaka. Kambe leswi hi swi tivaka swaku minkama hinkwayu leswi Yehovha a swi yendlaka a swi yendla hi lirhandzu ni ku lulama a hi nga ta khala hi ndlela leyi Yehovha a langaka ku hi hlamula hi yona swikhongelo swa hina. — Yobo 33:13.

7. I mpsini leswi hi kalaka hi nga fanelanga hi swi yendla naswona hi mhaka muni?

 ⁷ Hi fanele hi yendla hinkwaswu leswi hi nga swi kotaka swaku hi nga fananisi xiyimu xa hina ni xa vanhu van’wani. Hi xikombiso, swi nga ha yendleka hi khongela ka Yehovha hi kombela swaku a hi pfuna ka xanchumu hi ku kongoma, kambe hi gama hi nga xi kumi nchumu xolexo. Se hi ku famba ka nkama hi tiva swaku munhu mun’wani a khongelele nchumu xa ku fana ni lexi na hina hi nga xi khongelela funtshi swi tikomba ingaku Yehovha a xi hlamulile xikhongelo xa yena. Phela hi leswo swi nga tshama swi yendlekela makwerhu mun’wani lweyi a vitaniwaka Anna. Yena a khongelele swaku nuna wa yena Matthew, a hanya ka mavabyi ya cancro. Hi nkama wolowo wa wun’we a ku ni vamakwerhu vambirhi va xisati lava va nga guga bandleni lava na vona a va ni mavabyi ya cancro. Anna a khongele hintamu a kombela swaku Matthew, nuna wa yena ku patsa ni vamakwerhu lavayani va hanya ka mavabyi lawa. Vamakwerhu lava va xisati va game va hanya kambe nuna wa yena a file. Ku sunguleni Anna a a tivutisa swaku ‘indjhe vamakwerhu lava va hanye hi mhaka leswi Yehovha a nga va pfuna ke?’ Funtshi loko ku li swaku Yehovha a va pfunile, hi mhaka muni a nga hlamulanga swikhongelo swa Anna nkama a nga kombela swaku nuna wa yena na yena a hanya? I ntiyiso swaku a hi swi tivi swaku i mpsini leswi nga pfuna vamakwerhu lava swaku va hanya, kambe lexi hi xi tivaka hi leswaku Yehovha a lava ku helisa swilo hinkwaswu leswi swi hi yendlaka hi hlupheka funtshi a swi navela hintamu ku pfuxa vanghanu va yena lava se va nga fa. — Yobo 14:15.

8. a) Hi ku ya hi Esaya 43:2, Yehovha a hi pfunisa ku yini? b) Xikhongelo xi nga hi pfunisa ku yini loko hi kumana ni swikarhatu? (Vona vhidiyo leli nge Xikhongelo Xi Hi Pfuna Leswaku Hi Tiyisela.)

⁸ Minkama hinkwayu Yehovha a ta hi pfuna. Leswi a hi rhandzaka, Yehovha a nga swi lavi ku hi vona na hi hlupheka. (Esa. 63:9) Hambileswo, wa swi pfumelela kuva hi kumana ni swikarhatu, leswi Bibele yi swi fanisaka ni minambu ni ndzilu, hileswi swi karhatisaka xiswona. (Lerha Esaya 43:2.) Kambe, a hi tshembisa swaku hi nga swi kota ku swi hlula. Phela hambiloko ho kumana ni swikarhatu swaswikulu hintamu, Yehovha minkama hinkwayu a ta hi pfuna kuva hi tiyisela swikarhatu swoleswo hi tlhela hi tama hi va vanghanu va yena. A tlhela a tirhisa moya wa yena wa ku kwetsima leswaku a hi pfuna ku tiyisela swikarhatu swoleswo. (Luk. 11:13; Filp. 4:13) Phela hi nga tiyiseka swaku minkama hinkwayu Yehovha a ta hi nyika leswi hi swi lavaka leswaku hi tama hi tiyisela hi tlhela hi tshembeka ka yena. d

9. A buku la Yakobe 1:6, 7, li swi kombisa ku yini swaku hi fanele hi tshemba swaku Yehovha a ta hi pfuna?

⁹ Yehovha a lava swaku hi mu tshemba. (Heb. 11:6) Minkama yin’wani swikarhatu swa hina swi nga ha hi peza hintamu lakakuva hi nga ha gwenti. Phela hi nga ha sungula ku pimisa swaku Yehovha a nga hi pfuni. Kambe Bibele la hi tiyisekisa swaku hi ntamu wa Xikwembu hi nga swi kota ku khwela “ka muru wawukulu.” (Pis. 18:29) Se, ku hambana ni ku kanakana swaku Yehovha wa hi pfuna, hi fanele hi khongela na hi ni lipfumelo lalikulu hi tlhela hi tshemba swaku Yehovha a ta swi hlamula swikhongelo swa hina. — Lerha Yakobe 1:6, 7.

10. Nyikela xikombiso lexi kombisaka swaku loko hi yendla xikhongelo hi fanele hi yendla swilo hi ku ya hi ku pfumelelana ni xikhongelo xolexo.

¹⁰ Yehovha a lava swaku hi hanya hi ku pfumelelana ni leswi hi swi kombelaka ka xikhongelo. Hi xikombiso, makwerhu a nga ha kombela Yehovha swaku a mu pfuna kuva a kuma folga antirhweni ka yena leswaku a kota ku ya akongresu. Se, Yehovha a nga xi hlamulisa ku yini xikhongelo lexo? Yehovha a nga ha pfuna makwerhu yelweyo swaku a nga chavi ku ya bula ni patrao wa yena. Kambe na yena makwerhu a fanele a yendla xan’wanchumu; a fanele a ya ka patrao wa yena a ya kombela folga. Phela swi nga ha lava leswaku makwerhu yelweyo a nga kombeli  folga kan’we kambe a kombela makhambi ya manyingi. Funtshi swi nga ha lava a tinyikela kuva a txintxana ni munhu mun’wani hi siku la kongresu. Naswona minkama yin’wani swi nga ha lava leswaku a pfumela ku tsemeliwa muholo wa siku lolelo.

11. Hi mhaka muni hi nga fanelanga hi godola ku byela Yehovha leswi swi hi karhataka?

¹¹ Yehovha a lava swaku hi tama hi khongela hi swilo leswi swi hi karhataka. (1 Tes. 5:17) Leswi Yesu a nga swi vula swi kombisa swaku minkama yin’wani swi nga ha lava hi nyimanyana swaku swikhongelo swa hina swi hlamuliwa. (Luk. 11:9) Hi mhaka leyo u nga godoli, tama u khongela. (Luk. 18:1-7) Loko hi tama hi khongela, hi komba Yehovha swaku leswi hi mu kombelaka swona i swa lisima hintamu ka hina hi tlhela hi kombisa swaku hi ni lipfumelo ka yena naswona ha tshemba swaku a ta hi pfuna.

12. a) Hi xini xivutiso lexi hi faneleke hi tiyendla xona ka mhaka ya xikhongelo naswona hi mhaka muni? b) Hi nga xi kombisa ku yini xihlonipho ka Yehovha loko hi khongela? (Vona kwadru leli nge “ Indjhe Swikhongelo Swa Mina Swi Kombisa Swaku Na Mu Hlonipha Yehovha?”)

¹² Loko hi vona ingi swikhongelo swa hina a swi hlamuliwi, hi nga ha tivutisa swivutiso swinharhu. Xa ku sungula: ‘Indjhe ni khongelela swilo leswi swi nga swinene?’ Minkama yin’wani hi nga ha pimisa swaku ha swi tiva leswi swi nga swinene ka hina kambe leswi hi swi kombelaka ka xikhongelo swi nga yendleka swi nga hi pfuni. Hi nga ha khongela hi kombela Yehovha swaku a lulamisa xikarhatu lexi hi kumanaka na xona hi ndlela yin’we, kuve ku nga ha va ni ndlela ya ku yampsa ya ku xi lunghisa. Naswona swilo swin’wani leswi hi nga swi kombelaka swi nga va swi nga fambisani ni ku rhandza ka Yehovha. (1 Yoh. 5:14) Pimisa hi xikombiso xa vapsali lavayani hi nga bula hi vona ku sunguleni. Vona va kombele Yehovha swaku a pfuna n’wana wa vona swaku a tama a mu tirhela. Leswo swi tikomba ku li xikombelo xaxinene, kambe Yehovha a nge sindzisi munhu swaku a mu tirhela, hikusa yena a lava swaku hinkwerhu ku patsa ni vana va hina hi tilangela ku mu  tirhela. (Det. 10:12, 13; 30:19, 20) Se vapsali a va ta va va kombele Yehovha leswaku a va pfuna va fikelela mbilu ya n’wana wa vona nkama lowu va mu djondzisaka hi yena, leswaku yena hi yexe a mu rhandza Yehovha a tlhela a lava ku va munghanu wa yena. — Swi. 22:6; Efe. 6:4.

13. Hi ku ya hi Vaheberu 4:16, Yehovha a hi pfuna loko swi te yini? Tlhamusela.

¹³ Xivutiso xa wumbirhi lexi hi faneleke hi tivutisa xona hi lexi: ‘Ku nga va swaku i nkama wawunene wa leswaku Yehovha a hlamula xikhongelo xa mina?’ Minkama yin’wani hi nga ha pimisa swaku xikhongelo xa hina xi fanele xi tekela ku hlamuliwa kambe Yehovha a wu tiva kahle nkama wawunene wa ku va a hi pfuna. (Lerha Vaheberu 4:16.) Loko hi nga tekeli ku hlamuliwa hi nga ha tsutsumela ku pimisa swaku nhlamulu ya Yehovha i ‘ihim.’ Kambe nhlamulu ya Yehovha ka xikhongelo xa hina ku nga ha va ‘swoswi a hi wona nkama wawunene wa ku ku nyika nchumu lexi u xi lavaka.’ Hi xikombiso, tlhela u pimisa hi makwerhu wa xinuna lweyi a nga khongelela swaku a dahiwa ka mavabyi ya yena. Loko Yehovha a a yo mu daha hi ndlela ya singita, Sathana a a ta vula swaku makwerhu lweyi a a tama a tirhela Yehovha hileswi Yehovha a nga mu daha. (Yobo 1:9-11; 2:4) Phela, Yehovha se a wu vekile nkama wa ku helisa mavabyi hinkwawu. (Esa. 33:24; Nhla. 21:3, 4) Kambe na wu nga se fika nkama lowu, a hi fanelanga hi nyimela swaku Yehovha a hi daha ka mavabyi ya hina hi ndlela ya singita. Hi mhaka leyo, makwerhu a a ta va a khongelile a kombela Yehovha swaku a mu nyika ntamu ni ku rhula ka mimpimiso swaku a kota ku tiyisela mavabyi ya yena ni ku tama a mu tirhela hi ku tshembeka. — Pis. 29:11.

14. U djondze yini ka xikombiso xa makwerhu Janice?

¹⁴ Tlhela u pimisa hi xikombiso xa Janice, lweyi a nga khongelela ku ya tirha aBetele. Ku hundze 5 wa malembe na a nga se yi tsumbula ndlela leyi Yehovha a nga mu hlamula hi yona xikhongelo xa yena. Yena a te: “Yehovha a tirhise nkama wolowo leswaku a ni djondzisa a tlhela a ni pfuna swaku ni va Mukreste wa ku wupfa. Phela a swa ha lava ni tama ni  kulisa ndlela leyi a ni mu tshemba hi yona Yehovha. A swi lava ni tama ni yi yampsisa djondzo ya mina ya Bibele, naswona a ni lava ku kota ku tshama na ni tsakile, ku nga na mhaka swaku ni ka swiyimu swini.” Hi ku famba ka nkama Janice ni nuna wa yena va rhambiwile swaku va ya va vadjikelezi. Loko a languta ndzhaku Janice a vula leswi: “Yehovha a swi hlamulile swikhongelo swa mina hi ndlela ya ku a ni nga yi nyimelanga. Kambe swi lave nkama leswaku ni vona ndlela ya ku xonga leyi Yehovha a nga hlamula hi yona swikhongelo swa mina. Kambe ni tsakile hintamu hi ku vona lirhandzu la Yehovha.”

15. Hi mhaka muni minkama yin’wani swi li swinene ku mu byela ntsena leswi hi titwisaka xiswona Yehovha? (Vona mafoto.)

¹⁵ Xivutiso xa wunharhu lexi hi faneleke hi tivutisa xona hi lexi: ‘Ni nga khongelela swin’wani?’ I swinene kuva hi khongela hi ku kongoma hi mu byela Yehovha lexi hi xi lavaka kambe minkama yin’wani i swinene kuva hi nga mu byeli hi ku kongoma Yehovha leswi hi swi lavaka leswaku hi mu tshika a yendla ku rhandza ka yena. Pimisa hi makwerhu lwiya wa xisati a khongelaka hi ku ya ka Xikola Xa Vachumayeli Va Mfumu. A swi lava hintamu ku ya ka xikola lexi swaku a ta kota ku tirha lani ku lavekaka hintamu vachumayeli. Kambe nkama lowu a khongelaka a kombela swaku Yehovha a mu pfuna a rhambiwa ka xikola lexi, a nga pfana a khongela a kombela Yehovha swaku a mu pfuna ku kuma tindlela leti a nga yengeselaka ntirho wa yena wa ku chumayela ha tona. (Mint. 16:9, 10) Se, loko a khongelile a nga gama a yendla hinkwaswu leswi a nga swi kotaka swaku a hanya hi ku pfumelelana ni leswi a nga swi kombela ka xikhongelo xa yena hi ku vutisa mudjikelezi swaku hi wani mabandla ya kusuhi lawa ma nga ni xilaveko xa vapfuli va ndlela kumbe a tsalela Betele a vutisa swaku hi kwini lani ku lavekaka hintamu vachumayeli. e

16. Hi nga tiyiseka hi yini?

¹⁶ Hilani se hi nga swi vona hi kona, hi nga tiyiseka swaku Yehovha wa swi hlamula swikhongelo swa hina hi ndlela ya lirhandzu ni ya ku lulama. (Pis. 4:3; Esa. 30:18) Se, minkama yin’wani swi nga yendleka a hi hlamula hi ndlela ya ku kala hi nga yi nyimelanga kambe ha tiyiseka swaku Yehovha a nga ta tshuka a tshika ku hlamula swikhongelo swa hina. Yena wa hi rhandza hintamu naswona a nga ta hi tshika. (Pis. 9:10) Se, tama u mu tshemba “minkama hinkwayu,” hi ku va u mu byela hinkwaswu swi nga ka mbilu ya wena hi xikhongelo. — Pis. 62:8.