1-2. Hi swi tivisa ku yini swaku vito la Yehovha i la lisima ka Yesu?

 VITO la Yehovha i la lisima hintamu ka Yesu, funtshi a ku na mun’wani lweyi a li nyimelelaka kahle vito la Yehovha ku fana na yena. Hilani hi nga swi vona hi kona ka nhlokomhaka leyi nga hundza, Yesu a a tinyimisele hambi hi ku fa leswaku a kombisa swaku Yehovha wa kwetsima ni swaku hinkwaswu leswi a swi yendlaka swi hetisekile. (Mar. 14:36; Heb. 10:7-9) Hi tlhele hi vona swaku loko se ku ta va ku hele 1.000 wa Malembe ya ku fuma ka Yesu, yena a ta tlhelisela wuhosi ka Papayi wa yena hikusa a lava swaku ku dzunisiwa Yehovha ntsena. (1 Ko. 15:26-28) Hinkwaswu leswi Yesu a swi yendlaka kuva a kombisa swaku vito la Yehovha i la lisima, swi kombisa swaku wa mu rhandza hintamu Papayi wa yena.

² Yesu a tile lani misaveni leswaku a djondzisa hi vito la Yehovha. (Yoh. 5:43; 12:13) A yendle swaku vadjondzisiwa va yena va li tiva vito la Papayi wa yena. (Yoh. 17:6, 26) A yendle masingita ya manyingi a tlhela a djondzisa vanhu hi vito la Yehovha. (Yoh. 10:25) Naswona nkama lowu a a khongelela vadjondzisiwa va yena, Yesu a te: “Va vhikeli hi mhaka ya vito la wena”. (Yoh. 17:11) Swi tikomba kahle swaku ka Yesu vito la Yehovha i la lisima hintamu ku tlula hinkwaswu. Se tivutisi: ‘Indjhe swa twala kuva munhu a tivula Mukreste kuve a nga li tivi kumbe ku li tirhisa vito la Papayi wa Yesu?’

3. Hi ta djondza hi yini ka nhlokomhaka leyi?

³ Leswi hi nga Vakreste va ntiyiso, hi tekelela Yesu hi ku va hi rhandza vito la Yehovha hi tlhela hi li hlonipha. (1 Pe. 2:21) Se ka nhlokomhaka leyi, hi ta vona swaku hi mhaka muni Yehovha a nyike vito la yena vanhu lava chumayelaka “mahungu ya ku tsakisa.” (Mat. 24:14) Hi ta tlhela hi vona swaku hi nga yendla  yini kuva hi kombisa leswaku vito la Yehovha i la lisima ka hina ku tlula swilo hinkwaswu.

‘VANHU LAVA NGA TA VITANIWA HI VITO LA YENA’

4. a) Yesu a va byele yini vadjondzisiwa va yena na a nge se tlhela a ya tilweni? b) Hi xini xivutiso lexi hi nga ta xi hlamula swoswi?

⁴ Na Yesu a nga se tlhelela tilweni a byele vadjondzisiwa va yena a ku: “Mi ta yamukela matimba loko moya wa ku kwetsima wu fika henhla ka n’wina, funtshi mi ta va timboni ta mina aYerusalema ni le tikweni hinkwalu la Yudiya ni le Samariya anze amagamu ya misava.” (Min. 1:8) Hi marito lawa Yesu a a lava ku vula swaku vadjondzisiwa va yena a va ta chumayela mahungu ya ku tsakisa ka tindhawu hinkwatu, ku nga li Israyele ntsena; naswona hi ku famba ka nkama vanhu amisaveni hinkwayu a va ta rhambiwa swaku va va vadjondzisiwa va Yesu. (Mat. 28:19, 20) Kambe ku nga va leswaku u swi vonile swaku Yesu a te “mi ta va timboni ta mina”? Se, hi marito lawa indjhe Yesu a a lava ku vula leswaku lava a va ta chumayeliwa a va ta va timboni ta yena ntsena, kumbe a swi ta lava va tiva ni vito la Yehovha? Nhlamulu ya xivutiso lexi yi kumeka ka buku la Mintirho ndzima 15.

5. Vapostolo ni madoda ya Yerusalema va swi kombisise ku yini swaku vanhu hinkwavu va fanele va tiva vito la Yehovha? (Vona mufoto.)

⁵ Hi 49 E.C., vapostolo ni madoda va tlhanganile aYerusalema leswaku va bula hi leswi vanhu lava a va nga li Vayuda, lava a va nga tsemanga nsuvu a va fanele va swi yendla leswaku va va Vakreste. Loko ntlhanganu wu gamile, Yakobe makwavu wa Yesu a te: “[Pedru] a hi byele hi ta ndlela leyi Xikwembu xi nga khumbuka vamatiko hi yona, ni leswaku xi sungule ku tilangela vanhu lava nga ta vitaniwa hi vito la xona xikarhi ka vona.” Kasi i vito la mani leli Yakobe a a vulavula hi lona lani? A game a vula marito ya muprofeta Amosi, a ku: “Swaku vanhu lava nga sala, va ta lava Yehovha hi mbilu hinkwayu, xikan’we ni vanhu va matiko hinkwawu, lava vitaniwaka hi vito la mina, ku vula Yehovha.” (Min. 15:14-18) Marito lawa ma kombisa swaku vadjondzisiwa va nyuwani a va nga ta djondza hi vito la Yehovha ntsena, kambe a va ta tlhela va vitaniwa hi vito la yena. Leswo swi lava ku vula swaku vadjondzisiwa lava na vona a va ta yendla swaku vito leli li tiviwa hi van’wani, naswona a va ta tiviwa hi vito la Yehovha.

6-7. a) Hi mhaka muni Yesu a tile lani misaveni? b) Hi wini nchumu wa lisima hintamu lowu nga yendla Yesu a ta lani misaveni?

 ⁶ Vito leli nge Yesu li vula swaku “Yehovha i Muponisi.” Leswo swa twala hikusa Yehovha a tirhise Yesu leswaku a ponisa vanhu hinkwavu lava nga ni lipfumelo; hi leswo swi nga yendla swaku Yesu a ta lani misaveni a ta nyikela hi wutomi la yena leswaku a ponisa vanhu. (Mat. 20:28) Leswi Yesu se a nga hi fela swi nga koteka swaku hi ponisiwa hi tlhela hi kuma wutomi la ku kala li nga heli. — Yoh. 3:16.

⁷ Kasi hi mhaka muni a swi lava swaku vanhu va ponisiwa? Hi mhaka ya leswi swi nga yendleka ka jardim la Edeni. Hilani hi nga swi vona hi kona ka nhlokomhaka leyi nga hundza, vapsali va hina va ku sungula ku nga Adamu na Evha va tshike ku yingisa Yehovha naswona va luze wutomi la ku kala li nga heli, se hi leswo swi nga yendla Yesu a za a ta lani misaveni. (Gen. 3:6, 24) Kambe a hi leswo ntsena, xa lisima hintamu lexi nga yendla Yesu a ta lani misaveni a ku li kuva a basisa vito la Yehovha ka mavunhwa lawa Sathana a nga li chimisa hi wona. (Gen. 3:4, 5) Se a ku ponisiwa ka vanhu a swi yelana ni ku kwetsimisiwa ka vito la Yehovha. Hi mhaka leyo, a swi fanela kuva a li Yesu a yendlaka leswo hikusa a mu nyimela hi ku helela Yehovha, funtshi a mu tsakise hi ku helela hi leswi a nga swi yendla.

8. I mpsini leswi vadjondzisiwa va Yesu a va fanele va swi yendla?

⁸ Hinkwavu lava a va ta lava ku va vadjondzisiwa va Yesu, ku nga na mhaka swaku i Vayuda kumbe nada, a swi lava va pfumela swaku Yehovha Papayi wa Yesu hi yena a a ta va ponisa. (Yoh. 17:3) Naswona ku fana na Yesu a va ta vitaniwa hi vito la Yehovha. Phela leswaku va ponisiwa a va fanele va swi vona swi li swa lisima ku kwetsimisa vito la Yehovha. (Min. 2:21, 22) Hinkwavu lava a va ta va vadjondzisiwa va Yesu a va fanele va djondza hi Yehovha na Yesu. Se swa twala ku va Yesu a gamese xikhongelo xa yena lexi nga ka Yohani 17 hi ku vula a ku: “Ni va djondzisile vito la wena naswona ni ta tama ni va djondzisa swaku va rhandza van’wani ku fana ni leswi u nga ni rhandzisa swona, ni swaku mina na vona hi twanana.” — Yoh. 17:26.

“N’WINA MI TIMBONI TA MINA”

9. Hi nga swi kombisisa ku yini swaku vito la Yehovha i la lisima ka hina?

⁹ Hi ku ya hi leswi se hi nga swi djondza, valandzeli hinkwavu va Yesu va fanele va kwetsimisa vito la Yehovha. (Mat. 6:9, 10) Vito leli li fanele li va la lisima ka hina ku tlula swilo hinkwaswu, funtshi hi fanele hi swi kombisa leswo hi leswi hi swi yendlaka ka wutomi la hina. Se hi nga yendla yini leswaku hi kwetsimisa vito la Yehovha hi tlhela hi kombisa swaku Sathana i muhembi?

10. I mpsini leswi ku vulavuliwaka hi swona ka Esaya 42 ku ya ka 44? (Esaya 43:9; 44:7-9) (Vona mufoto.)

¹⁰ Buku la Esaya 42 ku ya ka 44 li hi pfuna ku vona leswi hi nga swi yendlaka leswaku hi kwetsimisa vito la Yehovha. Ka tindzima leti, Yehovha a rhamba vanhu ka ntlhanganu, ku fana ni loko a va rhamba swaku va ya tribunali. Ka ntlhanganu wolowo a kombela swaku vanhu hinkwavu lava kalaka va nga mu gandzeli va swi kombisa swaku swikwembu leswi va swi gandzelaka i swa ntiyiso. A tlhela a kombela timboni swaku ti fakaza swaku hikakunene swikwembu swoleswo i swa ntiyiso. Kambe a nga kona ni mun’we lweyi a swi kotaka ku yendla leswo! — Lerha Esaya 43:9; 44:7-9.

11. I yini leswi Yehovha a swi byelaka vanhu va yena ka Esaya 43:10-12?

 ¹¹ Lerha Esaya 43:10-12. Loko a vulavula ni vanhu va yena, Yehovha a li: “N’wina mi timboni ta mina, . . . mina ni Xikwembu.” A gama a va vutisa a ku: “Indjhe xi kona Xikwembu xin’wani handle ka mina?” (Esa. 44:8) I nkateko wawukulu kuva hi hlamula xivutiso lexo, naswona hi nga kombisa swaku ko va Yehovha ntsena Xikwembu xa ntiyiso hi leswi hi swi vulaka ni leswi hi swi yendlaka ka wutomi la hina. Phela vito la Yehovha hi lona li nga tlakuka ku tlula vito lin’wani ni lin’wani; naswona leswi hi swi yendlaka ka wutomi la hina swi nga kombisa swaku impela ha mu rhandza Yehovha naswona hi tshama hi tshembekile ka yena hambiloko Sathana o hi ringa kandjhani. Loko hi yendla leswo, hi ta va na hi pfunisa ka ku kwetsimisa vito la Yehovha.

12. Wuprofeta li nga ka Esaya 40:3, 5 li hetisekise ku yini?

¹² Loko hi kwetsimisa vito la Yehovha hi va hi  tekelela Yesu. Esaya a profete swaku a ku ta va ni munhu lweyi a a ta ‘lunghiselela ndlela ya Yehovha.’ (Esa. 40:3; ntlhamuselo) Wuprofeta leli li hetisekile nkama lowu Yohani Mutsakamisi a nga mu lunghiselela ndlela Yesu, lweyi a nga ta hi vito la Yehovha a tlhela a li djondzisa vanhu van’wani. (Mat. 3:3; Mar. 1:2-4; Luk. 3:3-6) Esaya a tlhele a ku: “Ku phatima ka Yehovha ku ta voneka.” (Esa. 40:5) Wuprofeta leli li hetisekile nkama lowu Yesu a nga ta lani misaveni hikusa yena a mu nyimele hi ku helela Yehovha, ingi hi loko Yehovha a a yo ta hi yexe. — Yoh. 12:45.

13. Hi nga mu tekelelisa ku yini Yesu?

¹³ Ku fana na Yesu, na hina hi Timboni ta Yehovha hikusa hi nyimelela vito la yena. Hi vitaniwa hi vito la Yehovha funtshi hi byela van’wani hi swilo swa ku hlamalisa leswi a swi yendlaka. Kambe xin’wani xi nga hi pfunaka ku va timboni ta kahle i ku vulavula hi swilo hinkwaswu leswi Yesu a nga swi yendla swaku a kwetsimisa vito la Yehovha. (Min. 1:8) Phela a ku na mboni yin’wani leyi nga ke yi nyimelela vito la Yehovha ku fana ni leswi Yesu a nga li nyimelelisa xiswona; naswona hina hi tekelela xikombiso xa yena. (Nhl. 1:5) Se i mpsini swin’wani hi nga swi yendlaka kuva hi kombisa swaku vito la Yehovha i la lisima ka hina?

HI NGA YENDLA YINI KUVA HI KOMBISA SWAKU VITO LA YEHOVHA I LA LISIMA KA HINA?

14. Hi titwisa ku yini hileswi hi vitaniwaka hi vito la Yehovha? (Tipisalema 105:3)

¹⁴ Ha tibuma hileswi hi vitaniwaka hi vito la Yehovha. (Lerha Tipisalema 105:3.) Yehovha a tsaka hintamu loko a hi vona na hi tibuma hileswi hi vitaniwaka hi vito la yena. (Yer. 9:23, 24; 1 Ko. 1:31; 2 Ko. 10:17) I nkateko wawukulu ka hina ku dzunisa vito la Yehovha hi tlhela hi mu nyimelela ka mavunhwa lawa va mu lumbetaka hi wona. A hi fanelanga hi dana ku byela lava hi djondzaka na vona, lava hi tirhaka na vona, vavhizinyu va hina ni van’wani swaku hi Timboni ta Yehovha. Phela Sathana a swi lava hintamu leswaku hi nga va byeli van’wani hi vito leli. (Yer. 11:21; Nhl. 12:17) Hi ku ya hi Sathana ni lava mu seketelaka, vanhu a va nga fanelanga va li tiva kumbe ku li tirhisa vito leli nge Yehovha. (Yer. 23:26, 27) Kambe leswi hi li rhandzaka hintamu vito la Yehovha, hi tama hi li dzunisa masiku hinkwawu. — Ps. 5:11; 89:16.

15. Swi vula yini ku vitana vito la Yehovha?

¹⁵ Hi tama hi vitana vito la Yehovha. (Yuw. 2:32; Rom. 10:13, 14) Ku vitana vito la Yehovha a swo vula ntsena ku li tiva kumbe ku li tirhisa, kambe swi vula ku mu tiva kahle Yehovha, ku tiva wumunhu la yena, ku mu tshemba hi ku helela, ku yingisa minkongomiso ya yena ni ku tlhela hi kombela ku pfuniwa hi yena. (Ps. 20:7; 99:6; 116:4; 145:18) Hina hi djondzisa vanhu hi vito la Yehovha ni wumunhu la yena; hi va pfuna leswaku va txintxa mahanyelo ya vona kuva va tsakisa Yehovha va tlhela va ponisiwa. — Esa. 12:4; Min. 2:21, 38.

16. Hi nga swi kombisisa ku yini swaku Sathana i muhembi?

¹⁶ Hi tinyimisele ku hlupheka hi mhaka vito la Yehovha. (Yak. 5:10, 11) Loko hi tama hi tshembeka ka Yehovha nkama hi kumanaka ni swikarhatu, hi va hi kombisa swaku Sathana i muhembi. Ka nkama wa Yobo, Sathana a vule leswi hi vanhu va Yehovha: “Munhu a ta humesa hinkwaswu leswi a nga na swona swaku a ponisa wutomi la yena.” (Yob. 2:4) Hi marito lawa Sathana a a lava ku vula swaku munhu o tirhela Yehovha ntsena loko swi mu fambela kahle, kambe loko a kumana ni swikarhatu a ta mu tshika Yehovha. Phela Yobo a swi kombisile swaku leswi Sathana a swi vulaka a hi ntiyiso. Se na hina hi ni nkateko wa ku kombisa swaku Sathana i muhembi hi ku kala hi nga mu tshiki Yehovha hambiloko Sathana a hi ringa. Hi nga tiyiseka swaku Yehovha a ta tama a hi hlayisa  a tlhela a hi vhikela hi mhaka ya vito la yena. — Yoh. 17:11.

17. Hi ku ya hi 1 Pedru 2:12, i mpsini swin’wani hi nga swi yendlaka swaku hi dzunisa vito la Yehovha?

¹⁷ Hi dzunisa vito la Yehovha. (Swiv. 30:9; Yer. 7:8-11) Leswi hi nyimelaka Yehovha hi tlhela hi vitaniwa hi vito la yena, leswi hi swi yendlaka swi nga ha dzunisa kumbe swi chimisa vito la yena. (Lerha 1 Pedru 2:12.) Hi lava ku tikarhatela ku dzunisa vito la Yehovha hi leswi hi swi vulaka ni leswi hi swi yendlaka. Se loko hi yendla leswo, hi ta swi kota ku dzunisa vito la Yehovha hambileswi hi kalaka hi nga hetisekanga.

18. Hi nga yendla yini swin’wani kuva hi kombisa swaku vito la Yehovha i la lisima ka hina? (Vona ntlhamuselo.)

¹⁸ Hi li nyika lisima vito la Yehovha ku nga na mhaka leswi van’wani va swi pimisaka hi hina. (Ps. 138:2) Minkama ya yinyingi vanhu a va swi rhandzi ku hi vona na hi yendla ku rhandza ka Yehovha naswona va vulavula swilo swa ku biha hi hina. a Hi swoleswo swi nga yendlekela Yesu! Yena a a tinyimisele ku dlayiwa hi ndlela ya mona ingi hiloko o va xigevenga leswaku a dzunisa vito la Yehovha. “A nga vanga ni mhaka loko a danisiwa” hikusa a a lava ku dzunisa Papayi wa yena Yehovha, ku nga na mhaka leswi van’wani a va swi pimisa hi yena. (Heb. 12:2-4) Phela minkama hinkwayu Yesu a a tinyimisele ku yendla ku rhandza ka Yehovha. — Mat. 26:39.

19. U titwisa ku yini hi ku vitaniwa hi vito la Yehovha naswona hi mhaka muni?

¹⁹ Ha tibuma hileswi hi tirhelaka Yehovha naswona hi swi vona ku li nkateko wawukulu ku vitaniwa Timboni ta yena. Hambiloko vanhu va hi solasola, va hi yeyisa kumbe va hi poyilela hi mhaka ya vito leli, hi ta tama hi tiyisela hikusa vito la Yehovha i la lisima ku tlula leswi vanhu va hi vonisaka xiswona. Ku nga na mhaka minzamu leyi Sathana a yi yendlaka swaku a hi sivela, hi tinyimisele ku tama hi dzunisa vito la Yehovha. Loko hi yendla leswo, ku fana na Yesu hi ta kombisa swaku vito la Yehovha i la lisima hintamu ka hina.