1. U titwisa ku yini hi nyiko ya ku khongela?

 YEHOVHA a hi nyike nyiko ya lisima hintamu, a hi pfumelela swaku hi vulavula na yena hi xikhongelo. Pimisa hi leswi, hi nga chululela Yehovha hinkwaswu leswi hi nga na swona ka timbilu ta hina hi nkama lowu hi wu lavaka ni hi lirimi leli hi li lavaka. Phela hi nga khongela na hi li xibelhela kumbe na hi li djele na hi tshemba swaku a ta hi twa. Hi mu khensa hintamu Yehovha hi mhaka nyiko leyi.

2. Davhida a swi kombise ku yini swaku xikhongelo a xi li xa lisima ka yena?

² Ku khongela a swi li swa lisima hintamu ka Hosi Davhida. Siku lin’wana a yimbelele a ku: “Xikhongelo xa mina a xi fani ni insensu leli nga lunghiseleliwa wena”. (Pis. 141:1, 2) Ka nkama wa Davhida, insensu leli a li tirhisiwa hi vaprista a li lunghiseleliwa kahle. (Ekso. 30:34, 35) Ku va Davhida a vulavule hi insensu, swi kombisa swaku a a lava ku lunghiselela mimpimiso ya yena na a nga se sungula ku vulavula na Yehovha ku fana ni lava a va lunghiselela insensu. Na hina hi lava ku fana na Davhida. Swikhongelo swa hina swi fanele swi tsakisa Yehovha.

3. Hi fanele hi khongelisa ku yini ka Yehovha naswona hi mhaka muni?

³ Xikhongelo xa hina xi fanele xi kombisa swaku ha mu hlonipha Yehovha. Pimisa hi minchumu ya ku hlamalisa leyi nga voniwa hi Esaya, Ezekiyele, Daniyele na Yohani. Hambileswi va nga vona minchumu ya ku hambana, ku ni leswi a swi fana ka leswi va nga swi vona. Hinkwavu va hlaye swaku Yehovha i Hosi ya ku tlakuka. Esaya a “vone Yehovha na a tshame ka xitshamu xa wuhosi xa ku tlakuka, lexi nga henhla”. (Esa. 6:1-3) Ezekiyele a vone Yehovha na a tshame ka nyolo ya yena ya le tilweni funtshi matlhelweni ka yena a ku “phatima ku fana ni arku-iris.” (Ezek. 1:26-28) Daniyele a  vone “Nkulukumba wa Khale” lweyi a a yambale mpahla ya ku basa leyi a yi pfurha ndzilu na wu huma hi ka xitshamu xa yena xa wuhosi. (Dan. 7:9, 10) Yohani a vone Yehovha na a tshame ka xitshamu xa yena xa wuhosi, funtshi a xi rhendzeliwe hi arku-iris la ku fana ni ribye la exmeralda. (Nhla. 4:2-4) Loko hi pimisa hi ku hlamalisa ni ku phatima ka Yehovha hi fanele hi mu khensa hintamu Yehovha hi ku va a hi pfumelela ku vulavula na yena hi xikhongelo. Se hi fanele hi khongelisa ku yini?

4. Hi djondza yini ka marito ya ku sungula ya xikhongelo lexi nga ka Matewu 6:9, 10?

⁴ Lerha Matewu 6:9, 10. Ka Dixkursu la yena la le Nhaveni, Yesu a kombe vadjondzisiwa va yena ndlela ya ku khongela. Nkama a nga ku “mi fanele mi khongelisa xileswi”, ku sungula Yesu a vulavule hi minchumu ya lisima ya ku fambisana ni ku rhandza ka Xikwembu, ku nga ku kwetsimisiwa ka vito la Xikwembu, ku ta ka Mfumu wa Xikwembu, ku helisiwa ka valala va xona ni minkateko leyi nga ta tisiwa hi Mfumu wa Xikwembu lani misaveni. Loko hi khongela hi minchumu leyi, hi kombisa swaku hi lava swaku ku rhandza ka Xikwembu ku yentxeka.

5. Indje swa fanela kuva hi khongela hi timhaka ta hina?

⁵ Ka xikhongelo lexi Yesu a nga xi yentxa, a tlhele a kombisa swaku i swinene kuva hi khongela hi timhaka ta hina. A hlaye swaku hi nga khongela hi kombela Yehovha swaku a hi nyika swakudla, a hi rivalela swidjoho swa hina a tlhela a hi vhikela ka mindzingo ni ka Sathana. (Mat. 6:11-13) Loko hi kombela leswi, hi kombisa swaku ha swi tiva swaku hi yena ntsena a nga hi pfunaka swaku hi kota ku mu tsakisa.

6. Indje swo boha ku tirhisa marito lawa Yesu a nga ma tirhisa nkama a nga khongela? Tlhamusela.

⁶ Yesu a a nga lavi swaku vadjondzisiwa va yena va phindhaphindha marito lawa a nga ma vula nkama a nga va djondzisa ku khongela. Minkama yin’wana loko Yesu a khongela a vule minchumu ya ku hambanahambana, leyi a yi li ya lisima ka nkama wolowo. (Mat. 26:39, 42; Yoh. 17:1-26) Na hina hi nga khongela hi xin’wana ni xin’wana lexi  hi karhataka. Loko hi lava ku yentxa xiboho, hi nga kombela Yehovha swaku a hi nyika wutlharhi ni ku twisisa. (Pis. 119:33, 34) Loko hi nyikiwa ntirho wa ku karhata, hi nga khongela hi kombela Yehovha swaku a hi pfuna ku tiva swaku hi nga wu yentxisa ku yini. (Swi. 2:6) Vapsali va fanele va khongelela vana va vona, na vona vana va fanele va khongelela vapsali va vona. Hinkwerhu hi nga khongelela lava hi djondzaka na vona Bibele ni lava hi va chumayelaka. Phela loko hi khongela a swo lava hi kombela minchumu ntsena, kambe ku ni swin’wana leswi hi faneleke hi swi yentxa.

7. Hi mhaka muni hi fanele hi dzunisa Yehovha nkama lowu hi khongelaka?

⁷ I swa lisima ku dzunisa Yehovha nkama lowu hi khongelaka. Phela swa mu fanela Yehovha ku dzunisiwa. Yehovha i ‘munene naswona a lunghekele ku rivalela’. Yena a ni ‘timpsalu ni ntwelawusiwana, a hlwela ku kwata funtshi a tale hi lirhandzu ni ntiyiso’. (Pis. 86:5, 15) Impela swa mu fanela Yehovha kuva hi mu dzunisa hi mhaka ya leswi a nga swona ni leswi a hi yentxelaka swona.

8. Impsini swin’wana leswi hi nga khensaka Yehovha hi mhaka ya swona? (Tipisalema 104:12-15, 24)

⁸ I swa lisima ku dzunisa Yehovha loko hi khongela, kambe hi fanele hi tlhela hi mu khensa hi hinkwaswu leswi a hi yentxelaka swona. Hi nga mu khensa hi tikori ta ku xonga leti hi ti vonaka ka maflori ni swakudla swa ku nandzika leswi hi tikhorisaka hi swona ni vanghanu va hina. Yehovha a hi nyika hinkwaswu leswi swaku hi tsaka. (Lerha Tipisalema 104:12-15, 24.) Xa lisima hintamu, a hi nyika hinkwaswu leswi hi swi lavaka swaku hi tiyisa lipfumelo la hina ni ntshembo wa hina wa nkama lowu taka.

9. Impsini swi nga hi pfunaka swaku hi khensa Yehovha? (1 Vatesalonika 5:17, 18)

⁹ Minkama yin’wana swi nga hi vevukela ku khohlwa ku khensa Yehovha hi leswi a hi yentxelaka swona. Se hi nga yentxa yini swaku hi nga khohlwi? Hamba lixta la leswi u nga tshama u mu kombela swona Yehovha, se u vona leswi a nga ku hlamulisa xiswona u gama u khongela u mu khensa hi leswi a nga  ku pfuna. (Lerha 1 Vatesalonika 5:17, 18.) Phela swi tsakisa ndjhani loko van’wana va hi khensa! Se, na yena Yehovha wa tsaka loko hi mu khensa hi leswi a nga hlamula swikhongelo swa hina. (Kol. 3:15) Impsini swin’wana leswi hi nga mu khensaka hi swona Yehovha?

10. Hi ku ya hi 1 Pedru 2:21, hi mhaka muni hi fanele hi mu khensa Yehovha hileswi a nga rhumela Yesu misaveni?

¹⁰ Lerha 1 Pedru 2:21. Hi fanele hi khensa Yehovha hileswi a nga rhuma N’wana wa yena Yesu leswaku a ta hi djondzisa. Ku djondza hi Yesu swi ta hi pfuna ku mu tiva kahle Yehovha hi tlhela hi mu tsakisa. Loko hi va ni lipfumelo ka lifu la Yesu, hi ta va vanghanu va vakulu va Yehovha. —  Rom. 5:1.

11. Hi mhaka muni hi fanele hi khongela hi vito la Yesu?

¹¹ Ha mu khensa Yehovha hileswi hi khongelaka ka yena hi ku tirhisa vito la Yesu. Yehovha a tirhisa Yesu swaku a hi nyika leswi hi swi kombelaka. Yehovha a yingisa a tlhela a hlamula swikhongelo leswi hi swi yentxaka hi ku tirhisa vito la Yesu. Yesu a te: “Xin’wana ni xin’wana lexi mi xi kombelaka hi vito la mina ni ta xi yentxa swaku Papayi a ta dzunisiwa hi mhaka ya N’wana.” —  Yoh. 14:13, 14.

12. I yini xin’wana lexi nga hi yentxaka hi khensa Yehovha hi N’wana wa yena?

¹² Yehovha a hi rivalela swidjoho hi mhaka ya leswi Yesu a nga hi fela. Bibele li li Yesu i “muprista wa mukulu . . . naswona a tshame ka voko la xinene ka xitshamu xa Wuhosi xa Xikwembu amatilweni.” (Heb. 8:1) Yesu i “mupfuni . . . lweyi a nga na Papayi”. (1 Yoh. 2:1) Ha mu khensa Yehovha hi leswi a nga hi nyika muprista wa mukulu lweyi a hi twisisaka, a tivaka swikarhatu swa hina a tlhela a “hi kombelela”! (Rom. 8:34; Heb. 4:15) Phela leswi hi nga ni xidjoho, a hi nga ta swi kota ku khongela ka Yehovha loko Yesu a a nga hi felanga. A hi nge swi koti ku mu khensa hi ku helela Yehovha hi mhaka nyiko leyi a nga hi nyika yona, ku nga lifu la N’wana wa yena.

13. Yesu a swi kombisise ku yini swaku wa va rhandza vadjondzisiwa va yena?

¹³ Siku leli Yesu a nga fa hi lona, a hete nkama wa ku leha na a khongelela vadjondzisiwa va yena. A a kombela swaku Papayi wa yena a “va vhikela ka Sathana”. (Yoh. 17:15) Leswo swi kombisa swaku a a va rhandza hintamu. Hambileswi a a swi tiva swaku a ta hluphiwa, a a karhateka hi vadjondzisiwa va yena.

14. Hi nga swi kombisisa ku yini swaku ha va rhandza vamakwerhu?

¹⁴ Hi fanele hi tekelela Yesu, hi ku kala hi nga pimisi ntsena hi leswi hina hi swi lavaka. Kambe minkama hinkwayu hi fanele hi khongelela vamakwerhu. Loko hi yentxa leswo, hi landza nawu wa Yesu wa ku hi rhandzana hi tlhela hi komba Yehovha swaku hi va rhandza hintamu vamakwerhu. (Yoh. 13:34) Phela ku khongelela vamakwerhu va hina a hi ku heta nkama, hikusa Bibele li li: “Xikhongelo xa munhu wa ku lulama xa pfuna hintamu.” —  Yak. 5:16.

15. Hi mhaka muni swi li swa lisima ku khongelela vamakwerhu?

¹⁵ Leswi vamakwerhu va hina va kumanaka ni swikarhatu swa swikulu, hi fanele hi va khongelela. Hi nga kombela Yehovha kuva a va pfuna swaku va tiyisela mavabyi, tindhambhi, tinyimpi, ku hluphiwa ni swikarhatu swin’wana. Hi nga tlhela hi khongelela vamakwerhu lava tinyikelaka swaku va  ya pfuna lava kumanaka ni swikarhatu. Swi nga yentxeka u tiva van’wana lava kumanaka ni swikarhatu swa ku fana ni leswi. Swi ngo yini u vula mavito ya vona nkama lowu u khongelaka? Hi kombisa swaku ha va rhandza vamakwerhu loko hi khongela hi kombela swaku Yehovha a va pfuna ku tiyisela.

16. Hi mhaka muni hi fanele hi khongelela lava nga ni mintirho abandleni?

¹⁶ Phela vamakwerhu lava va nga ni mintirho abandleni va swi khensa hintamu loko van’wana va va khongelela. Mupostolo Pawulo a a swi tiva swaku na yena a a swi lava ku khongeleliwa hi van’wana. A te: “Ni khongeleleni na mina, leswaku Xikwembu xi ni nyika marito ya ku ma vula loko ni pfula nomo, kuva ni kota ku vulavula na ni nga chavi nchumu loko ni twalisa xihundla xa ku kwetsima xa mahungu ya ku tsakisa.” (Efe. 6:19) Ni namuntlha ku ni vamakwerhu va vanyingi lava tirhaka hi matimba swaku va hi pfuna, hi nga va komba swaku ha va rhandza hi ku kombela Yehovha swaku a katekisa ntirho wa vona.

17-18. a) I ka swiyimu swini lani va nga hi kombelaka swaku hi khongela lani ku nga ni vanhu van’wana? b) Impsini leswi hi faneleke hi swi khumbuka loko hi yentxa xikhongelo?

¹⁷ Minkama yin’wana, hi nga ha kombeliwa swaku hi khongela lani ku nga ni vanhu van’wana. Hi xikombiso, makwerhu lweyi a djondzaka Bibele ni munhu mun’wani a nga ha kombela makwerhu lweyi a nga na yena swaku a yentxa xikhongelo. Swi nga yentxeka makwerhu lweyi a nga mu tivi kahle munhu lweyi va djondzaka na yena Bibele. Se, a nga swi vona swi yampsa a khongela loko mi gama ku djondza leswaku a kota ku tiva leswi a nga ta swi vula ka xikhongelo.

¹⁸ Makwerhu a nga ha kombeliwa swaku a khongela ka ntlhanganu wa nsimu kumbe abandleni. Vamakwerhu va fanele va khumbuka swaku hi mhaka muni va li ka ntlhanganu wolowo. A xikhongelo a xi yentxeliwanga ku laya, ku djondzisa hambi ku yentxa switiviso. Ka mintlhanganu ya yinyingi ku vekiwe 5 minutu ntsena swaku ku yimbeleliwa ku tlhela ku yentxiwa xikhongelo.  Se, makwerhu lweyi a khongelaka a nga fanelanga a tatela marito. —  Mat. 6:7.

19. Impsini swi nga ta hi pfuna swaku hi nga djumiwi hi siku la Yehovha?

¹⁹ Xikhongelo xi fanele xi va xa lisima ka wutomi la hina hikusa siku la Yehovha li le kusuhi. Yesu a te: “Kutani tshamani mi rindzile, mi khongela nkama ni nkama swaku mi ta kota ku pona ka swilo leswi hinkwaswu leswi faneleke swi yentxeka”. (Luk. 21:36) Loko hi khongela nkama ni nkama, lipfumelo la hina li ta tiya, funtshi loko hi yentxa leswo siku la Yehovha li nga ta hi djuma.

20. Ku laveka yini swaku swikhongelo swa hina swi fana ni insensu?

²⁰ Hi djondze yini ka nhlokomhaka leyi? Ha wu khensa nkateko lowu hi nga na wona wa ku khongela. Xa lisima hintamu loko hi khongela, i ku vulavula hi timhaka leti fambisanaka ni ku rhandza ka Yehovha. Hi nga ha khensa Yehovha hileswi a nga hi nyika N’wana wa yena, Mfumu wa yena hi tlhela hi khongelela vamakwerhu va hina. Hi nga khohlweni swaku Yehovha a lava leswaku hi khongela hi leswi hina hi swi lavaka ni swaku a hi pfuna kuva lipfumelo la hina li tiya. Loko hi pimisa kahle hi leswi hi nga ta swi vula ka xikhongelo, hi kombisa swaku xona i xa lisima. Marito ya hina ma ta fana ni insensu lowu nun’hwelaka ka Yehovha wu tlhela wu “mu tsakisa.” —  Swi. 15:8.