Yehovha a lava swaku vanhu lava va nga chada va tshama xikan’we wutomi hinkwalu na va tsakile. (Mat. 19:4-6) Loko u lava muchadu wa ku fana ni lowu u nga mu kumisa ku yini munhu wa ku chada na yena? Leswi Yehovha i nga yena a nga hi yentxa, wa swi tiva leswi nga hi yentxaka hi tsaka ka muchadu wa hina. Loko u yingisa minawu leyi a hi nyikaka u ta tsaka. A hi voni yin’wana ya yona.

Ku sungula i swa lisima ku twisisa swaku: “Mbilu yi kanganyisa ngopfu kutlula swilo hinkwaswu naswona ya kayakaya.” (Yer. 17:9) Loko vanhu vambirhi lava va lavaka ku chada va ya va tivana va sungula ku rhandzana, naswona hi ku famba ka nkama va ya va tsakelana hintamu, leswo swi yentxa swaku swi va karhatela ku yentxa swiboho swa swinene. Loko munhu lweyi a lavaka ku chada a rhangisa leswi a titwisaka xiswona, minkama yin’wana a gama a kumana ni swikarhatu. (Swi. 28:26) Hi mhaka leyo a hi swinene kuva vanhu vambirhi va sungula ku byelana leswi va titwisaka xiswona kumbe ku tshembisana minchumu na va nge se tivana kahle.

Swivuriso 22:3 yi li: “Munhu wa ku tlhariha wa tumbela loko a vona nghozi, kambe va ku kala va nga tlharihanga vo tama va ya phambheni va gama va tshovela ku vava.” Hi yini nghozi ya ku tirhisa ma site ya interneti swaku u kuma munhu wa ku chada na yena? Lexi vavisaka hi swaku vanhu van’wana va hembeliwile hi vanhu lava va nga va tiva ka ma site ya interneti, nakambe vanhu van’wana ka interneti va tirhisa mafoto ni mavito ya ku a hi ya vona swaku va kota ku kanganyisa ni ku yivela vanhu van’wana. Minkama yin’wana vahembi volavo va vula swaku i Timboni ta Yehovha.

Vona khombo lin’wana. Ma site man’wana ma tirhisa maprograma ya macomputadori swaku ma yentxa vanhu va pimisa swaku va fanelana, kambe a ku na chumu lexi kombisaka swaku maprograma wolawo ma vula ntiyiso. A hi wutlharhi ku tirhisa maprograma wolawo ya macomputadori swaku u yentxa xiboho xa lisima hintamu xa ku fana ni ku chada, phela a hi nge ma fananisi ni minawu leyi yi nga ka Bibele. — Swi. 1:7; 3:5-7.

Ka Swivuriso 14:15 hi kuma marito lawa ma nge: “Munhu wa ku matha a kholwa marito hinkwawu, kambe lweyi wa ku tlhariha a sungula hi ku pimisa na a nga se yentxa nchumu.” Na u nge se yentxa xiboho xa ku chada ni munhu u fanele u mu tiva kahle, kambe swoleswo a swi koteki hi ku tirhisa interneti. U pimisa swaku ku rhumelana mafoto ni mamensagem swi ta mi yentxa mi tivana kahle? Vanhu van’wana lava a va pimisa swaku  va kume munhu wa ku chada na yena va hlamalile loko se va kumana.

Mutsali mun’wana wa buku la tipisalema a te: “A ni tipatsi ni vanhu va ku hemba; funtshi ni fambela kule ni vanhu lava fihlaka leswi va nga swona.” (Pis. 26:4) Leswaku va ta rhandziwa, vanhu va vanyingi va tirhisa mafoto ni mavito ya ku a hi ya vona ka ma site lawo, va fihla wumunu la vona la ku biha loko va bula ni vanhu van’wana. Hi mhaka leyo hambi munhu a vula swaku i Mboni ya Yehovha i swinene ku tivutisa leswi: Indje a tsakamisiwile? I munhu lweyi a swi rhandzaka ku djondza hi Yehovha? A ni wunghanu la ku tiya na Yehovha? Vamakwerhu a bandleni va mu hlonipha? Kumbe a hi xikombiso xa xinene naswona i ‘munghanu wa ku biha’? (1 Kor. 15:33; 2 Tim. 2:20, 21) Indje a lunghekile ku chada hi ku ya hi minawu ya Bibele? Swaku u tiva minchumu leyi hinkwayu swi nga lava u bula ni makwerhu lweyi a mu tivaka kahle. (Swi. 15:22) I ntiyiso swaku munhu lweyi a tirhelaka Yehovha hi ku tshembeka a nga ta swi lava ku chada ni munhu wa ku kala a nga mu tirheli Yehovha, kumbe ku tipatsa ni munhu wa ku kala a nga li ‘mupfumeli. — 2 Kor. 6:14; 1 Kor. 7:39.

Hi lani hi nga swi vona, ku tirhisa ma site swaku u kuma munhu wa ku chada na yena a hi swinene. Kambe ku ni tindlela tin’wana leti hi nga ti tirhisaka loko hi lava munhu wa ku chada na yena. U nga mu kuma kwini munhu wa munene wa ku chada na yena? Loko swi koteka Timboni ta Yehovha ti tolovela ku kumana a mintlhanganwini, ka makongreso, ka masembleya kumbe ka tindhawu tin’wana.

Loko swi nga koteki ku tlhangana ka tindhawu leto hi mhaka minchumu ya ku fana ni corona vírus, Timboni ta Yehovha ti tlhangana hi ku tirhisa interneti, leswo swi yentxa swaku vamakwerhu lava kalaka va nge se chada va tivana. Ka mintlhanganu yoleyo u nga va twa loko va veka madixkurso, va hlamula kumbe va yentxa minchumu yin’wana leyi kombisaka lipfumelo la vona. (1 Tim. 6:11, 12) Ku tlula leswo swi nga koteka ku bula ni vamakwerhu ka ma salas simultâneas loko mintlhanganu yi hela. Loko u tlhangana ni Timboni ta Yehovha hi ku tirhisa interneti u nga swi kota ku vona swaku munhu lweyi u lavaka ku chada na yena a hanyisanisa ku yini ni vanhu van’wana, naswona leswo swi nga ku pfuna ku vona leswi a nga tshamisa xiswona hikakunene. (1 Ped. 3:4) Hi ku famba ka nkama, loko mi ya mi tivana ku yampsa u ta tsumbula swaku ma fanelana kumbe a mi fanelani.

Loko vanhu lava va lavaka ku chada va tirhisa minawu ya Bibele swi yentxa swaku va va ni wutomi la ku tsakisa loko se va chadile. Leswo swi twanana ni marito ya Swivuriso 18:22 lawa ma nge: “Lweyi a kumaka nsati [kumbe nuna] wa munene, a kume nchumu xa xinene, funtshi a kuma timpsalu ta Yehovha.”