NHLOKOMHAKA YA DJONDZO 4
Yehovha Wa Yi Katekisa Minzamu Ya Hina Ya Ku Va Kona Ka Xitsundzuxu
“Tshamelani ku yentxa leswi leswaku mi ni khumbuka.” — LUK. 22:19.
LISIMU 19 Xilalelo Xa Hosi
LESWI HI NGA TA SWI DJONDZA a
1-2. Hi mhaka muni hi khumbuka lifu la Yesu lembe ni lembe?
KOLUMUYANI ka 2.000 wa malembe lama nga hundza, Yesu Kreste a nyikele hi wutomi la yena leswaku hi ta kota ku va ni wutomi la ku kala li nga heli. Naswona hi siku loleli a nga fa hi lona, a siyele nawu valandzeli va yena leswaku va khumbuka siku leli a nga fa hi lona hi ku tirhisa pawu ni vhinyu. — 1 Kor. 11:23-26.
2 Hi kombisa swaku ha mu rhandza Yesu hi ku khumbuka lifu la yena. (Yoh. 14:15) Hi mhaka leyo, lembe ni lembe hi kombisa ku tlangela ka hina hi ku tinyika nkama leswaku hi khongela hi tlhela hi pimisa hi leswi lifu la yena li vulaka swona ka hina. Naswona hi tlhela hi chumayela ni ku rhamba vanhu swaku va va kona ka siku leli. Hi tlhela hi kombisa ku tlangela ka hina hi ku kala hi nga pfumeleli nchumu swaku xi hi sivela swaku hi va kona ka siku leli.
3. Hi ta vona yini ka nhlokomhaka leyi?
3 Ka nhlokomhaka leyi, hi ta vona 3 wa tindlela leti ha tona valandzeli va Yesu va yendlaka hinkwaswu leswi va swi kotaka swaku va va kona ka Xitsundzuxu: 1) Hi ku khoma Xitsundzuxu hi ndlela leyi Yesu a nga va djondzisa hi yona, 2) hi ku rhamba van’wani leswaku va va kona ka Xitsundzuxu, ni 3) hi ku va kona ka Xitsundzuxu hambiloko va kumana ni swikarhatu.
KU KHOMA XITSUNDZUXU HI NDLELA LEYI YESU A NGA VA DJONDZISA HI YONA
4. I mpsini leswi ku vulavuliwaka hintamu hi swona ka Xitsundzuxu, naswona hi mhaka muni hi nga fanelanga hi tibyela swaku se ha swi tiva? (Luka 22:19, 20)
4 Lembe ni lembe ka siku la Xitsundzuxu, hi vekeliwa dixkursu leli vulavulaka hi lisima la lifu la Yesu Kreste ni ndlela leyi lifu la yena li hakelaka swidjoho swa hina hinkwaswu. Hi tlhela hi vona swaku a pawu ni vhinyu swi fanekisela yini ni leswaku hi vamani lava va nga ni mfanelo ya ku dla pawu ni ku nwa vhinyu. (Lerha Luka 22:19, 20.) Hi tlhela hi pimisa hi minkateko leyi lava nga ta hanya lani misaveni va nga ta yi kuma. (Esa. 35:5, 6; 65:17, 21-23) A hi fanelanga hi tibyela swaku mintiyiso leyi se ha yi tiva. Ku ni vanhu vavanyingi lava va kalaka va nga na mhaka ni leswi Yesu a nga va fela, funtshi a va khumbuki lifu la yena hi ndlela leyi a nga hi djondzisa yona. Hi mhaka muni va yendla leswo?
5. Ndzhaku ka ku ve vapostolo va Yesu va file, vanhu va sungule ku li khumbukisa ku yini lifu la Yesu?
5 Ndzhaku ka ku ve vapostolo va Yesu va file, ku sungule ku nghena Vakreste va mavunhwa ndzeni ka bandla. (Mat. 13:24-27, 37-39) Vona a va “djondzisa tidjondzo ta mavunhwa kuva va tikokela vadjondzisiwa.” (Mint. 20:29, 30) Handle ka ku va djondzisa leswi Bibele li swi vulaka swaku Yesu a fe kan’we ni leswaku lifu la yena li hakela swidjoho swa hina hinkwaswu, va djondzisa mavunhwa ya ku fana ni ya leswaku Yesu lembe ni lembe wa fa. (Heb. 9:27, 28) Vanhu vanyingi va kholwa ka mavunhwa lawa; naswona va tlhangana nkama ni nkama tikerekeni kumbe siku ni siku leswaku va tlangela lifu la Yesu leli vona va li vitanaka: “A Santa Missa.” b Se tikereke tin’wanyani a ku yi vanhu vavanyingi naswona a va li tivi lisima la lifu la Yesu Kreste. Van’wani va nga ha tivutisa swa ku fana ni leswi: ‘Ku nga va swaku lifu la Yesu li nga swi kota ku hakela swidjoho swa hina?’ Hi mhaka muni va tivutisa leswo? Minkama yin’wani hi mhaka leswi va nga djondzisiwa hi vanhu lava va kanakanaka swaku lifu la Yesu li nga rivalela swidjoho swa hina. Valandzeli va Yesu va va pfunise ku yini vanhu van’wani swaku va tiva leswi lifu la Yesu li vulaka swona ni leswi va faneleke va li khumbukisa xiswona?
6. I mpsini leswi ntlawa wa vadjondzi va Bibele wu nga swi twisisa hi lembe la 1872?
6 Hi século 19, ntlawa wa vadjondzi va Bibele lowu a wu rhangeliwa hi Charles Taze Russell wu sungule ku kambisisa Matsalwa. Wona a wu lava ku tiva ntiyiso wa lisima la gandzelo la lifu la Yesu Kreste ni swaku a va fanele va li khumbukisa ku yini. Hi lembe la 1872, va twisise swaku Bibele li vula swaku a lifu la Yesu Kreste li hakela swidjoho swa vanhu hinkwavu naswona nkama va nga tsumbula ntiyiso lowu a va tshamanga na wona kambe va sungule ku wu hangalasa hi ku tirhisa mabuku, majornali ni marevhixta. A va ha nyimanyimanga, hi ku tekelela Vakreste va nkama wa vapostolo, va yo vhela va sungula ku tlhangana kan’we hi lembe swaku va khumbuka lifu la Yesu.
7. Hi pfunekisa ku yini hi leswi ntlawa wa vadjondzi va Bibele wu nga swi yendla?
7 Hi pfunekisa ku yini hi leswi ntlawa lowu wu nga swi yendla? Hi ku pfuniwa hi Yehovha ha wu twisisa ntiyiso mayelana ni gandzelo la nkutsulu ni swaku wu hi khumbisa ku yini. (1 Yoh. 2:1, 2) Ka Bibele hi djondze swaku ku ni ntlawa wawutsongo lowu nga ta kuma wutomi la ku kala li nga heli amatilweni ni xitshungu xaxinyingi lexi nga ta hanya hi masiku ni masiku lani misaveni. Nkama hi kambisisaka leswi Yehovha a hi rhandzisaka xiswona ni ku tlhela hi vona ndlela leyi hi vuyeliwaka hi yona hi gandzelo la lifu la Yesu Kreste hi ya hi titwa kusuhi na Yehovha. (1 Ped. 3:18; 1 Yoh. 4:9) Se, ku fana ni vamakwerhu va nkama lowu nga hundza, hi rhamba vanhu swaku hi khumbuka lifu la Yesu Kreste hi ndlela leyi a yi lavaka.
KU RHAMBA VANHU SWAKU VA VA KONA KA XITSUNDZUXU
U nga yendla yini swaku u yengetela ntirho wa wena wa ku chumayela ka kampanya la ku nyikela xirhambu xa Xitsundzuxu? (Vona maparagrafu 8-10) e
8. I mpsini leswi vanhu va Yehovha va nga swi yendla swaku va rhamba vanhu leswaku va va kona ka Xitsundzuxu? (Vona mufoto.)
8 Se i khale na vanhu va Yehovha va rhambela vanhu swaku va va kona ka Xitsundzuxu. Hi 1881, vamakwerhu aEstados Unidos va rhambiwile swaku va khumbuka lifu la Yesu Kreste akaya ka makwerhu mun’wani aPensilvânia. Ndzhaku ka nkamanyana, bandla lin’wani ni lin’wani se a li tikhomela Xitsundzuxu ka ndhawu ya lona. Hi Março wa 1940, vachumayeli va byeliwe swaku va nga rhamba mun’wani ni mun’wani lweyi a a ta tsakela ku va kona ka Xitsundzuxu xa lifu la Yesu Kreste. Hi 1960, Betele li imprimire swirhambu li swi nyika mabandla. Ku sukela kolanu, ku nyikeliwe swirhambu swaswinyingi. Hi mhaka muni hi tirhisa nkama ni matimba ya hina swaku hi rhambela vanhu swaku va va kona ka siku leli?
9-10. I vamani lava pfunekaka loko hi yendla minzamu ya ku rhamba van’wani swaku va va kona ka Xitsundzuxu? (Yohani 3:16)
9 Xin’wani xa leswi swi hi yendlaka hi rhamba vanhu leswaku va va kona ka Xitsundzuxu hi leswaku hi lava swaku lava va nga ta ya ka Xitsundzuxu hi khambi la ku sungula va tiva ntiyiso mayelana ni leswi Yehovha na Yesu va nga hi yendlela swona. (Lerha Yohani 3:16.) Hi nyimela swaku leswi vona va nga ta swi vona ni ku swi twa ka Xitsundzuxu swi va susumetela ku lava ku tiva Yehovha ni ku lava ku va vatirheli va yena. Kambe ku ni van’wani lava na vona va pfunekaka.
10 Van’wani va lava hi va rhambaka hi lava va nga tshika ku tirhela Yehovha. Hi yendla leswo leswaku hi va khumbukisa swaku Yehovha wa ha va rhandza. Vanyingi va vona va yamukela xirhambu va tlhela va ta naswona hi tsaka swinene hi ku va vona. A ku va va li kona ka Xitsundzuxu swi va khumbukisa ntsaku lowu a va li na wona nkama lowu a va tirhela Yehovha. Pimisa hi xikombiso xa Monica. c Yena a pfumeleliwe ku tlhela a va muchumayeli hi nkama wa corona. Ndzhaku ka Xitsundzuxu xa 2021, yena a te: “Xitsundzuxu lexi xi ve xa ku hlawuleka ka mina. Se ku hundza 20 wa malembe na ni nyime ku tirhela Yehovha, kambe lembe leli ni swi kotile ku chumayela vanhu ni tlhela ni va rhamba swaku va va kona ka Xitsundzuxu. Ni yendle hinkwaswu ni nga swi kota swaku ni rhamba vanhu swaku va va kona ka Xitsundzuxu hikusa na swi khensa leswi Yehovha na Yesu va nga ni yendlela swona.” (Pis. 103:1-4) Ku nga na mhaka swaku lava hi va rhambaka va pfumela kumbe a va pfumeli, hi lava ku tama hi va rhamba swaku va va kona ka Xitsundzuxu na hi khumbuka swaku Yehovha a swi nyika lisima hinkwaswu leswi hi mu yendlelaka swona.
11. Yehovha a yi katekisise ku yini minzamu ya hina ya ku rhamba vanhu swaku va va kona ka Xitsundzuxu? (Hagayi 2:7)
11 Yehovha wa yi katekisa minzamu ya hina ya ku rhamba vanhu swaku va va kona ka Xitsundzuxu. Hi xikombiso hi 2021, hambileswi a swi nga koteki swaku hi kumana ka ndhawu ya yin’we hi mhaka ntungu wa corona, 21.367.603 wa vanhu va ve kona ka Xitsundzuxu xa lifu la Yesu Kreste. Numeru leyo yi yi phindha kambirhi ni hafu numeru ya vanhu lava va nga tshama va va kona ka Xitsundzuxu ka malembe lama nga hundza. I ntiyiso swaku xa lisima ka Yehovha a hi ku tala ka vanhu ka Xitsundzuxu kambe a ni mhaka ni mun’wani ni mun’wani lweyi a nga kona. (Luk. 15:7; 1 Tim. 2:3, 4) Ha tiyiseka swaku Yehovha a tirhisa ntirho lowu hi nga na wona wa ku rhamba vanhu swaku a hi pfuna ku kuma lava nga ni timbilu tatinene. — Lerha Hagayi 2:7.
KU VA KONA KA XITSUNDZUXU HAMBILOKO HI KUMANA NI SWIKARHATU
Yehovha a katekisa minzamu leyi hi yi yendlaka swaku hi va kona ka Xitsundzuxu (Vona maparagrafu 12) f
12. I mpsini leswi swi nga ha yendlaka swaku swi hi karhatela ku va kona ka Xitsundzuxu? (Vona mufoto.)
12 Yesu a profete swaku ka masiku ya magamu a hi ta kumana ni swikarhatu swa ku hambanahambana swa ku fana ni ku nyenyiwa hi maxaka hi mhaka ya vito la yena, ku hluphiwa, tinyimpi, mavabyi ni swin’wani. (Mat. 10:36; Marku 13:9; Luk. 21:10, 11) Minkama yin’wani, swikarhatu leswo swi nga ha hi sivela swaku hi va kona ka Xitsundzuxu xa lifu la Yesu Kreste. I mpsini leswi vamakwerhu va nga swi yendla swaku va hlula swikarhatu leswi naswona Yehovha a va pfunise ku yini?
13. Yehovha a mu katekisise ku yini Artem hileswi a nga tinyimisela a tlhela a yendla hinkwaswu leswaku a khoma Xitsundzuxu nkama na a li djele?
13 Ku pfaleliwa djele. Vamakwerhu lava va nga djele, lava va nga pfaleliwa hi mhaka ya lipfumelo la vona, va yendla hinkwaswu leswi va swi kotaka swaku va va kona ka Xitsundzuxu xa lifu la Kreste. Hi ni xikombiso xa makwerhu Artem. Hi 2020, a a pfaleliwe ka ndhawu leyi a ku tshama 5 wa swib’ochwa ku patsa na yena. Hambileswi a a li djele a yendle minzamu ya ku lavetela swilo leswi a swi ta mu pfuna swaku a khumbuka lifu la Yesu ku patsa ni ku yendla malunghiselelo swaku a tivekela dixkursu ya Xitsundzuxu. Kambe lava a a pfaleliwe na vona a va talisa ku dzaha va tlhela va rhuketela. Se, swaku a kota ku khumbuka lifu la Yesu Kreste a va kombele swaku va nyima ku dzaha ni ku rhuketela ka wora leliya a a ta va na a khumbuka lifu la Yesu Kreste. Yena a a nga swi nyimelanga kambe vona va pfumelile. Artem a te: “Ni tshembise ku bula na vona hi lisima la Xitsundzuxu.” Hambileswi vona a va te a va nga lavi ku twa nchumu hi swona, a nkama va nga mu vona na a tlangela lifu la Yesu Kreste, va mu tate hi swivutiso.
14. Hi yini minzamu yi nga yendliwa swaku ku khomiwa Xitsundzuxu hambileswi a ku ni corona?
14 Ntungu wa corona vírus. Nkama ntungu wa corona wu nga sungula, a swi nga ha ta koteka swaku vanhu va Yehovha va khoma Xitsundzuxu va li ka ndhawu ya yin’we. Kambe leswo a swi va sivelanga swaku va va kona ka Xitsundzuxu. d Mabandla lawa ma nga ka tindhawu leti ku nga ni interneti ma khome Xitsundzuxu hi ku tirhisa videoconferência. Kambe swi li yini hi vanhu lava va nga ka tindhawu leti ti kalaka ti nga na interneti? Ka matiko man’wani ku yendliwe malunghiselelo ya leswaku dixkursu lolelo li humesiwa ka televisão kumbe ka radiyu. Naswona mabetele yamanyingi amisaveni hinkwayu ma gravhare dixkursu la Xitsundzuxu hi tirimi ta ku tlula 500 ti tlhela ti rhumeliwa ka vamakwerhu lava va tshamaka tintlhaveni. Funtshi hi ku tinyiketela vamakwerhu va yendle hinkwaswu swaku va fikisa madixkursu lawa ka vamakwerhu volavo.
15. U djondza yini ka xikombiso xa Sue?
15 Ku kanetiwa hi maxaka. Xin’wani lexi yendlaka swaku van’wani swi va karhatela ku khoma Xitsundzuxu i ku kanetiwa hi maxaka ya vona. Hi ni xikombiso xa Sue lweyi a djondzaka Bibele ni Timboni ta Yehovha. Hi 2021, na ku nge se fika siku la Xitsundzuxu a byele lweyi a a djondza na yena Bibele swaku hileswi a a kanetiwa kaya a a nge te swi kota ku va kona ka Xitsundzuxu. Lweyi a a djondza na yena Bibele a lerhe Luka 22:44, a gama a mu tlhamusela swaku loko hi kumana ni xikarhatu hi fanele hi tekelela xikombiso xa Yesu Kreste ivi hi khongela ka Yehovha hi tlhela hi mu tshemba swaku a ta hi pfuna. Loko ku fike siku la Xitsundzuxu Sue a lunghiselele leswi a a swi lava leswaku a khoma Xitsundzuxu, ximixweni a sixtire tsalwa la siku la Xitsundzuxu ivi ka madlambu ya kona, a nghena kwartu ka yena a sixtira Xitsundzuxu hi ku tirhisa telefoni. Ndzhaku ka leswo, a tsalele lweyi a a djondza na yena Bibele a ku: “U ni tiyise swinene tolo. Naswona namuntlha ni yendle hinkwaswu ni nga swi kota swaku ni khoma Xitsundzuxu xa lifu la Yesu Kreste naswona Yehovha a ni pfunile. Ni tsake swinene naswona na ku khensa!” U pimisa swaku Yehovha a nga ku pfuna loko na wena u kumana ni xikarhatu xa ku fana ni xa Sue?
16. Hi swi tivisa ku yini swaku Yehovha a ta katekisa minzamu ya hina ya ku va kona ka Xitsundzuxu? (Varoma 8:31, 32)
16 Yehovha a yi nyika lisima minzamu leyi hi yi yendlaka swaku hi khumbuka lifu la Yesu Kreste. Hi nga tiyiseka swaku yena a ta hi katekisa loko hi kombisa swaku ha swi tlangela leswi yena a nga hi yendlela swona. (Lerha Varoma 8:31, 32.) Onge hinkwerhu hi nga tinyimisela ku va kona ka Xitsundzuxu xa lembe leli funtshi na Xitsundzuxu xi nge se fika ni loko se xi ta va xi hundzile hi lava ku yengetela ntirho lowu hi mu yendlelaka wona Yehovha.
LISIMU 18 Hali Tlangela Gandzelo la Nkutsulo
a Hi Terça-feira, diya 4 ka Abril wa 2023, vanhu vavanyingi amisaveni hinkwayu va ta tlhangana leswaku va tlangela lifu la Yesu Kreste. Van’wani va lava nga ta va kona ku ta va khambi la ku sungula. Lavan’wani ku ta va vamakwerhu kambe va nga nyima ku tirhela Yehovha. Kasi lavan’wanyani va ta va na va kumane ni swikarhatu swaswinyingi leswaku va kumeka. Ku nga na mhaka swaku u kumana ni swikarhatu swa ku tshamisa ku yini, Yehovha a ta tsaka hi ku va u yendle minzamu ya ku va kona ka siku leli.
b Vakhongeli va kholwa swaku nkama lowu va khumbukaka lifu la Kreste, a pawu ni vhinyu hi ndlela ya ku karhi swi txintxa swi va miri ni ngati ya Yesu. Va pimisa swaku nkama lowu munhu a dlaka pawu ni ku nwa vhinyu, i miri ni ngati ya Yesu swi nyikeliwaka.
c Mavito man’wani ma txintxiwile.
d Tlhela u vona nhlokomhaka leyi nge: “Xitsundzuxu Xa Lifu La Yesu Xa 2021” ka jw.org (hi Xiputukezi).
