DJONDZO 51
U Nga Yentxa Yini Swaku U Tsakisa Yehovha Hi Mavulavulelo Ya Wena?
Yehovha a hi nyike nyiko ya ku hlamalisa ku nga ku vulavula. Indje a ni mhaka ni ndlela leyi hi yi tirhisaka hi yona nyiko leyi? Ina! (Lerha Yakobo 1:26.) Hi nga ma tirhisisa ku yini mavulavulelo ya hina swaku hi tsakisa Yehovha?
1. Hi fanele hi ma tirhisisa ku yini marito ya hina?
Bibele li li: “Tiyisanani mi tlhela mi yakana”. (1 Vatesalonika 5:11) Indje va kona lava u vonaka swaku va lava ku tiyisiwa? U nga yentxa yini swaku u va pfuna? Va byeli swaku i va lisima ka wena. U nga ha va byela leswi u swi rhandzaka ka vona. Indje ku ni ndzimana ya Bibele leyi u nga yi tirhisaka swaku u tiyisa van’wana? Phela ku ni tindzimana ta tinyingi leti u nga ti tirhisaka. Khumbuka swaku leswi u vulavulisaka xiswona swi nga va khumba hintamu vanhu van’wana. Hi mhaka leyo, minkama hinkwayu zama ku vulavula hi ndlela ya yinene ni hi lirhandzu. — Swivuriso 15:1.
2. I mpsini swaku a hi fanelanga hi swi vulavula?
Bibele li li: “Mi nga ha humesi marito ya ku bola ka minomo ya n’wina”. (Lerha Vaefeza 4:29.) Leswo swi vula swaku a hi fanelanga hi rhuketela, hi vulavula nhlambha kumbe marito lawa ma nga ta vavisa van’wana. A hi fanelanga hi hleva ni ku wonha vito la munhu mun’wana. — Lerha Swivuriso 16:28.
3. I mpsini swi nga ta hi pfuna swaku hi vulavula hi ndlela leyi nga ta tiyisa van’wana?
Minkama ya yinyingi leswi hi swi vulavulaka swi kombisa leswi swi nga ka timbilu ta hina ni leswi hi swi pimisaka. (Luka 6:45) Se hi fanele hi zama ku pimisa ntsena hi swilo swa swinene, swa ku lulama, swa ku tenga, swa ku rhandzeka ni leswi ku vulavuliwaka kahle hi swona. (Vafilipiya 4:8) Leswaku hi swi kota kahle ku pimisa hi minchumu leyi, hi fanele hi langa kahle vanghanu va hina ni leswi hi hungataka hi swona. (Swivuriso 13:20) Naswona swi kahle kuva hi rhanga hi ku pimisa na hi nga se vulavula. Pimisa hi leswi van’wana va nga ta titwisa xiswona hi leswi u swi khulumaka. Bibele li li: “Marito lawa ma kalaka ma nga pimisiwanga kahle ma tlhava ku fana ni xipada, kambe lirimi la lava ku tlhariha la daha.” — Swivuriso 12:18.
DJONDZA SWIN’WANA
Djondza ku khuluma hi ndlela leyi nga ta tsakisa Yehovha yi tlhela yi tiyisa vanhu van’wana.
4. Tivoneli ka mavulavulelo ya wena
Minkama yin’wana hi nga ha khuluma minchumu hi gama hi tisola hi yona. (Yakobo 3:2) Lerhani Vagalatiya 5:22, 23, mi gama mi bula hi swivutiso leswi landzelaka:
-
Tindzimana leti, ti vulavula hi swilo leswi nga ku pfunaka swaku u tivonela ka mavulavulelo ya wena. Hi swini swilo leswi a wu ta swi kombela ka Yehovha hi xikhongelo? Swilo leswo swi nga ku pfunisa ku yini?
Lerhani 1 Vakorinto 15:33, mi gama mi bula hi xivutiso lexi landzelaka:
-
Vanghanu lava u va langaka ni leswi u hungataka hi swona swi nga ma khumbisa ku yini mavulavulelo ya wena?
I mpsini swi nga ha yentxaka swaku u va ni mavulavulelo ya ku biha kumbe ya manene?
Lerhani Eklesiasta 3:1, 7, mi gama mi bula hi xivutiso lexi landzelaka:
-
Hi loko swi te yini ku nga vaka wutlharhi ku miyela kumbe ku nyimela nkama wun’wana swaku u vulavula?
5. Vulavula kahle hi vanhu van’wana
Hi nga yentxa yini swaku hi nga vavisi van’wana hi leswi hi swi vulavulaka? Sixtirani VHIDIYO, mi gama mi bula hi swivutiso leswi landzelaka.
-
Ka vhidiyo, hi mhaka muni makwerhu lweyi a a lava ku txintxa leswi a a vulavulisa xiswona hi vanhu van’wana?
-
A yentxe yini swaku a txintxa?
Lerhani Eklesiasta 7:16, mi gama mi bula hi xivutiso lexi landzelaka:
-
Hi fanele hi khumbuka yini loko hi tshuka hi lava ku vulavula ku biha hi vanhu van’wana?
Lerhani Eklesiasta 7:21, 22, mi gama mi bula hi xivutiso lexi landzelaka:
-
Tindzimana leti ta Bibele ti nga ku pfunisa ku yini swaku u nga kwati loko van’wana va vulavula ku biha hi wena?
6. Khuluma hi ndlela ya lirhandzu ni ndjangu wa wena
Yehovha a lava swaku hi vulavula ni ndjangu wa hina hi ndlela ya kahle ni ya lirhandzu. Sixtirani VHIDIYO, mi gama mi bula hi xivutiso lexi landzelaka.
-
I mpsini swi nga ku pfunaka swaku u vulavula hi ndlela ya lirhandzu ni ndjangu wa wena?
Lerhani Vaefeza 4:31, 32, mi gama mi bula hi xivutiso lexi landzelaka:
-
Hi lava ku vulavula hi ndlela leyi nga ta yentxa swaku ndjangu wa hina wu titwa na wu rhandziwa. Hi nga swi yentxisa ku yini leswo?
Yehovha a hlaye swaku a a mu rhandza N’wana wa yena Yesu. Lerhani Matewu 17:5, mi gama mi bula hi xivutiso lexi landzelaka:
-
U nga mu tekelelisa ku yini Yehovha loko u vulavula ni ndjangu wa wena?
Lava tindlela ta ku khensa van’wana hi leswi va swi yentxaka
VAN’WANA VA LI: “Ni vulavula leswi ni swi pimisaka. A hi nandzu wa mina loko van’wana va nga swi rhandzi.”
-
Se wena u li yini? Hi mhaka muni?
LESWI HI NGA SWI DJONDZA
Marito ma ni matimba. Se hi fanele hi tivonela hintamu ka leswi hi swi vulaka, ndlela leyi hi vulavulaka hi yona ni swaku hi fanele hi vulavula loko swi te yini.
Ku kambela leswi hi nga swi djondza
-
U nga va pfunisa ku yini vanhu van’wana hi leswi u vulavulisaka xiswona?
-
I mavulavulelo ya ku tshamisa ku yini lawa u faneleke u tivonela ka wona?
-
I mpsini swi nga ta hi pfuna ku vulavula hi ndlela ya yinene ni hi lirhandzu minkama hinkwayu?
LOKO U LAVA KU TIVA SWIN’WANA
I mpsini swi nga hi pfunaka swaku hi ma tirhisa kahle marito ya hina?
Vona leswi nga ku pfunaka swaku u nga rhuketeli.
“Xana Hakunene Ku Rhuketela Swi Bihile?” (Nhlokomhaka leyi nga ka site la jw.org hi Xitsonga)
Vona leswi nga ku pfunaka swaku u nga hlevi van’wana.
Vona leswi Yehovha a nga mu pfunisa xiswona wanuna mun’wana swaku a tshika ku rhuketela.
