DJONDZO 11

U Nga Yentxa Yini Swaku U Tama U Djondza Bibele

CHAYA

U tshama u lava ku yentxa ntirho kambe u chava hileswi a wu li wukulu? Leswaku swi nga ku karhateli swi nga yentxeka u wu yentxi hi kutsongokutsongo. Leswo swa fana ni loko u lava ku sungula ku djondza Bibele. U nga ha tivutisa u ku: ‘Ni ta sungula hi kwini?’ Ka djondzo leyi, hi ta vona minchumu leyi nga ku pfunaka swaku u tsakela ku lerha ni ku djondza Bibele.

1. Hi mhaka muni hi fanele hi lerha Bibele siku ni siku?

Munhu lweyi a lerhaka Bibele kumbe “nawu wa Yehovha” siku ni siku, a ta va ni wutomi la ku tsakisa. (Lerha Tipisalema 1:1-3.) Sungula hi ku lerha hi nkamanyana wa wutsongo siku ni siku. Leswo swi ta ku yentxa u tolovelana ni Rito la Xikwembu u tlhela u swi tsakela ku lerha Bibele.

2. U nga yentxa yini swaku u pfuneka hi leswi u swi lerhaka?

Leswaku hi pfuneka hi leswi hi swi lerhaka ka Bibele, hi fanele hi nyima hi pimisa hi leswi hi swi lerhaka. (Yoxuwa 1:8) Nkama u lerhaka, tivutisi u ku: ‘Leswi swi ni djondzisa yini hi Yehovha? Ni nga swi tirhisisa ku yini ka wutomi la mina? Ni nga swi tirhisisa ku yini swaku ni pfuna van’wana?’

3. U nga yentxa yini swaku u kuma nkama wa ku lerha Bibele?

Swa ku karhatela ku kuma nkama wa ku lerha Bibele? Ku tala ka hina swa hi karhatela. Zama ku wu ‘tirhisa kahle nkama’ wa wena. (Vaefeza 5:16) U nga yentxa leswo hi ku djondza Bibele hi nkama wa ku fana siku ni siku. Van’wana va lerha Bibele na ka ha li mixo. Van’wana va lerha hi nkama wa ku dla ninhlikanhi. Se van’wana va lerha Bibele nimadlambu na va nge se yetlela. Hi wini nkama lowu nga wunene ka wena?

DJONDZA SWIN’WANA

Vona swaku u nga yentxa yini swaku u tsakela ku lerha Bibele. Vona swaku u nga yi lunghiselelisa ku yini djondzo ya wena ya Bibele.

Ku fana ni leswi hi nga djondzaka ku dla swakudla swa ku hambana, hi nga djondza ku rhandza ku lerha Bibele

4. Tsakela ku lerha Bibele

Swi nga hi karhatela ku sungula ku lerha Bibele. Kambe, hi fanele hi swi ‘navela’ ku fana ni munhu lweyi a navelaka ku ringa swakudla swa nyuwana. Lerhani 1 Pedru 2:2, mi gama mi bula hi swivutiso leswi landzelaka:

U vona swaku loko u lerha Bibele siku ni siku swi ta ku yentxa u tsaka hi leswi u swi lerhaka, u tlhela u navela ku tama u lerha?

Sixtirani VHIDIYO leswaku u vona swaku van’wana va tsakile loko va sungula ku lerha Bibele. Mi gama mi bula hi swivutiso leswi landzelaka.

VHIDIYO: Majovhem Ma Rhandza Ku Djondza Rito La Xikwembu (5:33)

Ka vhidiyo, hi swini swikarhatu leswi majovhem ma nga kumana na swona?
I yini swi nga va pfuna swaku va tama va lerha Bibele?
Va yentxe yini swaku va tama va lerha Bibele?

Leswi nga ku pfunaka swaku u sungula ku lerha Bibele:

Langa Bibele leli kalaka li nga karhati ku li twisisa. Zama ku lerha Bibele la Wuhundzuluxeli La Misava Ya Nyuwani se li kona hi Xichangana ku sukela ka Matewu ku ya ka Nhlawutelo, naswona u nga li kuma la ku helela hi Xitsonga ni Xiputukezi.
Loko u lerha, sungula hi buku leli u vonaka swaku li ta ku yentxa u navela ku lerha swin’wana. Hi xikombiso vona kwadru leli nge: “Sungula Ku Lerha Bibele.”
Tsala leswi u swi lerhaka leswaku u nga swi khohlwi. Leswaku u pfuneka hi ku lerha Bibele, tirhisa kwadru leli nge “Tsala Leswi U Swi Lerhaka” leli kumekaka ka buku loleli.
Tirhisa Aplikativho la JW Library^®. U nga lerha, kumbe ku yingisela Bibele hi ku tirhisa telefone kumbe swin’wana na u li ka ndhawu leyi u yi lavaka.
Tirhisa Swiengetelo swa Bibele — Matsalwa Yo Kwetsima Ya Misava Leyintshwa. Lani u nga ta kuma ma mapa, makwadru, ntlhamuselo wa marito ya Bibele, leswi nga ta ku yentxa u tsakela ku lerha Bibele.

5. Lunghiselela djondzo ya Bibele

Lerhani Tipisalema 119:34, mi gama mi hlamula xivutiso lexi landzelaka:

Hi mhaka muni swi li swinene ku khongela loko u lava ku lerha Bibele kumbe u lava ku lunghiselela djondzo ya Bibele?

U nga pfunekisa ku yini hi djondzo ya wena ya Bibele? Loko u lunghiselela, zama ku yentxa leswi:

Lerha maparagrafu ya ku sungula ya djondzo.
Lerha tindzimana u tlhela u zama ku twisisa swaku ti twananisa ku yini ni djondzo.
Penda tinhlamulu ta swivutiso; leswo swi ta ku pfuna loko u bula ni lweyi u djondzaka na yena.

Indje a wu swi tiva?

Timboni ta Yehovha ti tirhisa ma Bibele ya manyingi ya wuhundzuluxeli la ku hambana. Kambe ti rhandza hintamu Bibele — Matsalwa Yo Kwetsima Ya Misava Leyintshwa hileswi li kalaka li nga karhati ku li twisisa li tlhela li tirhisa vito la Xikwembu. — Vona nhlokomhaka leyi nga ka site la jw.org “Timboni Ta Yehovha Ti Tirhisa Bibele La Ku Hambana?”

VAN’WANA VA LI: “Ku djondza Bibele swa karhata. Mina a ni na nkama.”

U swi vonisa ku yini?

LESWI HI NGA SWI DJONDZA

Swaku u pfuneka hi ku lerha Bibele, tivekeli nkama wa ku lerha, u khongela swaku u twisisa leswi u swi lerhaka, u tlhela u lunghiselela djondzo ya Bibele.