Kuhambana na hina vanhu, loko Yesu angaseta laha misaveni aahanya tilweni tani hi ntsumi. (Yohane 8:23) I xivumbiwa xosungula kuvumbiwa hi Xikwembu, naswona hi yena angapfuneta akuvumbiweni ka swilo leswin’wani hinkwaswu. Yesu hi yena ntsena angavumbiwa hi Yehovha hi kukongoma, hikolaho swatwala leswi avitaniwaka n’wana wa Xikwembu la ‘psaliweke ali yexe.’ (Yohane 1:14) Akuli yena muvulavuleli wa Xikwembu, i hikolaho ka leswo atlhelaka avitaniwa “Ritu.” — Lerha Swivuriso 8:22, 23, 30; Vakolosa 1:15, 16.

Leswaku Yesu ata misaveni, Xikwembu xihundzisele wutomi lakwe ka khwiri la Maria, wansati wa Muyuda lweyi aangasetshama ativana ni wanuna. Hikolaho, Yesu angavanga ni papayi wa nyama. (Luka 1:30-35) Yesu ate misaveni (1) leswaku atadjondzisa ntiyisu hi Xikwembu, (2) ahivekela xikombisu xa ndlela leyi hifaneleke himaha kurhandza ka Xikwembu ha yona hambiloko hikumana ni swikarhatu ni (3) kutanyikela wutomi lakwe lelihetisekeke leswaku liva ‘nkutsulu.’ — Lerha Marka 10:45.

Nkutsulu i nchumu wokarhi lowunyikeliwaka leswaku kuponisiwa munhu kuva angadlayiwi. (Eksoda 21:29, 30) Lifu ni kuguga aswingali makungu ya Xikwembu hi vanhu. Hiswitivisa kuyini? Xikwembu xibyele wanuna wosungula Adamu leswaku loko oyendla leswi Bibele yiswivitanaka ‘xidjoho,’ aatafa. Hikolaho, loko Adamu aanga djohanga, hina ahingatafa nyamuntlha. (Genesa 2:16, 17; 5:5) Hikuya hi Bibele, lifu ‘linghene’ misaveni hi munhu mun’we,  Adamu. Hikolaho, Adamu ahundzisele xidjoho ka vatukulu vakwe ni vuyelo la xona kunga lifu. Hikolaho, hilava nkutsulu leswaku wuhihakelela xikweneti xa lifu lexi hixikumeke ka Adamu. — Lerha Varhoma 5:12; 6:23.

I mani lweyi angahakelaka nkutsulu wolowo leswaku ahiponisa ka lifu? Phela loko hifa, hihakela ntsena minandzu ya swidjoho swa hina. Anga kona munhu lweyi angahetisekangiki angakotaka kuhakela swidjoho swa van’wani. — Lerha Tipisalema 49:7-9.

Kuhambana na hina vanhu, Yesu aahetisekile. Akunga na xivangelo xa kuva afa leswaku ahakela swidjoho swakwe — angasetshama ayendla xidjoho. Hi ndlela leyo, Yesu afe leswaku ahakela swidjoho swa van’wani. Xikwembu xikombe vanhu lirhandzu lelinga pimanisiwiki na nchumu hi kurhumela n’wana wa xona leswaku atahifela; na yena Yesu ahikombe lirhandzu hi kuyingisa Papayi wakwe ni kunyikela wutomi lakwe leswaku ahakela swidjoho swa hina. — Lerha Yohane 3:16; Varhoma 5:18, 19.

Sixtira vhidiyu lelinge Hayini Yesu A File?

Loko ahali laha misaveni, Yesu ahanyise lava vabyaka, apfuxa lavafeke ni kupfuna lava avahlupheka. Hi kumaha leswo aakombisa leswi angataswi endlelaka vanhu lavayingisaka ka nkama lowutaka. (Matewu 15:30, 31; Yohane 5:28) Endzhaku nyana ka loko Yesu afile, Xikwembu ximupfuxile leswaku aya hanya atilweni tani hi munhu wa moya. (1 Petro 3:18) Afike arindza avokweni la xinene la Xikwembu, kufikela loko ximunyika matimba ya kufuma tani hi Hosi ya misava hinkwayu. (Vaheveru 10:12, 13) Swoswi Yesu afuma tani hi Hosi atilweni naswona valandzeli vakwe va karhi vatwalisa mahungu wolaho yotsakisa amisaveni hinkwayu. — Lerha Daniyele 7:13, 14; Marka 13:10.

Kungalikhale, Yesu atatirhisa matimba yakwe tani hi Hosi leswaku ahelisa kuhlupheka hinkwaku ni lavaku vangaka. Hinkwavu lava kombisaka lipfumelo ka Yesu hi kumuyingisa vatatikhorisa hi wutomi amisaveni leyinga paradeyisi. — Lerha Tipisalema 37:9-11.