Yehovha a a lange vayavanyisi ku nga vajuwiji leswaku va hlayisa Vayisrayele. Kambe leswi matiko ya manyingi a ma ni tihosi, Vayisrayele na vona a va lava ku va ni hosi. Vona va fambe va ya kombela Samuwele, kambe yena a a swi vona na swi bihile swaku va kombela hosi. Se a khongele ka Yehovha. Yehovha a te:

— Vanhu lava a va tshiki wena, va tshika mina. Va byeli leswaku va ta va ni hosi kambe hosi leyo yi ta lava swilo swa swinyingi ka vona.

Se Samuwele a hlengelete Vayisrayele a va byela leswi Yehovha a nga mu byele swona. Vona va hlamula va ku:

— A hi na mhaka na swona, hina ho lava ku va ni hosi ntsena.

Yehovha a byele Samuwele swaku a langa wanuna lweyi a a vitaniwa Sawulo leswaku a ta va hosi ya Israyele. Siku lin’wani Sawulo a fambe a ya vonana na Samuwele aRama se Samuwele a chele Sawulo mafurha ka nhloko leswaku a va hosi.

Samuwele a game a vitana Vayisrayele leswaku a va komba hosi ya nyuwani, se Vayisrayele va sungule ku lavetela Sawulo kambe a va nga mu kumi. Wa swi tiva swaku hi mhaka muni? Hikusa yena a a tumbelile, kambe va tame va mu lava anze Samuwele a mu kuma, se a mu teka a mu veka a phambheni ka vanhu. Phela Sawulo a a xonge hintamu a tlhela a leha. Se Samuwele a game a ku:

— Vonani, hi leyi hosi leyi Yehovha a nga yi langa leswaku yi mi fuma.

Vayisrayele a va tsake hintamu nkama va nga tiva leswaku se a va ni hosi. A ku sunguleni Sawulo a a mu yingisa Yehovha a tlhela a yendla hinkwaswu leswi Samuwele a a mu byela swona. Kambe hi ku famba ka nkama a sungule ku kala a nga ha yingisi. Siku lin’wani Sawulo a a lava ku yendlela Yehovha magandzelo, kambe a a nga fanelanga a swi yendla leswo. Lweyi a a fanele a yendla leswo a ku li Samuwele. Phela Samuwele a mu byelile leswaku a mu nyimela kambe Sawulo a nga mu nyimelanga, hi mhaka leyo Samuwele a mu khulumelile a ku:

— A wu mu yingisanga Yehovha, phela a wu nga fanelanga u swi yendla leswo.

Ku nga va leswaku loko se a mu khulumelile Sawulo a nyimile ku kala a nga ha mu yingisi Yehovha? Nada. Hi ku famba ka nkama Sawulo a fambile a ya lwa ni Vaamaleki, kambe Yehovha a mu byelile leswaku a a fanele a dlaya vanhu hinkwavu, hambileswo yena a nga yi dlayanga hosi ya Vaamaleki, leyi a yi vitaniwa Agagi. Yehovha a byele Samuwele a ku:

— Sawulo a nga ha lavi ku tiva nchumu hi mina, funtshi a nga ni yingisi.

Samuwele a kwate hintamu hi leswo lakakuza a ya vulavula na Sawulo. A fike a mu byela leswaku leswi Sawulo a a nga ha mu yingisi Yehovha, Yehovha a a ta veka hosi yin’wani ka ndhawu ya yena. Loko Samuwele a ndzuluke a famba, Sawulo a mu koke hi mpahla lakakuza yi handzuka. Se Samuwele a gama a ku:

 — Yehovha a ta yendla swa ku fana ni leswo hi mfumu wa Israyele ka wena.

Kambe a a ta va mani hosi ya nyuwani ya Israyele? Yehovha a a ta langa munhu lweyi a a ta mu rhandza ni ku mu yingisa.