Vayisrayele va tlhele va sungula ku gandzela swikwembu swa mavunhwa, hi mhaka leyo Yehovha a va tshikile va hluphiwa hi Vafilista. Kambe Vayisrayele van’wani a va rhandza Yehovha. Mun’we wa vona a ku li Manowa. Yena ni nsati wa yena a va nga na vana. Se siku lin’wani ntsumi yi byele nsati wa Manowa yi ku:

— Yehovha a ta ku nyika n’wana lweyi a nga ta ponisa Vayisrayele ka Vafilista, n’wana wa wena a ta va Munaziri.

Wa swi tiva swaku a ku li vamani Vanaziri? A ku li vanhu lava a va gandzela Yehovha hi ndlela ya ku hlawuleka, funtshi a va nga fanelanga va tsema misisi.

Manowa ni nsati wa yena va ve ni n’wana, funtshi vito la yena a ku li Samsoni. Yehovha a yendle swaku Samsoni a va wanuna wa matimba. Phela a a ni ntamu lakakuza siku lin’wani a dlaya nghonyama hi mavoko. Naswona siku lin’wani Samsoni a dlaye 30 wa vavanuna na a li yexe. Se Vafilista a va mu nyenya hintamu naswona a va lava ku mu dlaya. Siku lin’wani niwusiku, Samsoni a a yetlele ka doropa leli a li vitaniwa Gaza, leswi Vafilista a va lava ku mu dlaya va yile ka doropa lolelo va ya mu nyimela anze nimixo. Kambe hi xikarhi ka wusiku Samsoni a tlakule xipfalu xa nyanghwa wa doropa lolelo a xi pakatsa hi makatla anze ka ntshava leyi a yi li kusuhi ni doropa lin’wani.

Vafilista a va godolanga ku lava ku dlaya Samsoni, se va byele Dalila wansati lweyi a a lava ku chada na yena va ku:

— Hina hi lava ku dlaya Samsoni, se loko wo hi byela swaku a wu kuma kwini ntamu lowu a nga na wona hi ta ku nyika male ya yinyingi.

Phela Dalila a a yi lava hintamu male, hi mhaka leyo a pfune Vafilista. Nkama ni nkama a a xengetela Samsoni leswaku a mu byela swaku a a wu kuma kwini ntamu lowu a a li na wona. Ku sunguleni Samsoni a a yala ku mu byela kambe hi wugamu a te:

— Hiswona ni ta ku byela. Mina ni Munaziri naswona a ni fanelanga ni tsemeta misisi, loko no tshuka ni tsemeta misisi a ni nga ha ta va ni ntamu.

Samsoni a swi mu fambelanga kahle hi mhaka ya leswi a nga byela Dalila swaku ntamu wa yena a wu ta hi kwini. Wa swi tiva swaku Dalila a yendle yini?

A suke hi ku tsutsuma a ya byela Vafilista. Loko a vuyile a yetlelise Samsoni ka matsolo ya yena a gama a kombela munhu swaku a mu tsema misisi. Nkama lowu Vafilista va nga dumela Samsoni a zame ku lwa na vona kambe a a nga ha na ntamu. Se Vafilista va khome Samsoni va mu boxa matihlo va mu peta djele.

 Siku lin’wani Vafilista a va tlhanganile swaku va gandzela Dagoni xikwembu xa vona xa mavunhwa. Vona a va huwelela va vula swaku va swi kotile ku peta Samsoni djele hikusa Dagoni a va pfunile. Va nyimise Samsoni xikarhi ka mapilari mambirhi lawa a ma tiyisa tempele ya vona va gama va sungula ku mu hleka. Kambe misisi ya Samsoni se a yi tlhele yi kula. Se Samsoni a khongele ka Yehovha a ku:

— Yehovha, na ku kombela leswaku u tlhela u ni nyika ntamu kan’we ntsena.

Se Samsoni a tlhela a va ni ntamu, a swi kotile ku susumeta mapilari lawa a ma tiyise tempele. Se tempele yi wa henhla ka Vafilista hinkwavu lava a va li lahayani va fa hinkwavu ku patsa na Samsoni.