Yoxuwa 8:1-35
8 Se Yehovha a byela Yoxuwa a ku: “U nga chavi naswona u nga rhurhumeli.+ Teka vavanuna hinkwawu va nyimpi u famba u ya lwa ni doropa la Ayi. Phela hosi ya Ayi, vanhu va yona, doropa ni tiko la kona ni swi nyikele ka mavoko ya wena.+
2 Leswi u nga swi yendla ka Yeriko ni hosi ya kona,+ swi yendli ka hosi ya Ayi ni doropa la kona kambe ka Ayi mi nga titekela tshomba ni swifuyu swa kona. Va tumbeleleni hi ndzhaku ka doropa.”
3 Se Yoxuwa ni masonchwa hinkwawu va ya lwa ni vanhu va Ayi. Yoxuwa a langa 30.000 wa tinhenha, a ti rhuma niwusiku.
4 A ti byela leswi: “Yingisani, mi ta tumbelela vanhu va doropa hi le ndzhaku ka lona. Mi nga yi kule na lona naswona hinkwenu mi fanele mi lungheka.
5 Mina ni vanhu hinkwavu lava nga na mina hi ta tshinela kusuhi ni doropa naswona loko va huma va ta lwa na hina+ ku fana ni le ku sunguleni hi ta baleka.
6 Loko va hi txatxa, hi ta va xenga va huma ka doropa hikusa va ta ku: ‘Va hi baleka ku fana ni le ku sunguleni.’+ Se hi ta va baleka.
7 Kutani mi fanele mi huma lomu mi nga tumbela kona swaku mi teka doropa; Yehovha Xikwembu xa n’wina a ta li nyikela ka n’wina.
8 Hi ku hantlisa loko se mi teke doropa, mi fanele mi li hisa.+ Mi fanele mi yendla leswi Yehovha a nga mi byela swona. Phela se ni mi byelile leswi mi faneleke mi swi yendla.”
9 Kutani Yoxuwa a va byela swaku va famba lomu a va ta tumbela kona; va fika va tumbela xikarhi ka doropa la Betele ni wupeladlambu la doropa la Ayi, kambe Yoxuwa a a sale ni vanhu lavan’wani ka wusiku lolelo.
10 Nkama Yoxuwa a nga pfuka nimpundzu swinene a hlengelete masonchwa, se yena ni madoda ya Israyele va rhangela vanhu volavo va ya Ayi.
11 Vavanuna hinkwavu va nyimpi+ lava a va li na yena va famba va ya phambheni ka doropa, va fika va gwimba matende a norte* ka doropa la Ayi, lomu a ku ni nkova xikarhi ka vona ni doropa.
12 Hi nkama wolowo, a lange kolomuyani ka 5.000 wa vavanuna a va veka va tumbela+ xikarhi ka doropa la Betele+ ni wupeladlambu la doropa la Ayi.
13 Se vanhu lava lumbaka ntlawa wawukulu va ya tshama a norte ka doropa+ kasi varindzi va ya tshama awupeladlambu ka doropa.+ Naswona hi wusiku lolelo Yoxuwa a ye xikarhi ka nkova.
14 Hi ku hantlisa loko hosi ya Ayi yi vona leswi, yona ni vavanuna va doropa va yo vhela va ba mpundzu swaku va ya lwa ni Vayisrayele ka ndhawu leyi a yi txuvukane ni mananga. Kambe a yi nga swi tivi swaku a ku ni lava a va yi tumbelelile ndzhaku ka doropa.
15 Loko vavanuna va Ayi va nga sungula ku va hlasela, Yoxuwa ni Vayisrayele hinkwavu va balekile hi ndlela ya le mananga.+
16 Kutani vanhu hinkwavu lava a va li ka doropa va vitaniwa swaku va va txatxa; se Yoxuwa a va xenga va huma phakati ka doropa nkama a va va txatxa.
17 A ku salanga munhu ni mun’we aAyi ni le Betele lweyi a kalaka a nga humanga a txatxa Vayisrayele. Va siye doropa na li yo mphaa va txatxa Vayisrayele.
18 Kutani Yehovha a byela Yoxuwa a ku: “Tlakusa tlharhi leli u nga li khoma u kombetela doropa la Ayi,+ hikusa ni ta li nyikela ka mavoko ya wena.”+ Se Yoxuwa a vhela a kombetela doropa hi tlharhi.
19 Nkama a nga tlakusa voko, vavanuna lava a va tumbelile va huma hi ku hantlisa lomu a va tumbele kona, va tsutsuma va nghena ka doropa va li teka va gama va li hisa hi ndzilu hi ku hantlisa.+
20 Nkama vanhu va Ayi va nga txuvuka ndzhaku, va vone ximusi na xi tuvika ka doropa, se va hela ntamu naswona a va ha kotanga ku baleka va ya ndhawu. Kutani vanhu lava a va baleka va ya mananga va djika va va txatxa.
21 A nkama Yoxuwa ni Vayisrayele hinkwavu va nga vona swaku vanhu lava a va tumbelile va teke doropa, va tlhela va vona ximusi na xi tuvika ka doropa, va djika va hlasela vanhu va Ayi.
22 Kutani vanhu lavan’wani va huma doropeni swaku va ya tlhangana na vona, va za vanhu va Ayi va tikuma na va phasekile xikarhi ka Vayisrayele, van’wani ka tlhelo leli kasi van’wani ka tlhelo lelin’wanyani. Va va dlayetela anze ku nga ha sali munhu lweyi a nga pona kumbe lweyi a nga baleka.+
23 Kambe va khome hosi ya Ayi+ va yi yisa ka Yoxuwa na ya ha hanya.
24 Nkama Vayisrayele va nga gama ku dlaya vanhu hinkwavu va doropa la Ayi akhwatini, amananga lomu a va va txatxa kona, naswona na va dlaye hinkwavu hi xipada, Vayisrayele hinkwavu va tlhelele Ayi va ya dlaya vanhu lava va nga sala.
25 Hinkwavu va dlayiwe hi siku lolelo, ku sukela ka wanuna ku ya ka wansati a va li 12.000 wa vona.
26 Yoxuwa a tame a tlakusa voko la yena leli a a khome tlharhi+ hi lona anze vanhu hinkwavu va doropa la Ayi va helisiwa.+
27 Kambe Vayisrayele va titekele swifuyu ni tshomba la doropa, hi ku landza leswi Yehovha a nga byela Yoxuwa.+
28 Yoxuwa a hisa doropa la Ayi li sala li hohlokile; la ha tshamise swoleswo+ ni namuntlha.
29 Yoxuwa a dlaye hosi ya Ayi a gama a yi hayeka ka mhandzi anze li pela, se loko li pelile, Yoxuwa a byela vanhu swaku va hawula ntsumbu wa yona amhandzini.+ Se va wu txukumeta ka nyanghwa wa doropa va gama va wu mbhonya hi xidulu xa maribye, naswona maribye lawa ma ha li kona ni namuntlha.
30 Lowu hi wona nkama lowu Yoxuwa a nga yakela Yehovha Xikwembu xa Israyele altari, ka Ntshava ya Ebali,+
31 a yendle leswi Moxe mutirheli wa Yehovha a nga byela Vayisrayele ni hi ku landza leswi nga tsaliwa ka buku la Nawu+ wa Moxe: “Yakani altari hi maribye ya ku a ma se tshama ma tsemiwa.”+ Se va yendlela Yehovha magandzelo ya ku hisiwa ni ya ku kombela ku rhula ka yona.+
32 Se a tsala ka maribye wolawo marito ya Nawu+ lowu Muxe a a wu tsalele Vayisrayele.+
33 Vayisrayele hinkwavu, madoda ya vona, varhangeli ni vayavanyisi va vona a va nyime matlhelweni ka Areka phambheni ka vaprista lava nga Valevhi lava a va rhwale areka ya ntwananu wa Yehovha. A ku ni Vayisrayele ni vanhu va matiko man’wani.+ Hafu ya vona a yi nyime phambheni ka Ntshava ya Jerzimi kasi hafu leyin’wani a yi nyime phambheni ka Ntshava ya Ebali+ (va yendle leswi Moxe mutirheli wa Yehovha a nga va byela swona),+ leswaku Vayisrayele va ta katekisiwa.
34 Yoxuwa a gama a lerha marito hinkwawu ya Nawu+ hi rito la ku twala, minkateko+ ni makhombo,+ hi ku landza swilo hinkwaswu leswi nga tsaliwa ka buku la Nawu.
35 A ku na rito ni lin’we ka marito hinkwawu lawa Moxe a nga ma byela Yoxuwa, leli Yoxuwa a kalaka a nga li lerhanga phambheni ka Vayisrayele hinkwavu,+ ku patsa ni vavasati, vana ni vanhu va matiko man’wani+ lava a va tshama na vona.+
Tinhlamunselu ta le hansi
^ Kumbe: “n’walungu”.
