Vaheberu 4:1-16
4 Hi mhaka leyo, leswi xitshembiso xa ku nghena ku humuleni ka xona xi nga kona ku ta fikela swoswi, a hi tivoneleni swaku mun’wani wa n’wina a nga tshuki a tsandzeka ku fika kona.+
2 Hikusa na hina hi chumayeliwe mahungu ya ku tsakisa ku fana na vona;+ kambe rito leli va nga li twa a li va pfunanga hi nchumu, hikusa a va nga na lipfumelo la ku fana ni la lava nga yingisa.
3 Hikusa hina hi nga kombisa lipfumelo ha nghena ku humuleni ka xona, hilaha xi nga vula xi ku: “Kutani ni fungile na ni kwatile ni ku: ‘A va nge ngheni ku humuleni ka mina,’”+ hambileswi mintirho ya xona a yi hetisekile* ku sukela misava yi va kona.+
4 Hikusa ka ndhawu yin’wani xi vule leswi hi siku la wu 7: “Kutani Xikwembu xi humula ka ntirho wa xona hinkwawu hi siku la wu 7,”+
5 naswona ka ndhawu yin’wani xi li: “A va nge ngheni ku humuleni ka mina.”+
6 Kutani leswi ku chotaka van’wani leswaku va nghena kona, naswona lava nga rhanga va byeliwa mahungu ya ku tsakisa va kalaka va nga nghenanga hi mhaka ya ku kala ku yingisa,+
7 xi tlhela xi veka siku lin’wani ka pisalema ya Davhida loko se ku hundze nkama wa ku leha swinene, xi ku: “Namuntlha”; hilani swi nga vuliwa hi kona hala henhla: “Loko namuntlha mi yingisa rito la yena, mi nga tlanyaliseni timbilu ta n’wina.”+
8 Hikusa loko Yoxuwa+ a a va yise ka ndhawu ya ku humula ka yona, Xikwembu a xi ta va xi nga gamanga xi vulavula hi siku lin’wani.
9 Kutani vanhu va Xikwembu va saleliwe hi savata ya ku humula.+
10 Hikusa munhu lweyi a nga nghena ku humuleni ka Xikwembu na yena a humulile ka mintirho ya yena, ku fana ni leswi Xikwembu na xona xi nga humula ka mintirho ya xona.+
11 Kutani a hi zameni hi matimba leswaku hi nghena ku humuleni koloko, leswaku ku nga vi ni munhu lweyi a waka a gama a landzela xikombiso xa ku fana ni xa lava kalaka va nga yingisi.+
12 Hikusa rito la Xikwembu la hanya naswona li ni ntamu,+ li lotiwe ku tlula xipada xin’wani ni xin’wani lexi tsemaka hi matlhelo mambirhi,+ li tlhava li nghena ndzeni ka munhu li za li kombisa leswi munhu a nga swona hi le ndzeni ni le handle, li nghena ka marhambu* ni le ndzenindzeni ka wona* naswona la swi kota ku twisisa mimpimiso ni maplanu* ya mbilu.
13 A ku na nchumu lexi nga tumbuluxiwa lexi nga fihleka ka Xikwembu,+ kambe swilo hinkwaswu swi yo dlaa, swa voneka ka matihlo ya lweyi hi faneleke hi tihlamulela ka yena.+
14 Se leswi hi nga ni muprista wamukulu swinene lweyi a nga tsemakanya matilo, ku nga Yesu N’wana wa Xikwembu,+ a hi tameni hi vulavula hi lipfumelo leli hi nga na lona ka yena.+
15 Hikusa muprista wamukulu lweyi hi nga na yena a nge tsandzeki ku hi twela wusiwana ka ku tsana ka hina,+ hikusa a ringiwile hi tindlela hinkwatu ku fana na hina kambe a nga djohanga.+
16 Kutani a hi tshineleni kusuhi ni xitshamu xa wuhosi xa timpsalu tatikulu naswona hi khongela ka Xikwembu na hi chunsekile,+ leswaku hi ta kuma wunene ni timpsalu tatikulu, leswi nga ta hi pfuna loko hi lava ku pfuniwa.
Tinhlamunselu ta le hansi
^ Kumbe: “helelile”.
^ Hi Xigriki: “lomu marhambu ma tlhanganaka kona”.
^ Hi Xigriki: “mongo”.
^ Kumbe: “makungu”.
