Nhlawutelo ya Yohani 12:1-17
12 Se ku humelela nchumu wa ku hlamalisa swinene atilweni: Wansati+ a a yambale dlambu naswona hansi ka minkondzo ya yena a ku ni n’weti, kasi ka nhloko ya yena a a ni harhi* ya 12 wa tinyeleti,
2 wansati lweyi a a ni nyimba. A a rila hintamu hileswi a a twa ku vava hikusa a a li kusuhi ni ku psala.*
3 Ku tlhele ku humelela nchumu wun’wani wa ku hlamalisa atilweni. Dragona* yayikulu ya ku pshuka,+ leyi nga ni 7 wa tinhloko ni 10 wa timhondzo. Ka tinhloko ta yona a ku ni 7 wa tiharhi;*
4 ntxila wa yona wu koke hafu yayitsongo* ya tinyeleti+ ta le tilweni, kutani yi ti txukumetela misaveni.+ Se dragona yi nyima mahlweni ka wansati+ lweyi a a li kusuhi ni ku psala, leswaku loko a gama ku psala, yi ta minta n’wana wa yena.
5 Kutani wansati a psala n’wana+ wa djaha, lweyi a nga ta risa matiko hinkwawu hi nhonga ya nsimbi.+ Se n’wana lweyi a hantla a yisiwa ka Xikwembu ni ka xitshamu xa xona xa wuhosi.
6 Kutani wansati a baleka a ya mananga, lomu Xikwembu xi nga mu lunghiselela ndhawu kona, lomu a a ta phameliwa ku ringana 1.260 wa masiku.+
7 Se ku pfuka nyimpi tilweni: Mikayele*+ ni tintsumi ta yena va lwa ni dragona leyi na yona a yi ni tintsumi ta yona
8 kambe dragona ni tintsumi ta yona va hluliwile naswona a va ha pfumeleliwanga ku tshama tilweni.
9 Se dragona+ leyi, ku nga nyoka ya khale,+ leyi vitaniwaka Davulosi+ na Sathana,+ leyi kanganyisaka misava hinkwayu,+ yi txukumeteliwa hansi misaveni+ yona ni tintsumi ta yona.
10 Kutani ni twa rito lalikulu tilweni li ku:
“Swoswi, a ku ponisa+ ni matimba ni Mfumu wa Xikwembu xa hina+ ni wuhosi la Kreste wa xona se swa tirha, hikusa lweyi a lumbetaka vamakwerhu a txukumetiwe misaveni, yena lweyi a va lumbetaka wusiku ni nhlikanhi phambheni ka Xikwembu xa hina!+
11 Va mu hlule+ hi ngati ya Xinyempfani+ ni hi wumboni leli va nga li nyikela+ naswona a va titsetselelanga+ hambiloko va kumana ni lifu.
12 Hi mhaka leyo, tsakani n’wina matilo na n’wina lava tshamaka ka wona! Khombo ka misava ni lwandle,+ hikusa Davulosi a xikele n’wina na kwatile hintamu, hikusa wa swi tiva swaku a ni nkama wawutsongo.”+
13 Loko dragona yi vona leswaku yi txukumeteliwe misaveni,+ yi sungule ku hlupha wansati+ lweyi a nga psala n’wana wa djaha.
14 Kambe wansati lweyi a nyikiwe timpapa timbirhi ta gama* lalikulu,+ leswaku a ta haha a ya ka ndhawu ya yena leyi nga mananga, lomu a nga ta phameliwa kona ku ringana nkama wun’we ni minkama yimbirhi ni hafu ya nkama*+ na a li kule ni nyoka.+
15 Se nyoka yi hlanta mati ndzhaku ka wansati lawa a ma talile ku fana ni nambu leswaku wansati a ta mbombomela.
16 Kambe misava yi mu pfunile wansati, hi ku pfula nomo wa yona yi minta mati lama nga hlantiwa hi dragona.
17 Kutani dragona yi kwatela wansati, se yi suka yi ya lwa ni vana* va yena lava nga sala,+ lava yingisaka minawu ya Xikwembu naswona va nga ni ntirho wa ku nyikela wumboni hi ta Yesu.+
Tinhlamunselu ta le hansi
^ Kumbe: “korowa”.
^ Kumbe: “veleka.”
^ Ku nga muxaka wa xiharhi xaxikulu xa ku fana ni nyoka.
^ Kumbe: “makorowa.”
^ Hi Xigriki: “1/3” (xikhemu xin’we ka swinharhu).
^ Leswi vulaka “I Mani Lweyi A Fanaka Ni Xikwembu?”
^ Ku nga muxaka wa xinyanyani.
^ Ku nga minkama yinharhu ni hafu.
^ Hi Xigriki: “mbewu”.
