Mahungu Ya Ku Tsakisa Ya Ku Tsaliwa Hi Matewu 14:1-36
14 Ka nkama wolowo, Heroda, govhernadori wa dixtritu la Galileya, a twa ndhuma ya Yesu,+
2 kutani a byela vatirhi va yena a ku: “Lweyi i Yohani Mutsakamisi, a pfuxiwile ka lava nga fa; hi yona mhaka leyi a yendlaka masingita lawa.”+
3 Heroda* a a khome Yohani a mu boha hi machini, a mu peta djele hi mhaka ya Herodiya nsati wa Filipi makwavu wa Heroda,+
4 hikusa Yohani a a tshamela ku byela Heroda a ku: “Swa yila kuva u mu chada.”+
5 Kambe hambileswi a a lava ku mu dlaya, a a chava vanhu hikusa a va mu vona a li muprofeta.+
6 Kambe siku leli a ku kulungeliwa ku psaliwa ka Heroda,+ n’wana wa xisati wa Herodiya a txinile ka fexta lolelo, se Heroda a tsaka hintamu+
7 a za a funga swaku a ta mu nyika xin’wani ni xin’wani lexi a nga ta xi kombela.
8 Kutani hi ku xengeteliwa hi mamani wa yena, a ku: “Ni nyiki nhloko ya Yohani Mutsakamisi na yi li ka bandecha.”+
9 Hambileswi hosi a yi vavisekile, yi va rhume swaku va mu nyika yona hi mhaka ya ku hlonipha leswi a nga swi funga ni hi mhaka ya lava a va dla na yona mezeni.
10 Se yi rhuma vanhu swaku va ya tsema nhloko ya Yohani adjele.
11 Kutani ku tisiwa nhloko ya yena na yi li ka bandecha yi ta nyikiwa ntombhi leyi, se yona yi yi yisa ka mamani wa yona.
12 Hi wugamu, vadjondzisiwa va Yohani va ta, va ta teka ntsumbu wa yena va ya wu lahla va gama va ya tivisa Yesu.
13 Nkama Yesu a nga swi twa, a suke kolanu hi boti, a ya nhoveni swaku a ya va yexe; kambe loko xitshungu xi twa leswo, xi suka madoropeni xi mu landza hi minenge.+
14 Nkama a nga xika, a vone xitshungu xaxikulu, kutani a xi twela wusiwana;+ se a hanyisa va ku vabya xikarhi ka xona.+
15 Kambe nkama li nga pela, vadjondzisiwa va yena va ta ka yena va ku: “Hi le kule ni doropa naswona se li chone hintamu; byela vanhu lava swaku va ya ka swidoropani va ya tixavela swakudla.”+
16 Kambe Yesu a ku: “Va nga fambi; va nyikeni swakudla n’wina.”
17 Va ku: “Ho va ni 5 wa mapawu ni tihlampfi timbirhi ntsena.”
18 A ku: “Swi tiseni halenu.”
19 Se nkama a nga byela xitshungu swaku xi tshama ka byanyi, a teke 5 wa mapawu ni tihlampfi timbirhi, a txuvuka tilweni a khensa;+ loko a gamile ku khema mapawu, a nyika vadjondzisiwa va yena, se va ma yavela xitshungu.
20 Hinkwavu va dla va xurha; kutani va hlengeleta leswi nga sala, swi tata 12 wa mindzhava.+
21 Ku dle kolomuyani ka 5.000 wa vavanuna, na ku nga kontiwi vavasati ni vana.+
22 Kutani a hantla a byela vadjondzisiwa va yena swaku va pfa va khwela boti va ya ka tlhelo lelin’wani la lwandle, yena na a sale a vhalelisana ni xitshungu.+
23 Nkama a nga gama ku vhalelisana ni xitshungu, a ye ka ntshava na a li yexe a ya khongela.+ Kutani li pela na a li yexe ka ndhawu yoleyo.
24 Hi nkama wolowo, boti se a li li kule swinene* ni misava, naswona a li tsekatsekisiwa hi magandlati hikusa a ku ba moya wawukulu.
25 Kambe nimpundzu* a yela vadjondzisiwa va yena na a famba henhla ka mati.
26 Se nkama va nga mu vona na a famba henhla ka mati, va dzuka hintamu, va ku: “Vonani mihlolo!” Kutani va ba nyandha hi ku chava.
27 Kambe Yesu a ku: “Tiyani nhlana! Hi mina; mi nga chaveni!”+
28 Pedru a mu hlamula a ku: “Hosi, loko ku li wena hikakunene, ni byeli swaku ni famba henhla ka mati ni ta ka wena.”
29 Yesu a ku: “Tani!” Kutani Pedru a huma ka boti a famba henhla ka mati a ya ka Yesu.
30 Kambe nkama a nga txuvuka xidzedze, a sungule ku chava; loko a sungula ku mbombomela, a ba nyandha a ku: “Hosi, ni ponisi!”
31 Se Yesu a mu khoma hi voko hi ku hantlisa a ku: “Wena wa lipfumelo lalitsongo, hi mhaka muni u kanakana?”+
32 Naswona loko se va nghenile ka boti, xidzedze xi nyima.
33 Se lava nga ka boti va mu khizamela va ku: “U N’wana wa Xikwembu hikakunene.”
34 Kutani va tsemakanya lwandle va fika Jenezareta.+
35 Nkama vanhu va ndhawu yoleyo va nga tsumbula swaku hi yena, va byele vanhu va tindhawu hinkwatu ta le kusuhi swaku Yesu a fikile, kutani va mu tisela hinkwavu lava a va vabya.
36 Va kombela ku khumba ntsena ponta ya mpahla ya yena;+ se hinkwavu lava nga yi khumba va hanyisiwa hi ku helela.
Tinhlamunselu ta le hansi
^ Ku nga Heroda Antipasi. Vona Ntlhamuselo.
^ Hi Xigriki: “switadiyu swa swinyingi”. Xitadiyu xin’we a xi ni 185 wa mametru. Vona Xiyengetelo B14.
^ Ku nga kolomuyani ka 3 wora wa nimpundzu ku ya fikela kolomuyani ka 6 wora wa nimixo.
