Mahungu Ya Ku Tsakisa Ya Ku Tsaliwa Hi Marka 5:1-43
5 Kutani va fika ka tlhelo lelin’wani la lwandle ka doropa la Vajerasi.+
2 Na Yesu a ha ku xika ka boti, a teliwe hi wanuna lweyi a nga ni dimoni* na a huma simitela.*
3 Wanuna lweyi a a tshama simitela* naswona a ku nge se tshama ku va ni munhu lweyi a a kota ku mu boha swi tiya, hambi ku li hi machini.
4 A a tshamela ku bohiwa hi tinsimbi ni machini, kambe a a swi tsema naswona a ku nga na munhu lweyi a a kota ku mu khoma swi tiya.
5 A a tshamela ku huwelela wusiku ni nhlikanhi na a li simitela* ni ka tintshava, a tlhela a titsemelela hi maribye.
6 Kambe nkama a nga vona Yesu na a ha li kule, a tsutsuma a fika a khizama phambheni ka yena+
7 a huwelela a ku: “U lava yini ka mina wena Yesu, N’wana wa Xikwembu Xa Ku Tlakuka Hintamu? Ni ku fungisa hi Xikwembu leswaku u nga ni xanisi.”+
8 Hikusa Yesu a a li byele a ku: “Huma ka munhu lweyi, wena dimoni!”+
9 Kambe Yesu a li vutisa a ku: “Hi wena mani?” Kutani li ku: “Vito la mina ni Bandla, hikusa hi vanyingi.”
10 Kutani li kombela Yesu hi ku phindhaphindha leswaku a nga hlongoli madimoni atikweni.+
11 A ku ni ntlhambi wawukulu+ wa makhumba lowu a wu dla ka ntshava.+
12 Kutani madimoni ma mu kombela ma ku: “Hi yisi ka makhumba, hi ya nghena ka wona.”
13 Kutani a ma pfumelela. Se madimoni ma huma ma ya nghena ka makhumba kutani ntlhambi hinkwawu wu tsutsuma wu ya wela lwandle, kolomuyani ka 2.000 wa makhumba ma mbombomela lwandle.
14 Kambe valusi va wona va baleka, va ya byela lava tshamaka adoropeni mhaka leyi ni lava nga ka tindhawu leti nga kusuhi ni doropa lolelo; kutani vanhu va ta, va ta vona leswi nga humelela.+
15 Nkama va nga fika ka Yesu, va vone munhu lweyi a nga ngheniwa hi Bandla la madimoni a tshamile na a yambalile funtshi na ti ba bem; kutani va sungula ku chava.
16 Naswona lava nga swi vona va va tlhamusele leswi nga humelela munhu lweyi a a ni madimoni ni leswi nga humelela makhumba.
17 Se va sungula ku kombela Yesu leswaku a suka ka doropa la vona.+
18 Nkama Yesu a nga nghena ka boti, munhu lweyi a a ni madimoni a kombele ku famba na yena.+
19 Kambe Yesu a mu yalelile, a mu byela a ku: “Muka ka maxaka ya wena, u ya ma byela swilo hinkwaswu leswi Yehovha* a nga ku yendlela swona ni timpsalu leti a nga ku komba tona.”
20 Kutani wanuna lweyi a famba, a gama a sungula ku byeletela vanhu va Dekapolisi* hinkwaswu leswi Yesu a nga mu yendlela swona, kutani vanhu va hlamala.
21 Nkama Yesu a nga tlhelela ka tlhelo lelin’wani la lwandle hi boti, xitshungu xaxikulu xi hlengeletanile ka yena na a ha li kusuhi ni lwandle.+
22 Kutani ku fika mun’we wa varhangeli va sinagoga* lweyi a vitaniwaka Yayiro. Nkama a nga vona Yesu, a khizama ka minenge ya yena.+
23 Kutani a mu kombela hi ku phindhaphindha a ku: “Xintombhani xa mina xa vabya swinene.* Ni kombela u ta u ta xi tlhateka mavoko+ leswaku xi hanya.”
24 Se Yesu a famba na yena na a landziwa hi xitshungu xaxikulu lexi a xi mu manyetela.
25 A ku ni wansati lweyi a a ni 12 wa malembe+ na a hluphiwa hi mavabyi ya ku humetela ngati.+
26 Se a a twisiwe ku vava swinene hi vadotori va vanyingi naswona a a tirhise ni male ya yena hinkwayu, kambe a swi mu pfunanga hi nchumu, mavabyi ma yo ya ma kula.
27 Loko wansati lweyi a twa hi ta Yesu, a ta hi le ndzhaku ka yena na a li xikarhi ka xitshungu, a fika a khumba mpahla ya Yesu,+
28 hikusa a a tshamela ku tibyela a ku: “Loko no za ni khumba mpahla ya yena ntsena, ni ta hanya.”+
29 Se a yi khumba, kutani ngati yi nyima ku humetela; se a swi twa swaku a hanyile ka mavabyi ya yena ya ku chavisa swinene.
30 Hi xihantla, Yesu a swi twa swaku ku hume matimba ka yena,+ kutani a ndzuluka a vutisa xitshungu a ku: “I mani lweyi a nga khumba mpahla ya mina?”+
31 Kambe vadjondzisiwa va yena va ku: “Wa swi vona swaku xitshungu xa ku manyetela, se hi mhaka muni u ku: ‘I mani lweyi a nga ni khumba?’”
32 Kambe Yesu a txuvuka matlhelo hinkwawu kuva a vona swaku i mani a nga mu khumba.
33 Se wansati lweyi, hi ku tiva leswi nga mu yendlekela, a chava a tlhela a rhurhumela, a gama a ya ka Yesu, a fika a khizama phambheni ka yena a mu byela ntiyiso hinkwawu.
34 Se Yesu a ku: “N’wananga, lipfumelo la wena li ku hanyisile. Famba hi ku rhula,+ u hanya ka mavabyi ya wena ya ku chavisa.”+
35 Na a ha khuluma, ku fika vavanuna lava taka hi kaya ka murhangeli wa sinagoga va ku: “N’wana wa wena se a file! Wa ha mu hluphela yini Mudjondzisi?”+
36 Kambe nkama Yesu a nga twa leswi a va swi vula, a byela murhangeli wa sinagoga a ku: “U nga chavi, pfumela ntsena.”+
37 Yesu a nga pfumelanga ku landziwa hi munhu mun’wani handle ka Pedru, Yakobe, na Yohani makwavu wa Yakobe.+
38 Nkama va nga fika kaya ka murhangeli wa sinagoga, a vone mpfilumpfilu ya lava a va rila va tlhela va ba nkosi.+
39 nkama a nga nghena ndlwini, a va byele a ku: “Hi mhaka muni mi rila mi tlhela mi pfuxa mpfilumpfilu? N’wana lweyi a nga fanga kambe a yo yetlela.”+
40 Se va sungula ku mu hleka swinene. Kambe nkama a nga va humesa handle hinkwavu, a teke papayi ni mamani wa n’wana ni vadjondzisiwa lava a va li na yena, a nghena lomu n’wana a a li kona,
41 a khoma voko la yena a ku: “Thalitha kumi,” leswi loko swi hundzuluxeliwa swi vulaka leswaku “ntombhi, ni li ka wena: ‘Pfuka!’”+
42 Kutani yi pfuka yi sungula ku famba. (A yi ni 12 wa malembe.) Se vapsali va yona va nga ha tikoti hi ku tsaka.
43 Kambe a va byela hi ku phindhaphindha swaku va nga byeli munhu mhaka leyi,+ kutani a va byela swaku va nyika n’wana swakudla.
Tinhlamunselu ta le hansi
^ Kumbe: “masirheni.”
^ Hi Xigriki: “moya wa chaka”.
^ Kumbe: “masirheni”.
^ Kumbe: “masirheni”.
^ Vona Xiyengetelo A5.
^ Kumbe: “Ndhawu ya 10 wa Madoropa”.
^ I ndhawu leyi Vayuda a va kumana ka yona swaku va khongela va tlhela va lerha matsalwa.
^ Kumbe: “xi kusuhi ni ku fa.”
