Mahungu Ya Ku Tsakisa Ya Ku Tsaliwa Hi Luka 5:1-39
5 Siku lin’wani Yesu a a nyime tlhelweni ka lwandle la Jenezareta*+ na a djondzisa rito la Xikwembu naswona xitshungu a xi mu manyetela.
2 Kutani a vona maboti mambirhi na ma nyimisiwe tlhelweni ka lwandle, kuve vinyi va wona lava nga vaphasi va tihlampfi a va humile va ya hlampsa maredi* ya vona.+
3 A khwele ka boti la Simoni, kutani a mu kombela leswaku a nghenanyana lwandle. Se a tshama hansi a sungula ku djondzisa vanhu na a li ka boti.
4 Nkama a nga gama ku djondzisa, a byele Simoni a ku: “Yanani lani ku nga yenta, mi peta maredi ya n’wina leswaku mi ta phasa.”
5 Kambe Simoni a mu hlamula a ku: “Mudjondzisi, hi tirhe wusiku hinkwalu kambe a hi phasanga nchumu,+ kambe ni ta peta hi ku vula ka wena.”
6 Se va yendla swoleswo, kutani va phasa tihlampfi ta tinyingi hintamu maredi ya vona ma za ma sungula ku handzukela.+
7 Se va vitana lava a va li ka boti lin’wani leswaku va ta va pfuna; va tile kutani va tata maboti mambirhi hi tihlampfi ma za ma sungula ku mbombomela.
8 Nkama Simoni Pedru a nga swi vona, a khizame ka minenge ya Yesu a ku: “U nga ni tshineleli wena Hosi, hikusa ni mudjohi.”
9 Pedru a vule leswo hi mhaka ya leswi yena ni lava a a li na vona va nga hlamalisiwa hi tihlampfi leti va nga ti phasa.
10 Yakobe na Yohani vana va Zebedewu,+ lava a va phasa na Simoni, na vona va titwise swoleswo. Kambe Yesu a byela Simoni a ku: “U nga chavi. Ku sukela swoswi u ta phasa vanhu.”+
11 Kutani va humesa boti li ya handle ka lwandle, se va tshika hinkwaswu va mu landzela.+
12 Na a li ka doropa lin’wani, ku humelele wanuna lweyi a a ni mavabyi ya nhlokonho* ya ku chavisa swinene! Nkama a nga vona Yesu, a khizame phambheni ka yena a mu kombela a ku: “Hosi, loko u swi lava, u nga ni hanyisa.”*+
13 Se Yesu a tshandzavuta voko, a mu khumba a ku: “Na swi lava! Hanyisiwa.” Se hi ku hantlisa mavabyi ya yena ma nyamalala.+
14 Kutani a byela wanuna yelweyo swaku a nga byeli munhu mhaka leyi, a tlhela a ku: “Famba ka muprista u fika u nyikela gandzelo la ku hanyisiwa ka mavabyi ya wena ya nhlokonho, hi ku ya hi leswi Moxe a nga swi vula+ leswaku vaprista va ta tiyiseka swaku se u hanyisiwile.”+
15 Kutani Yesu a sungula ku va ni ndhuma swinene se vanhu va ku tala va za va ta ka yena va ta mu yingisela ni ku hanyisiwa mavabyi.+
16 Kambe, a a tolovela ku ya khongela amananga.
17 Siku lin’wani loko a li ku djondziseni, Vafarisi ni vadjondzisi va Nawu lava a va ta hi Galileya, Yudiya ni Yerusalema a va tshame kolanu naswona Yehovha* a a mu nyike matimba leswaku a hanyisa vanhu.+
18 Se ku ta vavanuna lava a va tlakule wanuna lweyi a a ni trombozi, naswona a va zama ndlela ya ku mu nghenisa ndlwini leswaku va ta mu veka phambheni ka Yesu.+
19 Kambe a va swi kotanga ku mu nghenisa hileswi a ku tale hi vanhu. Se va khwela henhla ka yindlo, va mu yehlisa na a yetlelile ka xibedwani hi ka mbhovo lowu va nga wu pfula, kutani va mu veka phambheni ka Yesu.
20 Nkama a nga vona lipfumelo la vona a ku: “Nanduwe, swidjoho swa wena swi rivaleliwile.”+
21 Se vatsali ni Vafarisi va sungula ku vutisana va ku: “I mani munhu lweyi a rhuketelaka Xikwembu? I mani lweyi a nga rivalelaka swidjoho handle ka Xikwembu ntsena?”+
22 Kambe Yesu hi ku tiva leswi a va swi pimisa, a va hlamula a ku: “I mpsini leswi mi swi pimisaka ka timbilu ta n’wina?
23 Ku yampsa yini, ku vula u ku: ‘U rivaleliwile swidjoho swa wena’ kumbe ku vula u ku: ‘Pfuka u famba’?
24 Kambe leswaku mi ta swi tiva swaku N’wana wa munhu a ni matimba ya ku rivalela swidjoho lani misaveni . . . ”, kutani a byela munhu lweyi a a ni trombozi a ku: “Na ku byela: Pfuka, u teka xibedwani xa wena u muka.”+
25 Se a pfuka phambheni ka vona, a teka xibedwani xa yena a timukela na a dzunisa Xikwembu.
26 Kutani vanhu hinkwavu va hlamala, se va sungula ku dzunisa Xikwembu. Va hlamale swinene va za va ku: “Namuntlha hi vone swilo swa ku hlamalisa!”
27 Se a gama a huma, kutani a vona muhakelisi wa rhesa* lweyi a vitaniwaka Levhi na a tshame lani ku hakelisiwaka kona rhesa, a ku: “Tani u ni landzela.”+
28 Se a sekeleka, a tshika hinkwaswu a landzela Yesu.
29 Kutani Levhi a hambela Yesu fexta lalikulu kaya ka yena, naswona a ku tale hi vahakelisi va rhesa ni vanhu van’wani lava a va dla* na vona.+
30 Nkama Vafarisi ni vatsali va nga vona leswo, va sungule ku sola vadjondzisiwa va yena, va ku: “Hi mhaka muni mi dla mi tlhela mi nwa ni vahakelisi va rhesa ni vadjohi?”+
31 Yesu a ku: “Vanhu lava nga kahle a va lavi dotori kambe dotori a laviwa hi lava vabyaka.+
32 A ni telanga ku ta vitana va ku lulama, kambe ku ta vitana vadjohi leswaku va tisola.”+
33 Se va ku: “Vadjondzisiwa va Yohani va tshamela ku titsona swakudla ni ku khongela, ni vadjondzisiwa va Vafarisi na vona va yendla swoleswo, kambe va wena va dla va tlhela va nwa.”+
34 Yesu a va hlamula a ku: “A mi nge sindzisi vanghanu va muteki* leswaku va titsona swakudla loko muteki a ha li na vona, a hi swona ke?
35 Kambe masiku ma ta lawa muteki+ a nga ta va a nga ha li kona,* se hi nkama wolowo hi kona va nga ta titsona swakudla.”+
36 A tlhele a va byela xifaniso a ku: “A nga kona lweyi a nga tsemaka xitarapu ka mpahla ya nyuwani se a xi rhunga ka mpahla ya khale. Hikusa loko o yendla leswo, xitarapu xa nyuwani xi nga handzula mpahla ya khale; funtshi a xi nge fani ni mpahla ya khale.+
37 Naswona, a nga kona lweyi a nga chelaka vhinyu la nyuwani ka mabolhela ya khale ya ku yendliwa hi xikhumba.* Hikusa loko o yendla leswo, vhinyu la nyuwani li ta boxa mabolhela wolawo funtshi li ta halaka kutani ma wonheka.
38 Kambe vhinyu la nyuwani li fanele li cheliwa ka mabolhela ya nyuwani.
39 A nga kona lweyi a nwaka vhinyu la khale a gama a navela la nyuwani, hikusa a li: ‘Ku nandziha la khale.’”
Tinhlamunselu ta le hansi
^ Ku nga Lwandle la Galileya.
^ Kumbe: “tikoka”.
^ Kumbe: “lepra”. Ku nga muxaka wa mavabyi ya ku bola xikhumba.
^ Kumbe: “u nga ni basisa.”
^ Vona Xiyengetelo A5.
^ Kumbe: “impoxtu; tinemba”.
^ Kumbe: “vurhama”.
^ Kumbe: “noivhu”.
^ Hi Xigriki: “a nga ta susiwa”.
^ Ku nga mabolhela kumbe minkwama leyi nga hambiwa hi xikhumba xa xiharhi. Vona Ntlhamuselo.
