Mahungu Ya Ku Tsakisa Ya Ku Tsaliwa Hi Luka 19:1-48
19 Kutani Yesu a hundza hi le Yeriko.
2 Ka doropa leli a ku ni wanuna lweyi a a vitaniwa Zakewu, lweyi a a li murhangeli wa lava va hakelisaka rhesa* naswona a a ganyile.
3 A a lava ku vona Yesu, kambe a a nga swi koti hikusa a ku tale hi vanhu naswona a a komile.
4 Kambe leswi Yesu a a ta hundza hi ka ndlela yoleyo, a tsutsuma a rhangela a ya khwela ka nsinya wa nkuwa swaku a mu vona.
5 Nkama Yesu a nga fika kolanu, a txuvuke henhla ka nsinya a gama a ku: “Xika hi ku hantlisa Zakewu, hikusa namuntlha ni mupfhumba wa wena.”
6 Se a xika hi ku hantlisa a mu yamukela hi ku tsaka.
7 Nkama vanhu va nga swi vona, va sungule ku ngurangura va ku: “A yendzele wanuna lweyi a nga mudjohi.”+
8 Kambe Zakewu a sekeleka, a byela Hosi a ku: “Hosi! Ni ta nyika swisiwana hafu ya minchumu leyi ni nga na yona, naswona leswi ni nga tekela van’wani hi ku va kanganyisa ni ta va tlhelisela swona ka 4.”+
9 Kutani Yesu a ku: “Namuntlha ku ponisiwa ku nghenile ka munti wa wanuna lweyi ni ndjangu wa yena, hikusa na yena i n’wana wa Abrahamu.
10 N’wana wa munhu a tele ku ta lava ni ku ponisa lava nga lahleka.”+
11 Na va ha yingisela timhaka leto, Yesu a tlhela a va byela xifaniso, hikusa a a li kusuhi ni ku nghena Yerusalema naswona a va pimisa swaku Mfumu wa Xikwembu a wu ta ta hi ku hantlisa.+
12 Se a ku: “Wanuna mun’wani lweyi a a li n’wana wa hosi a yendzile a ya ka tiko la le kule+ leswaku a ya nyikiwa wuhosi naswona a a ta tlhela a vuya.
13 Kutani a vitana 10 wa vatirhi va yena a va nyika 10 wa timina,* a gama a ku: ‘Yendlani negosiyu* hi tona anze ni vuya.’+
14 Kambe leswi lava tshamaka ka tiko la yena a va mu nyenya, va rhumela ntlawa wa vanhu ka tiko leli a nga ya ka lona va fika va ku: ‘A hi swi lavi ku fumiwa hi munhu lweyo.’
15 “Kutani loko se a nyikiwile wuhosi, a vuya a fika a vitana vatirhi va yena lava a nga va nyika male* swaku a ta tiva leswi va nga swi kuma.+
16 Lweyi wa ku sungula a fika a ku: ‘Hosi, a mina ya wena yi humese 10 wa timina.’+
17 Se hosi yi ku: ‘U yendle kahle! U mutirhi wa kahle! Leswi u nga tshembeka ka swaswitsongo, u ta fuma 10 wa madoropa.’+
18 Wa wumbirhi a fika a ku: ‘Hosi, a mina ya wena yi humese 5 wa timina.’+
19 Ni ka yelweyo hosi yi ku: ‘Na wena, u ta fuma 5 wa madoropa.’
20 Se ku fika mutirhi mun’wani a ku: ‘Hosi, a mina ya wena hi leyi. A ni yi bohelele hi panu ni yi tumbeta.
21 Na ku chava hikusa u munhu wa ku karhata; u teka leswi u kalaka u nga swi vekanga naswona u tshovela lomu u kalaka u nga byalanga.’+
22 Kutani hosi yi mu hlamula yi ku: ‘Ni ta ku yavanyisa hileswi u nga swi vula wena mutirhi wa ku biha. A wu swi tiva swaku ni munhu wa ku karhata naswona ni teka leswi ni kalaka ni nga swi vekanga ni ku tshovela lomu ni kalaka ni nga byalanga, a hi swona ke?+
23 Se hi mhaka muni u nga vekanga male* ya mina abanku? A ni ta yi kuma na yi psale majuru* loko ni vuya.’
24 “Se yi byela lava a va nyime kolanu yi ku: ‘Mu tekeleni mina yoleyo, mi yi nyika lweyi a nga ni 10 wa timina.’+
25 Kambe va ku: ‘Hosi, phela se a ni 10 wa timina!’
26 Yi va hlamula yi ku: ‘Na mi byela: Lweyi a nga ni xanchumu, a ta yengeteliwa swin’wani kambe lweyi a kalaka a nga na nchumu, a ta tekeliwa ni lexi a nga na xona.+
27 Se valala va mina lava kalaka va nga swi lavi swaku ni va fuma, va tiseni lani, mi va dlaya phambheni ka mina.’”
28 Loko se a vule timhaka leto, a suka a famba a ya Yerusalema.
29 Nkama a a li kusuhi ni xidoropani xa Betifaje ni xa Betaniya ka ntshava leyi vitaniwaka Ntshava ya Mawolivhera,+ a rhuma vadjondzisiwa vambirhi+
30 a ku: “Fambani ka xidoropani lexi vonekaka lahaya, se loko mi nghena, mi ta kuma ximbongolwani na xi bohiwile xa ku a ku se tshama ku va ni munhu lweyi a nga famba hi xona. Xi tlhantlheni mi ni tisela xona.
31 Kambe loko munhu a mi vutisa a ku: ‘Mi xi tlhantlhela yini?’ mi fanele mi ku: ‘Xi laviwa hi Hosi.’”
32 Se lava nga rhumiwa va famba va fika va swi kumisa leswi a nga va byelisa xiswona.+
33 Kambe nkama na va tlhantlha ximbongolwani, vinyi va xona va va vutisa va ku: “Mi xi tlhantlhela yini ximbongolwani lexo?”
34 Se va ku: “Xi laviwa hi Hosi.”
35 Kutani va famba na xona ka Yesu; se va tlhateka tinguvu ta vona henhla ka xona kutani Yesu a famba hi xona.+
36 Na a li ku fambeni, vanhu va yandlale tinguvu ta vona ndleleni.+
37 Nkama a nga fika kusuhi ni ndlela leyi sukelaka ka Ntshava ya Mawoliverha, vadjondzisiwa hinkwavu va sungule ku tsaka ni ku dzunisa Xikwembu hi mhaka ya masingita lawa va nga ma vona,
38 va ku: “A katekile lweyi a taka na a li Hosi hi vito la Yehovha!* A ku ve ni ku rhula tilweni, a ku dzunisiwe lweyi a nga matilweni!”+
39 Kambe Vafarisi van’wani lava a va li xikarhi ka vanhu va ku: “Mudjondzisi, byela vadjondzisiwa va wena va miyela.”+
40 Se a va hlamula a ku: “Ni mi byela ntiyiso: Loko vanhu lava vo miyela, maribye ma ta huwelela.”
41 Nkama a nga fika kusuhi ni doropa la Yerusalema, a li txuvuka a gama a li rilela+
42 a ku: “Loko a wo swi tiva leswi nga ta ku yendla u va ni ku rhula . . . kambe u fihleliwe swona.+
43 Hikusa masiku ma ta lawa valala va wena va nga ta yaka khumbi la timhandzi ta ku tlhavana ta ku vatliwa ka tiponta swaku ti ku rhendzela, va ku pfalela matlhelo hinkwawu.+
44 Va ta ku helisa wena ni vana va wena+ naswona a va nge siyi ribye henhla ka ribye lin’wani ka wena,+ hikusa a wu wu tivanga nkama wa ku kambeliwa ka wena.”
45 Se a nghena tempeleni a sungula ku hlongola hinkwavu lava a va xavisa,+
46 a ku: “Ku tsaliwile: ‘Yindlo ya mina yi ta va yindlo ya xikhongelo’,+ kambe n’wina mi yi yendla yindlo ya vayivi.”+
47 Yesu a tame a djondzisa tempeleni siku ni siku. Kambe vaprista vavakulu, vatsali ni varhangeli a va lava ku mu dlaya;+
48 kambe a va kumanga ndlela ya ku mu dlaya, hikusa vanhu a va tshama na yena va mu yingisela.+
Tinhlamunselu ta le hansi
^ Kumbe: “impoxtu; tinemba”.
^ Mina ya Gresiya a yi peza 340 wa magrama naswona a ku vuliwa swaku yi ringana ni 100 wa tidrakma. Vona Xiyengetelo B14.
^ Kumbe: “bindzu”.
^ Hi Xigriki: “prata”.
^ Hi Xigriki: “prata”.
^ Kumbe: “ni mpsalu”.
^ Vona Xiyengetelo A5.
