Mahungu Ya Ku Tsakisa Ya Ku Tsaliwa Hi Luka 10:1-42
10 Na swilo leswo se swi hundzile, Hosi yi lange 70 wa vanhu van’wani, yi va rhuma va famba hi vambirhi vambirhi+ va yi rhangela, va ya ka madoropa ni ka tindhawu leti a yi ta ya ka tona.
2 Kutani yi ku: “Phela ntshovelo i wukulu, kambe vatirhi i vatsongo. Hi mhaka leyo, kombelani N’winyi wa ntshovelo swaku a rhumela vatirhi ka ntshovelo wa yena.+
3 Se fambani! Kambe tivoneleni! Hikusa ni mi rhuma ku fana ni swinyempfani xikarhi ka mahlolwa.*+
4 Mi nga teki xipachi kumbe nkwama wa swakudla kumbe masandaliya+ naswona mi nga xoweti munhu ndleleni.
5 Loko mi nghena ka munti, sungulani hi ku: ‘Ku rhula a ku ve ni munti lowu.’+
6 Loko ku ni lava rhandzaka ku rhula, a va ve ni ku rhula loku mi va kombelelaka kona. Kambe loko va nga li kona, ku rhula ku ta tlhelela ka n’wina.
7 Kutani tshamani ka munti wolowo,+ mi dla ni ku phuza leswi va mi nyikaka swona,+ hikusa mutirhi a faneliwa hi hakelo ya yena.+ Mi nga suki ka munti wolowo.
8 “Naswona loko mi nghena ka doropa kutani va mi yamukela, dlanani leswi va mi nyikaka swona,
9 mi hanyisa lava vabyaka, mi tlhela mi va byela mi ku: ‘Mfumu wa Xikwembu wu le kusuhi.’+
10 Kambe loko mi nghena ka doropa kutani va nga mi yamukeli, humani mi ya ka switaratu swa doropa lolelo kutani mi ku:
11 ‘A wuthulu la doropa leli, leli nga ka minenge ya hina, hi li phuhunela ka n’wina.+ Kambe swi tiveni swaku Mfumu wa Xikwembu wu kusuhi.’
12 Na mi byela swaku doropa lelo li ta khatisiwa swinene hi Siku la Ku Yavanyisa ku tlula doropa la Sodoma.+
13 “Khombo ka n’wina lava tshamaka Korazini! Khombo ka n’wina lava tshamaka Betisayida! Hikusa loko masingita lama nga yendliwa ka n’wina a ma yendliwe le Tiru ni le Sidoni, vanhu va kona a va ta va va tisolile khale swinene va yambala masaka ni ku tshama ka nkuma.+
14 Hi mhaka leyo, mi ta khatisiwa swinene hi Siku la Ku Yavanyisa ku tlula Tiru ni Sidoni.
15 Na n’wina lava tshamaka Kapernawume, mi pimisa swaku mi ta tlakusiwa anze mi ya fika tilweni? Ma hemba! Mi ta yisiwa Sirheni!*
16 “Lweyi a mi yingisaka na mina wa ni yingisa.+ Naswona lweyi a kalaka a nga mi yingisi na mina a nga ni yingisi. Funtshi lweyi a kalaka a nga ni yingisi a nga mu yingisi ni Lweyi a nga ni rhuma.”+
17 Kutani lava 70 va vuya na va tsakile va ku: “Hosi, hambi madimoni ma hi yingisa loko hi tirhisa vito la wena.”+
18 Se Yesu a va byela a ku: “Ni vone Sathana na a wile+ hi le tilweni ku fana ni rihati.
19 Vonani! Ni mi nyike matimba ya ku kandzihela tinyoka ni swizavanani* ni matimba ya ku hlula nala+ naswona a ku na nchumu ni xin’we lexi nga ta mi vavisa.
20 Kambe mi nga tsaki hi mhaka leswi madimoni ma mi yingisaka, tsakani hi mhaka leswi mavito ya n’wina ma nga tsaliwa tilweni.”+
21 Hi nkama wolowo, moya wa ku kwetsima wu mu yendla a tsaka kutani a ku: “Papayi, Hosi ya tilo ni misava, na ku dzunisa ka vanhu hinkwavu, hikusa swilo leswi u swi tumbhetele lava ku tlhariha ni lava ku tiva ngopfu,+ u swi tivisa ka lava tivekaka hansi ku fana ni vana. Papayi u yendle leswo hikusa i ku rhandza ka wena.+
22 Papayi wa mina a ni nyike swilo hinkwaswu. Naswona a nga kona lweyi a mu tivaka N’wana loko ku nga li Papayi. Naswona a nga kona lweyi a mu tivaka Papayi loko ku nga li N’wana+ ni lweyi N’wana a tsakelaka ku mu tivisa ka yena.”+
23 Kutani a vulavula ni vadjondzisiwa na va li voxe a ku: “Va tsaka vanhu lava matihlo ya vona ma vonaka minchumu leyi mi yi vonaka.+
24 Hikusa na mi byela swaku vaprofeta va vanyingi ni tihosi a va swi navela ku vona minchumu leyi mi yi vonaka kambe a va yi vonanga,+ ni ku twa minchumu leyi mi yi twaka kambe a va yi twanga.”
25 Kutani wanuna mun’wani lweyi a a tiva Nawu a suka a nyima leswaku a mu ringa, a ku: “Mudjondzisi, ni fanele ni yendla yini swaku ni kuma wutomi la ku kala li nga heli?”+
26 Yesu a mu hlamula a ku: “Ku tsaliwe yini ka Nawu? Wa swi twisisa leswi wu swi vulaka?”
27 A mu hlamula a ku: “‘U fanele u rhandza Yehovha* Xikwembu xa wena hi mbilu ya wena hinkwayu, hi wutomi la wena hinkwalu, hi matimba ya wena hinkwawu ni hi mimpimiso ya wena hinkwayu’,+ ni ‘ku rhandza vanhu van’wani ku fana ni leswi u tirhandzisaka xiswona.’”+
28 Yesu a ku: “U hlamule kahle; tama u yendla swoleswo, u ta kuma wutomi la ku kala li nga heli.”+
29 Kambe hi ku lava ku tiyendla wamunene,+ wanuna yelweyo a vutisa Yesu a ku: “I vamani vanhu van’wani lava ni faneleke ni va rhandza?”
30 Yesu a hlamula a ku: “Wanuna mun’wani a a ngirimela na a suka hi Yerusalema a ya Yeriko, se a dumeliwa hi swigevenga swi mu ba swi tlhela swi mu tekela minchumu ya yena, kutani swi baleka swi mu siya na a li kusuhi ni ku fa.
31 Se muprista mun’wani lweyi a a famba hi ndlela yoleyo a mu vona, kambe a mu gega.
32 Ku tlhela ku ta Mulevhi, a mu vona kambe na yena a mu gega.
33 Kambe ku humelela Musamariya mun’wani,+ kutani nkama a nga mu vona, a mu twele wusiwana.
34 Se a mu bohelela swilondza, a swi chela mafurha ni vhinyu. A tlhela a mu veka ka mbongolo ya yena, a mu yisa ka yindlo ya vayendzi a ya mu hlayisa kona.
35 Hi mundzuku ka kona, a nyika n’winyi wa yindlo ya vayendzi tidenari* timbirhi, a tlhela a ku: ‘Mu hlayisi naswona loko ko laveka male ya ku tlula leyi, ni ta ku hakela nkama ni nga ta vuya.’
36 I mani ka lavanharhu u vonaka swaku a kombise lirhandzu+ ka wanuna lweyi a nga dumeliwa hi swigevenga?”
37 A mu hlamula a ku: “Hi lweyi a nga mu komba timpsalu.”+ Kutani Yesu a ku: “Na wena famba u ya yendla swoleswo.”+
38 Na va li ku fambeni, a nghene ka xidoropani xin’wani. Kutani wansati mun’wani lweyi a vitaniwaka Marta+ a mu yamukela kaya ka yena.
39 Marta a a ni makwavu lweyi a vitaniwaka Mariya, lweyi a a tshame kusuhi ni minenge ya Hosi na a yingisela leswi a yi swi vula.*
40 Kasi Marta, a a khomekile swinene hi mintirho ya yinyingi. Se a yela Yesu a ku: “Hosi, a wu na mhaka ni leswi makwerhu a ni tshikaka ni tirha noxe ke? Mu byeli a ta ni pfuna.”
41 Se Hosi yi mu hlamula yi ku: “Marta, Marta, u vilela ni ku tikarhata hi minchumu ya yinyingi.
42 Ku laveka swilo swaswitsongo kumbe nchumu xin’we ntsena. Phela Mariya, a lange swaswinene+ naswona a nge tekeliwi swona.”
Tinhlamunselu ta le hansi
^ Ku nga muxaka wa timbyana ta khwati.
^ Kumbe: “Hayidesi.” Vona Ntlhamuselo.
^ Kumbe: “escorpião”.
^ Vona Xiyengetelo A5.
^ Vona Xiyengetelo B14.
^ Hi Xigriki: “rito la yena.”
