Tikronika Ta Wumbirhi 26:1-23
26 Vanhu hinkwavu va Yuda va gama va teka Uziya+ lweyi a a ni 16 wa malembe, va mu veka swaku a va hosi, a pfaleta Amaziya papayi wa yena.+
2 A tlhele a yaka doropa la Elati+ a li tlhelisela aYuda loko hosi Amaziya se a lahliwile lani vavhovho va yena va nga lahliwa kona.+
3 Nkama Uziya+ a nga va hosi a a ni 16 wa malembe funtshi a fume 52 wa malembe aYerusalema. Vito la mamani wa yena a ku li Yekoliya lweyi a a psaliwe aYerusalema.+
4 A tame a yendlela Yehovha minchumu yayinene, ku fana ni leswi Amaziya papayi wa yena a nga yendlisa xiswona.+
5 A tame a lava Xikwembu hi nkama wa Zakariya, lweyi a nga mu djondzisa ku hlonipha Xikwembu xa ntiyiso. Nkama a a lava Yehovha, Xikwembu xa ntiyiso a xi mu katekisa.+
6 Se a ya lwa ni Vafilista,+ a fika a boxa muru wa doropa la Gati,+ muru wa doropa la Yabine+ ni muru wa doropa la Axidodi.+ A gama a ya yaka madoropa ka tiko la Axidodi ni le xikarhi ka Vafilista.
7 Xikwembu xa ntiyiso xi tama xi mu pfuna ku lwa ni Vafilista, Vaarabiya+ lava a va tshama aGurubali ni Vameyunimi.
8 Vaamoni+ va sungula ku humesela rhesa va hakela Uziya. A a ni ndhuma ku ya fika ni le Gibita, hikusa a a li hosi leyi nga ni matimba hintamu.
9 Uziya a tlhele a yaka maprediyu*+ aYerusalema akusuhi ni nyanghwa lowu vitaniwaka Nyanghwa wa le ka Ponta,+ ni ka Nyanghwa wa le Nkoveni+ ni kusuhi ni Muru wa ku Tiyisa Yindlo, a gama a ma tiyisa.
10 A tlhele a yaka maprediyu+ amananga, a txela ni swihlovo swa swinyingi (hikusa a a ni swifuyu swa swinyingi ngopfu); a yendle leswo ni le Xefela ni le ka ndhawu leyi kalaka yi nga na maganga ni tintshava. A a ni varimi ni vanhu lava a va mu rimela masimu ya mawuvha ka tintshava ni le Karmeli, hikusa a a rhandza ku rima.
11 Uziya a a ni masonchwa lawa a ma tilulamisele ku lwa nyimpi. A ma ya anyimpini na ma yaviwile hi ku ya hi mintlawa. A ma kontiwile ma tlhela ma tsalisiwa+ hi sekretariyu*+ Yeyiyele na murhangeli Mazeya, lweyi ntirho wa yena a wu voneleliwa hi Ananiya mun’wani wa varhangeli va hosi.
12 Varhangeli hinkwavu va mindjangu lava a va rhangela masonchwa ya matimba, a va li 2.600.
13 Masonchwa lawa a ma tilulamisele ku lwa nyimpi lawa a ma rhangeliwa hi varhangeli lava, a ma li 307.500, masonchwa lawa ya matimba a ma pfuna hosi swaku yi lwa ni valala va yona.+
14 Uziya a nyike masonchwa lawa hinkwawu a swivhikelo, matlharhi,+ makapaseti, mpahla leyi a yi yendliwe hi swinsimbani,+ tigubu ni swibalakatsa.+
15 A tlhele a yendla michini ya nyimpi aYerusalema, leyi nga yendliwa hi vanhu va ku tlhariha hintamu; yi vekiwe henhla ka maprediyu+ ni le ka tiponta ta mimuru naswona a va txopa hi yona mimpaxwa* ni maribye yamakulu. Se Uziya a tiviwa hintamu, hikusa a pfuniwe hi ndlela ya ku hlamalisa a za a va ni matimba.
16 Kambe loko se a li ni matimba, a sungula ku tibyela se a tivangela khombo hi yexe, a nga tshembekanga ka Yehovha Xikwembu xa yena, a nghene tempeleni ya Yehovha a ya hisa swinun’hwelisu* ka altari.+
17 Hi ku kahlula muprista Azariya ni 80 wa vaprista van’wani va Yehovha lava a va nga chavi nchumu, va mu landza hi ndzhaku.
18 Va fika va byela Hosi Uziya va ku: “A hi ntirho wa wena Uziya, ku hisela Yehovha swinun’hwelisu!+ I vaprista ntsena lava faneleke va yendla ntirho lowu hikusa i vatukulu va Aroni,+ hi vona lava nga langiwa. Huma atempeleni hikusa a wu tshembekanga ka mhaka leyi naswona Yehovha Xikwembu a nge ku dzunisi hi mhaka ya leswi.”
19 Kambe Uziya lweyi a a khome lexi va hiselaka ka xona swinun’hwelisu a kwata;+ funtshi na a ha kwatele vaprista a biwa hi mavabyi ya nhlokonho*+ ka ximombo aphambheni ka vaprista ka yindlo ya Yehovha atlhelweni ka altari ya swinun’hwelisu.
20 Nkama muprista wamukulu Azariya ni vaprista lavan’wani hinkwavu va nga mu txuvuka va vona swaku a biwe hi mavabyi ya nhlokonho ka ximombo! Se va hantla va mu humesa handle, na yena a vhela a huma hi ku kahlula hikusa Yehovha a a mu bile hi mavabyi ya nhlokonho.
21 Hosi Uziya a tame a va ni mavabyi ya nhlokonho+ anze a ya fa funtshi a a tshama ka yindlo yin’wani, hikusa a a nga pfumeleliwi ku nghena ka yindlo ya Yehovha. Kutani n’wana wa yena Yothamu a a vonelela yindlo ya wuhosi, a yavanyisa vanhu va tiko.+
22 Timhaka hinkwatu ta wutomi la Uziya, ku sukela a ku sunguleni anze wugamu, ti tsaliwile hi muprofeta Esaya+ n’wana wa Amozi.
23 Se Uziya a fa a ya lahliwa kusuhi ni lani vavhovho va yena va nga lahliwa kona, ka ndhawu leyi a ku lahliwa ka yona, leyi a yi lumba tihosi hikusa va te: “A ni mavabyi ya nhlokonho.” Se Yothamu+ n’wana wa yena a va hosi.
Tinhlamunselu ta le hansi
^ Kumbe: “swihondzo; switezi”.
^ Kumbe: “matsalana; mabalani”.
^ Kumbe: “maflexa”.
^ Vona Ntlhamuselo.
^ Kumbe: “lepra”. Ku nga muxaka wa mavabyi ya ku bola xikhumba. Vona Ntlhamuselo.
