Vakorinto Va Ku Sungula 14:1-40
14 Tamani mi kombisa lirhandzu na mi tikarhatela ku kuma tinyiko ta moya wa ku kwetsima, ngopfungopfu nyiko ya ku profeta.+
2 Hikusa lweyi a vulavulaka tirimi a nga vulavuli ni vanhu kambe a vulavula ni Xikwembu, hikusa a nga twisisiwi hi munhu kambe o twisisiwa hi Xikwembu ntsena.+ Hambileswi a vulavulaka swihundla swa ku kwetsima+ hi ku kongomisiwa hi moya wa ku kwetsima, a nga kona a swi twisisaka leswi a swi vulavulaka.
3 Kasi lweyi a profetaka, a byela van’wani marito lama yakaka, lama pfunaka ni lama tiyisaka.
4 Lweyi a khulumaka tirimi o tipfuna yena ntsena, kambe lweyi a profetaka a pfuna bandla.
5 Na swi navela swaku hinkwenu mi vulavula tirimi+ kambe leswi ni swi navelaka hintamu i swaku mi profeta.+ Phela lweyi a profetaka a tlula lweyi a vulavulaka tirimi, hikusa loko ku nga na lweyi a hundzuluxelaka, bandla a li pfuneki.
6 Kambe vamakwerhu, loko a no mi tela swoswi na ni vulavula tirimi, a swi ta mi pfuna hi yini swoleswo? Phela loko ni lava ku mi pfuna ni fanele ni vulavula marito lama taka hi ka Xikwembu+ kumbe ya wutivi,+ kumbe ya ku profeta, kumbe ya ku djondzisa.
7 Swa fana ni minchumu leyi hi chayaka hi yona lisimu, ku nga ha va flawuta* kumbe haripa. Loko swi chaya hi ndlela ya ku fana, swi ta tivisiwa ku yini leswi chayiwaka hi flawuta kumbe hi haripa?
8 Hikusa loko mhalamhala* yi chaya swa ku kala swi nga tiviwi, i mani lweyi a nga ta tilunghisela ku ya nyimpini ke?
9 Hi ku fanana, loko na n’wina mi nga vulavuli swilo leswi tekelaka ku twisisiwa, vanhu va ta swi tivisa ku yini leswi mi swi vulaka? Phela mi ta va na mi vulavula swa ku haha ni moya.
10 Ku ni tirimi ta tinyingi lani misaveni kambe a li kona lirimi la ku kala li nga twisiseki.
11 Hikusa loko ni nga swi twisisi leswi vuliwaka hi mun’wani, ni ta fana ni munhu wa tiko lin’wani ka lweyi a vulavulaka, na yena a ta fana ni munhu wa tiko lin’wani ka mina.
12 Se leswi na n’wina mi ti navelaka hintamu tinyiko ta Xikwembu, tikarhateleni ku va ni tinyiko ta tinyingi leti nga ta pfuna bandla.+
13 Kutani lweyi a vulavulaka lirimi la ku kala li nga tiviwi a a khongeli swaku a kota ni ku li tlhamusela.*+
14 Hikusa loko ni khongela hi lirimi la ku kala li nga tiviwi, a hi mina ni vulavulaka hikusa nyiko leyi ni nyikiwe hi moya wa ku kwetsima. Kutani a ni swi twisisi leswi ni swi vulaka.
15 Se ni ta ku yini? Ni ta tirhisa nyiko leyi ni nga nyikiwa hi moya wa ku kwetsima swaku ni khongela, naswona ni ta tlhela ni khongelela minchumu leyi ni twisisaka ntsutsu wa yona. Ni ta tirhisa nyiko ya moya wa ku kwetsima swaku ni yimbelela naswona ni ta tlhela ni yimbelelela Xikwembu lisimu leli ni twisisaka ntsutsu wa lona.
16 Hikusa loko u tirhisa nyiko ya moya wa ku kwetsima swaku u dzunisa Xikwembu, a ta vulisa ku yini munhu wa ku kala a nga tivi nchumu lweyi a nga xikarhi ka n’wina a ku: “Amen” ka xikhongelo xa wena xa ku khensa kuve a nga swi twisisi leswi u swi vulaka?
17 I ntiyiso swaku u khongela ka Xikwembu hi ndlela yayinene kambe munhu lweyi mun’wani a nga pfuneki hi nchumu.
18 Na xi khensa Xikwembu leswi ni vulavulaka tirimi ta tinyingi ku tlula n’wina hinkwenu.
19 Kambe lomu bandleni swi nga yampsa ni vulavula 5 wa marito lama nga ta twisisiwa swaku ni djondzisa van’wani, ku tlula ku vulavula 10.000 wa marito hi lirimi la ku kala li nga tiviwi.+
20 Vamakwerhu, mi nga faneni ni swivanani a ku twisiseni ka n’wina+ kambe fanani ni swivanani ka swa ku biha;+ naswona kulani hi ku helela ku twisiseni ka n’wina.+
21 Ka Nawu ku tsaliwe leswi: “‘Ni ta vulavula ni vanhu lava hi tirimi tin’wani ni hi marito ya vanhu vamatiko, kambe va ta yala ku ni yingisa,’ ku vula Yehovha.”*+
22 Se ku vulavula hi tirimi ta ku kala ti nga tiviwi a hi xikombiso ka vapfumeli kambe i xikombiso ka lava kalaka va nga li vapfumeli,+ kuve ku profeta a hi ka lava kalaka va nga li vapfumeli kambe i ka vapfumeli.
23 Loko bandla hinkwalu li tlhangana ndhawu yin’we kutani li vulavula tirimi ta ku kala ti nga tiviwi, se ku nghena vanhu lava kalaka va nga djondzekanga kumbe lava kalaka va nga li vapfumeli, indjhe a va nge vuli swaku ma hlanya ke?
24 Kambe loko hinkwenu mi profeta, se ku gama ku nghena munhu wa ku kala a nga li mupfumeli kumbe munhu lweyi a kalaka a nga djondzekanga, a ta layiwa a tlhela a kambeliwa kahle hi leswi a swi twaka.
25 Se swihundla swa mbilu ya yena swi ta humelela, kutani a ta txuvuka hansi a gandzela Xikwembu a ku: “Xikwembu xi na n’wina hikakunene.”+
26 Se hi ta ku yini vamakwerhu? Loko mi tlhangana, mun’we a yimbelela lisimu,* mun’we wa djondzisa, mun’we a vulavula marito lama taka hi ka Xikwembu, mun’we a vulavula lirimi lin’wani naswona mun’wani wa hundzuluxela;+ kambe hinkwaswu swi fanele swi yendliwa swaku ku pfuneka* van’wani.
27 Kutani loko ku ni lava vulavulaka tirimi tin’wani, a ku vulavule vambirhi kumbe vanharhu swi gama kolanu naswona a va txintxani, se mun’wani a fanele a hundzuluxela.+
28 Kambe loko ku nga na wa ku hundzuluxela, lweyi a lavaka ku vulavula hi lirimi la ku kala li nga tiviwi lomu bandleni a a miyeli, a vulavula ni Xikwembu hi le mbilwini ya yena.
29 A ku vulavule vaprofeta+ vambirhi kumbe vanharhu naswona lavan’wani a va twisisi ntlhamuselo ya kona.
30 Kambe loko mun’we a li ku vulavuleni, se mun’wani wa lava nga kolanu a yamukela marito lama taka hi ka Xikwembu, lweyi a vulavulaka a a miyeli.
31 Hikusa hinkwenu mi nga wu kuma nkama wa ku profeta loko mi txintxana swaku hinkwavu va djondza va tlhela va tiyisiwa.+
32 Naswona tinyiko ta Xikwembu ta ku profeta ti fanele ti voneleliwa hi vaprofeta.
33 Hikusa Xikwembu a hi Xikwembu xa mpfilumpfilu, kambe i xa ku rhula.+
Ku fana ni leswi yendlekaka ka mabandla hinkwawu ya vakwetsimi,
34 vavasati va fanele va miyela mabandleni, hikusa a va pfumeleliwi ku vulavula.+ Va fanele va tiveka hansi,+ hilaha Nawu na wona wu vulisaka xiswona.
35 Loko va lava ku djondza xanchumu, a va vutisi vanuna va vona kaya, hikusa swa danisa loko wansati a vulavula bandleni.
36 Kasi a rito la Xikwembu li yo ta hi ka n’wina ke? Li yo nyikiwa n’wina ntsena?
37 Loko munhu a pimisa swaku i muprofeta kumbe a ni nyiko ya moya wa ku kwetsima, a fanele a pfumela swaku leswi ni mi tsalelaka swona i nawu wa Hosi.
38 Kambe loko munhu a nga na mhaka na swona, Hosi a yi nga ta va na mhaka na yena.*
39 Vamakwerhu, tamani mi lwela ku profeta,+ kambe mi nga tsimbisi vanhu ku vulavula tirimi.+
40 Kambe swilo hinkwaswu a swi yendliwe hi ndlela yayinene ni hi nawu wa kona.*+
Tinhlamunselu ta le hansi
^ Kumbe: “xitiringo”.
^ Ku nga nchumu xa ku hambiwa hi limhondzo kumbe nsimbi, xi chaya ku fananyana ni vhuvhuzela.
^ Kumbe: “hundzuluxela.”
^ Vona Xiyengetelo A5.
^ Kumbe: “tipisalema”.
^ Kumbe: “ku tiyisiwa”.
^ Kumbexana: “loko munhu a nga lavi ku tiva nchumu, a ta tshamisa swoleswo.”
^ Kumbe: “hi ku hleleka.”
