Vakorinto Va Ku Sungula 10:1-33
10 Vamakwerhu, ni lava mi swi tiva swaku vavhovho va hina hinkwavu a va famba hansi ka rhefu+ naswona hinkwavu va tsemakanye lwandle.+
2 Hinkwavu va tsakamisiwile hi rhefu ni hi lwandle va va valandzeli va Moxe.
3 Hinkwavu va dlile swakudla swa ku fana leswi taka hi ka Xikwembu,+
4 naswona hinkwavu va phuze mati ya man’we lawa va nga nyikiwa hi Xikwembu.+ Hikusa a va hamba va phuza mati ka ribye leli a li tikomba na li va landzelela, ku nga ribye leli va nga nyikiwa hi Xikwembu; ribye la kona a ku li Kreste.+
5 Kambe va ku tala a va xi tsakisanga Xikwembu, kutani xi va dlayile amananga.+
6 Se leswi swi basopisa hina swaku hi nga naveli swa ku biha ku fana ni leswi vona va nga yendlisa swona.+
7 Naswona mi nga gandzeli swikwembu swa mavunhwa ku fana ni van’wani va vona. Rito la Xikwembu li vule leswi hi vona: “Va tshame hansi va dla, va phuza va gama va sekeleka va tsaka.”+
8 Naswona hi nga hanyeni hi ku yendla wuntunga la swa masangu* ku fana ni leswi van’wani va vona va nga swi yendla kutani ku fa 23.000 wa vona hi siku lin’we.+
9 Hi nga ringeni Yehovha*+ ku fana ni leswi van’wani va vona va nga yendlisa swona kutani va dlayiwa hi tinyoka.+
10 Naswona mi nga ngurangureni ku fana ni leswi van’wani va vona va nga ngurangura+ kutani va dlayiwa hi ntsumi ya Xikwembu.*+
11 Swilo leswi swi va humelelile kuva swi hi basopisa naswona swi tsaliwile swaku swi djondzisa hina+ hi hanyaka ka masiku ya wugamu.
12 Se lweyi a pimisaka swaku a nyimile a a tivoneli swaku a nga wi.+
13 A mi se humeleliwa hi ndzingo wa ku hambana ni lowu humelelaka vanhu van’wani.+ Kambe Xikwembu xa tshembeka, a xi nge mi tshiki mi ringiwa hi ndzingo lowu mi nga ta tsandzeka ku wu tiyisela,+ kambe loko mi ringiwa xi ta mi nyika ndlela ya ku huma swaku mi kota ku wu tiyisela.+
14 Se varhandziwa, mi nga tshukeni* mi gandzela swifaniso swa mavunhwa.+
15 Ni vulavula na n’wina ku fana ni loko mi li vanhu va ku twisisa; swi pimeni hi n’wexe swaku leswi ni swi vulaka i ntiyiso kumbe a hi ntiyiso.
16 Loko hi phuza ka kopo ya minkateko leyi hi yi khongelelaka, a hi pfuneki ka ngati ya Kreste ke?+ Loko hi dla pawu leli hi li khemaka, a hi pfuneki ka muzimbha wa Kreste ke?+
17 A pawu i lin’we, se hambileswi hi nga vanyingi, hi muzimbha wun’we+ hikusa hinkwerhu hi dla pawu loleli la lin’we.
18 Pimisani hi Vayisrayele: Nkama a va dla magandzelo lama humesiwaka ka altari, a vo ngo dla xikan’we ni Xikwembu ke?+
19 Ni lava ku vula yini hi marito lawa? Ni lava ku vula swaku leswi phahleliwaka xifaniso i swa lisima kumbe xifaniso xa kona i xa lisima ke?
20 Ihim, a ni vuli swona! Kambe ni vula swaku magandzelo lawa ma yendliwaka hi vamatiko, va ma yendlela madimoni, a va ma yendleli Xikwembu;+ se mina a ni lavi swaku mi titlhanganisa ni madimoni.+
21 A mi nge swi koti ku phuza ka kopo ya Yehovha* ni ka kopo ya madimoni. A mi nge swi koti ku dla ka “meza wa Yehovha”*+ ni ka meza wa madimoni.
22 ‘A ho kwatisa Yehovha’?*+ Phela hina a hi mu tluli hi matimba, a hi swona ke?
23 Swilo hinkwaswu swa pfumeleliwa,* kambe a hi swilo hinkwaswu swi pfunaka. Swilo hinkwaswu swa pfumeleliwa, kambe a hi swilo hinkwaswu swi yakaka.+
24 Mun’wani ni mun’wani a nga lavi leswi nga ta pfuna yena ntsena, kambe a a lavi leswi nga ta pfuna van’wani.+
25 Dlanani nyama hinkwayu leyi xavisiwaka bazara,* mi nga vutisi nchumu hi mhaka ya lipfalu la n’wina,
26 hikusa “misava ni hinkwaswu leswi nga ka yona i swa Yehovha.”*+
27 Loko munhu lweyi a kalaka a nga li mupfumeli a mi rhamba, naswona mi swi tsakela ku ya, dlanani hinkwaswu leswi mi nga ta phameliwa swona; mi nga vutisi nchumu hi mhaka ya lipfalu la n’wina.
28 Kambe loko munhu a tshuka a mi byela a ku: “Swakudla leswi swi phahleliwe swikwembu,” mi nga dleneni hi mhaka ya leswi a nga mi byela ni hi mhaka ya lipfalu.+
29 A ni vuli lipfalu la n’wina kambe ni vula la lweyi a nga mi ba ndleve. Hikusa hi mhaka muni chunseko wa mina wu fanele wu yavanyisiwa hi lipfalu la munhu mun’wani?+
30 Loko swi ku leswi ni swi dlaka ni rhange hi ku khensa, hi mhaka muni ni soliwa hi swakudla leswi ni nga swi khensa ke?+
31 Kutani hambi mi dla kumbe mi phuza kumbe mi yendla yini na yini, yendlani hinkwaswu swaku mi dzunisa Xikwembu.+
32 Tivoneleni swaku mi nga kwatisi Vayuda, Vagriki ni bandla la Xikwembu,+
33 ku fana na mina ni zamaka ku tsakisa vanhu hinkwavu ka swilo hinkwaswu; a ni lavi leswi pfunaka mina ntsena+ kambe ni lava leswi pfunaka va ku tala swaku va ta ponisiwa.+
Tinhlamunselu ta le hansi
^ Hi Xigriki: “porneía”. Vona Ntlhamuselo.
^ Vona Xiyengetelo A5.
^ Hi Xigriki: “muhelisi.”
^ Hi Xigriki: “balekani”.
^ Vona Xiyengetelo A5.
^ Vona Xiyengetelo A5.
^ Vona Xiyengetelo A5.
^ Kumbe: “swi le nawini”.
^ Kumbe: “lomu ku xavisiwaka tinyama”.
^ Vona Xiyengetelo A5.
