Tihosi Ta Ku Sungula 5:1-18
5 A nkama Hirami hosi ya Tiru+ a nga twa swaku Solomoni a langiwile swaku a va hosi a pfaleta papayi wa yena, a rhume vatirhi va yena va ya ka Solomoni hikusa Hirami a a li munghanu wa Davhida.+
2 Se Solomoni na yena a rhuma vanhu va ya ka Hirami,+ va fika va ku:
3 “U swi tiva kahle swaku papayi wa mina Davhida a nga swi kotanga ku yaka yindlo leyi a ku ta dzunisiwa vito la Yehovha Xikwembu xa yena ka yona hi mhaka ya tinyimpi leti a a ti lwa ka matlhelo hinkwawu, anze nkama lowu Yehovha a nga veka valala va yena hansi ka minkondzo ya yena.+
4 Kambe swoswi Yehovha Xikwembu xa mina a ni humulisile ka matlhelo hinkwawu.+ A ku na munhu lweyi a lwaka na mina naswona a ku na nchumu xa ku biha lexi yendlekaka.+
5 Ni lava ku yaka yindlo leyi ku nga ta dzunisiwa vito la Yehovha Xikwembu xa mina ka yona, hi ku ya hi leswi Yehovha a nga tshembisa papayi wa mina Davhida a ku: ‘N’wana wa wena lweyi ni nga ta mu veka ka xitshamu xa wena xa wuhosi, hi yena a nga ta ni yakela yindlo leyi ku nga ta dzunisiwa vito la mina ka yona.’+
6 Swoswi rhuma vatirhi va wena swaku va ni tsemela minsinya ya mikedari ya le Lebanoni.+ Vatirhi va mina va ta tirha ni vatirhi va wena. Ni ta hakela vatirhi va wena hi leswi u nga ta swi lava, hikusa wa swi tiva swaku ka hina a nga kona lweyi a kotaka ku tsema minsinya ku fana ni Vasidoni.”+
7 Nkama Hirami a nga twa leswi Solomoni a nga swi hlaya, a tsake hintamu a ku: “Namuntlha a ku dzunisiwe Yehovha hikusa a nyike Davhida n’wana wa ku tlhariha swaku a fuma vanhu va vanyingi!”+
8 Hirami a rhuma vanhu va ya byela Solomoni va ku: “Ni swi twile leswi u nga swi hlaya naswona ni ta swi yendla hinkwaswu. Ni ta rhumela timhandzi ta mikedari ni ta yunipa.+
9 Vatirhi va mina va ta teka timhandzi aLebanoni va ti yisa lwandle, ni gama ni ti boha ni ti fambisa hi lwandle, ni ti yisa lomu u nga ta ni byela swaku ti ya kona. Ni ta va byela swaku va ti tlhantlha kolanu se wena u ta ti teka u famba na tona. U ta gama u ni hakela hi ku nyika ndjangu wa mina swakudla.”+
10 Hirami a nyika Solomoni timhandzi ta mikedari ni ta yunipa leti a nga ti kombela.
11 Solomoni a nyika Hirami 3.200.000* wa makilu* ya trigu swaku swi va swakudla swa yena ni ndjangu wa yena ni 4.400 wa malitru* ya mafurha yamanene ya mawolivhera. Hi leswo Solomoni a a nyika Hirami lembe ni lembe.+
12 Yehovha a nyika Solomoni wutlharhi, hi ku ya hi leswi a nga mu tshembisa swona.+ Se Hirami na Solomoni va hanyisana hi ku rhula va gama va yendla ntwananu.
13 Hosi Solomoni a rhume 30.000 wa vavanuna swaku va mu tirhela ka tiko hinkwalu la Israyele.+
14 A a va rhuma swaku va ya Lebanoni hi mintlawa ya 10.000 leyi txintxanaka wheti ni wheti. A va tirha wheti aLebanoni va gama va muka kaya va ya tshama tiwheti timbirhi; Adonirami+ hi yena a a vonelela vavanuna lava.
15 Solomoni a a ni 70.000 wa vatirhi lava a va rhwalela minchumu ni 80.000 wa vatirhi lava a va tsema maribye+ atintshaveni,+
16 ni 3.300 wa varhangeli+ lava a nga va veka swaku va vonelela vatirhi.
17 Hosi yi va rhume swaku va txela maribye yamakulu ni maribye ya ku durha,+ se va ma fayetela kahle+ swaku va ta sungula ku yaka yindlo hi wona.+
18 Vatirhi va Solomoni ni va Hirami lava tirhaka ka ku yaka ni Vajebali+ va tsema maribye va tlhela va lunghisela timhandzi swaku va ta yaka yindlo.
Tinhlamunselu ta le hansi
^ Hi Xiheberu: “20 wa tikoro”. Vona Xiyengetelo B14.
^ Hi Xiheberu: “20.000 wa tikoro”. Vona Xiyengetelo B14.
^ Kumbe: “três milhões e duzentos mil”.
