Samuwele Wa Ku Sungula 29:1-11
-
Vafilista va nga mu tshembi Davhida (1-11)
29 Vafilista+ va hlengeleta masonchwa ya vona hinkwawu aAfeki, kasi Vayisrayele va gwimba matende akusuhi ni xihlovo aYezreyeli.+
2 Tihosi ta Vafilista a ti hundza ti li ni mintlawa ya 100 ni ya 1.000 wa masonchwa, kasi Davhida ni masonchwa ya yena a va va landzelela hi ndzhaku na va na Akixi.+
3 Kambe varhangeli va Vafilista va ku: “A Vaheberu lava va lava yini lani?” Akixi a hlamula varhangeli va Vafilista a ku: “Lweyi i Davhida mutirhi wa Hosi Sawulo wa Israyele, lweyi se a nga ni lembe ni ku tlula na a tshama na mina.+ A ni se vona nchumu xa ku biha ku sukela siku leli a nga baleka a ta ka mina anze namuntlha.”
4 Kambe varhangeli va Vafilista va mu kwatela va ku: “Tlhelisa munhu lweyi.+ A a tlheli ka ndhawu leyi u nga mu nyika yona. U nga mu tshiki a famba na hina hikusa a nga tshuka a hi djikela anyimpini.+ A nga tshuka a lava ku tsakisa hosi ya yena hi ku dlayisa masonchwa ya hina.
5 A hi yena Davhida lweyi a va mu yimbelelela na va txina va ku:
‘Sawulo a dlaye 1.000,Kambe Davhida a dlaye 10.000’?”+
6 Kutani Akixi+ a vitana Davhida a ku: “Na funga hi vito la Yehovha Xikwembu lexi hanyaka swaku u munhu wa ku lulama, naswona a ni ta swi tsakela swaku u famba ni masonchwa ya mina anyimpini,+ hikusa a ni se vona nchumu xa ku biha ka wena ku sukela siku leli u nga ta ka mina anze namuntlha.+ Kambe varhangeli van’wani va Vafilista a va ku tshembi.+
7 Se timukeli hi ku rhula, naswona u nga yendli nchumu lexi nga ta kwatisa varhangeli va Vafilista.”
8 Kambe Davhida a vutisa Akixi a ku: “Hi mhaka muni? Kasi ni yo wonha yini? Ko va ni nchumu xa ku biha u nga xi vona ka mina ku sukela siku leli ni nga fika ka wena hi lona anze namuntlha? Hi mhaka muni ni nga fanelanga ni ya lwa ni valala va wena hosi ya mina?”
9 Akixi a hlamula Davhida a ku: “Ni ku vona na u li munhu wa ku lulama ku fana ni ntsumi ya Xikwembu.+ Kambe varhangeli va Vafilista va te: ‘U nga mu tshiki a famba na hina anyimpini.’
10 Kutani pfukani na ka ha li mpundzu hintamu ni vatirhi va hosi ya wena lava u nga ta na vona; pfukisani mi muka na ka ha li mpundzu hintamu nkama li sungulaka ku xa.”
11 Se Davhida ni vanhu va yena va pfuka na ka ha li mpundzu hintamu va tlhela va ya ka tiko la Vafilista, kasi Vafilista va ya Yezreyeli.+
