Samuwele Wa Ku Sungula 17:1-58
17 Se Vafilista+ va hlengeleta masonchwa ya vona swaku ma tilulamisela ku ya nyimpini. Va tlhangane aSoko,+ ku nga tiko la Yuda, va gama va gwimba matende aEfexi-Damimi,+ ku nga ndhawu leyi nga xikarhi ka Soko ni Azeka.+
2 Sawulo ni masonchwa ya Israyele na vona va hlengeletana va gwimba matende ka Nkova wa Elayi,+ va tilulamisela ku lwa ni Vafilista.
3 Vafilista a va li henhla ka ntshava ka tlhelo lin’we, kasi Vayisrayele a va li henhla ka ntshava ka tlhelo lelin’wani; a va hambanisiwe hi nkova.
4 Se ku ta sonchwa la matimba* leli a li huma ka matende ya Vafilista; vito la lona a ku li Goliyadi.+ A a psaliwe Gati+ naswona a a lehe kolomuyani ka mametru manharhu.*
5 A a yambale kapaseti la kobre ka nhloko ya yena ni mpahla ya nyimpi leyi a yi yendliwe hi swinsimbani. Mpahla leyi ya nyimpi a yi peza+ kolomuyani ka 57 wa makilu.*
6 A a bohelele minenge ya yena hi minchumu ya ku tivhikela hi yona+ ya kobre, naswona a a ni tlharhi la kobre leli a a li veke ka nhlana wa yena.
7 Nhonga ya tlharhi la yena a yi li yikulu ku fana ni mhandzi leyi a va lukela ka yona tinguvu,+ kasi lahayani ka ku tlhava hi kona a ku yendliwe hi nsimbi naswona a ku peza kolomuyani ka 7 wa makilu;* a ku ni sonchwa leli a li mu khomela xa ku tivhikela hi xona leli a li nyime phambheni ka yena.
8 Se a fika a nyima, a sungula ku vulavula hi rito lalikulu a byela masonchwa ya Vayisrayele+ a ku: “Hi mhaka muni mi tihetela nkama hi ku tilulamisela ku ta lwa nyimpi? Mina hi noxe ni Mufilista wa matimba swinene kasi n’wina mo va vatirhi va Sawulo. Langani wanuna, mi mu tshika a ta lwa na mina.
9 Loko o swi kota ku lwa na mina a ni dlaya, hi ta va swikarawa swa n’wina. Kambe loko mina ni mu hlula ni mu dlaya, n’wina mi ta va swikarawa swa hina mi hi tirhela.”
10 Se Mufilista a poyila Vayisrayele+ a ku: “Loko mi ni sonchwa leli nga lwaka na mina, li tiseni halenu swaku hi ta lwa!”
11 A nkama Sawulo ni Vayisrayele hinkwavu va nga twa leswi Mufilista lweyi a nga swi hlaya, va sungula ku chava hintamu va tlhela va rhurhumela.
12 Davhida a a li n’wana wa Yese wa Muefrata+ lweyi a a tshama Betlehema+ aYuda. Yese+ a a li ni 8 wa vana va madjaha,+ naswona se a a gugile nkama na ku fuma hosi Sawulo.
13 Madjaha manharhu yamakulu ya Yese a ma fambe na Sawulo nyimpini.+ A wamukulu wa kona a ku li Eliyabi,+ ku gama ku landzela Abinadabi+ kasi wa wunharhu a ku li Xamaya.+
14 Davhida a ku li yena wamutsongo wa kona ka hinkwavu,+ lava vavakulu va vanharhu va fambe na Sawulo.
15 Minkama yin’wani Davhida a a suka ka Sawulo a ya aBetlehema a ya lusa tinyempfu+ ta papayi wa yena.
16 Hi nkama wolowo Goliyadi a a ta nimixo a tlhela a ta nimadlambu swaku a ta poyila Vayisrayele. A yendle leswo 40 wa masiku.
17 Se Yese a byela Davhida n’wana wa yena a ku: “Ni kombela u teka xisakana* xa mbhacha ni 10 wa mapawu, u hantlisa u ya nyika vamakwenu va wena lomu va nga gwimba kona matende.
18 U tlhela u teka 10 wa swikhemu swa keju* u ya nyika murhangeli lweyi a rhangelaka 1.000 wa masonchwa. U tlhela u vona swaku vo yini vamakwenu va wena u gama u vuya ni xikombiso lexi nga ta kombisa swaku va kahle.”
19 A va li na Sawulo ni masonchwa laman’wani hinkwawu ya Israyele ka Nkova wa Elayi,+ na va lwa ni Vafilista.+
20 Se Davhida a pfuka nimpundzu hintamu a siya tinyempfu ni mulusi mun’wani. A yendle leswi Yese a nga mu rhuma swona, a teka swakudla a famba na swona. A nkama a nga fika lani masonchwa a ma gwimbe matende kona, a kume swaku a mo huma ma ya lomu nyimpi yi lweliwaka kona na ma vanga guwa ma kombisa swaku ma ya ku lweni.
21 Kutani masonchwa ya Vayisrayele ni ya Vafilista ma nyima ka tindhawu ta wona na ma txuvukana swaku ma ta lwa nyimpi.
22 Hi ku hantlisa Davhida a xixa leswi a a ta na swona a nyika lweyi a a tshama ni swidjumba, a tsutsuma a ya lomu nyimpi a yi lweliwa kona. A nkama a nga fika, a sungule hi ku vutisa vamakwavu va yena swaku vo yini.+
23 Na a ha vulavula na vona, ku gama ku humelela sonchwa la matimba leli vitaniwaka Goliyadi,+ ku nga Mufilista lweyi a nga psaliwa Gati. A a huma hi ka ntlawa wa masonchwa ya Vafilista, a sungula ku vulavula swa ku fana ni leswi a nga swi hlaya ka ku sungula,+ se Davhida a mu twa.
24 A nkama masonchwa hinkwawu ya Israyele ma nga mu vona, ma sungula ku chava ma baleka.+
25 Kutani masonchwa ya Israyele ma ku: “Ma mu vona wanuna lwiyani a taka? A tela ku ta poyila Vayisrayele.+ Phela lweyi a nga ta mu dlaya, a hosi yi ta mu nyika a tshomba la linyingi, yi tlhela yi mu nyika n’wana wa yona wa ntombhi+ swaku a va nsati wa yena. Ndjangu wa yena a wu nga ha ta hakela rhesa;* naswona a wu nga ha ta sindzisiwa ku yendla mintirho ya hosi ya Israyele.”
26 Se Davhida a sungula ku vutisa masonchwa lawa a ma nyime kusuhi na yena a ku: “A ta nyikiwa yini munhu lweyi a nga ta dlaya Mufilista lwiyani, a yendla swaku Vayisrayele hinkwavu va nga ha poyiliwi? O va mani Mufilista lweyi, wa ku kala a nga tirheli Xikwembu,* swaku a ta poyila masonchwa ya Xikwembu lexi hanyaka?”+
27 Se masonchwa ma tlhela ma mu byela leswi ma nga mu byela swona ka ku sungula, ma ku: “Hi leswi a nga ta nyikiwa swona munhu lweyi a nga ta mu dlaya.”
28 A nkama Eliyabi+ makwavu wa yena wamukulu a nga mu twa na a vulavula ni masonchwa lawayani, a kwatela Davhida a gama a ku: “U lava yini lani? U ti siye na mani tinyempfu letiyani tatitsongo amananga?+ Na swi tiva swaku wa tibyela ni swaku u navela swa ku biha ka mbilu ya wena; u tele ku ta vona nyimpi lani.”
29 Se Davhida a hlamula a ku: “Kasi ni yo wonha yini? A no vutisa ntsena!”
30 Kutani Davhida a suka lani a ku na Eliyabi a ya ka munhu mun’wanyani a mu vutisa xivutiso xoxi xa xin’we.+ Se vanhu va mu byela swa ku fana ni leswi a nga byeliwa swona ka ku sungula.+
31 Van’wani va swi twile leswi Davhida a nga swi hlaya, va gama va ya byela Sawulo. Sawulo a gama a mu vitana.
32 Davhida a byela Sawulo a ku: “Mi nga heli ntamu hi mhaka ya yena. Mina mutirhi wa wena ni ta famba ni ya lwa ni Mufilista lwiyani.”+
33 Kambe Sawulo a byela Davhida a ku: “A wu nge swi koti ku ya lwa ni Mufilista lwiyani, hikusa wa ha li mufana+ kasi yena i sonchwa* ku sukela na a ha li mutsongo.”
34 Se Davhida a hlamula Sawulo a ku: “Mina mutirhi wa wena a ni lusa tinyempfu ta papayi wa mina, se ku gama ku ta nghonyama+ yi khoma nyempfu, siku lin’wani ku ta ursu* na lona li khoma nyempfu.
35 Hinkwaswu swiharhi leswi, ni swi hlongolisile ni swi ba swi wa hansi ni teka nyempfu leyi a yi li ka nomo wa swona. A nkama swi nga lava ku lwa na mina, ni swi khome hi malepfu* ni swi ba ni swi dlaya.
36 Mina mutirhi wa wena ni dlaye nghonyama ni ursu, se Mufilista lwiyani wa ku kala a nga tirheli Xikwembu* a ta fana na swona, hikusa a poyile masonchwa ya Xikwembu lexi hanyaka.”+
37 Davhida a tlhela a ku: “Yehovha lweyi a nga ni ponisa ka minwala ya nghonyama ni ya ursu, hi yena a nga ta ni ponisa ka voko la Mufilista lweyi.”+ Sawulo a byela Davhida a ku: “Famba, Yehovha a a ve na wena.”
38 Kutani Sawulo a yambexa Davhida mpahla ya yena ya nyimpi. A mu yambexe ni kapaseti la kobre ka nhloko ya yena, a tlhela a mu yambexa ni mpahla ya nyimpi leyi nga yendliwa hi swinsimbani.
39 Davhida a tlhoma xipada xa yena ka mpahla leyi a a yi yambalile, a gama a ringisa ku famba kambe a tsandzeka, hikusa a a nga swi tolovelanga. Davhida a byela Sawulo a ku: “A ni swi koti ku famba na ni yambale minchumu leyi, hikusa a ni yi tolovelanga.” Se Davhida a yi hlivila,
40 a gama a teka nhonga ya yena a rholela 5 wa maribye ya ku rhetemuka ka nkova, a ma peta ka xipaxtani xa yena lexi a a famba na xona loko a ya ku luseni, naswona ka voko la yena a a tamele xibalakatsa.+ Kutani a yela Mufilista.
41 Se Mufilista a ya a tshinela kusuhi na Davhida na a ni sonchwa leli a li mu tamelela xa ku tivhikela hi xona phambheni ka yena.
42 A nkama Mufilista a nga vona Davhida, a sungula ku mu poyila hikusa a a li mufana wa ku saseka ntsena.+
43 Kutani Mufilista lweyi a vutisa Davhida a ku: “No va mbyana mina,+ u zaka u ni tela na u khome tinhonga?” A gama a rhuka Davhida na a funga hi swikwembu swa yena.
44 Se Mufilista a byela Davhida a ku: “Tani ka mina, ni ta teka nyama ya wena ni nyika swinyanyani ni swiharhi swa khwati.”
45 Davhida a byela Mufilista a ku: “U ta ka mina na u khome xipada ni matlharhi mambirhi,+ kambe mina ni ta ka wena hi vito la Yehovha murhangeli wa tintsumi,+ Xikwembu xa masonchwa ya Vayisrayele lexi u nga xi poyila.+
46 Namuntlha Yehovha a ta ku nyikela ka mavoko ya mina,+ ni ta ku dlaya ni tlhela ni ku tsema nhloko; naswona namuntlha mintsumbu ya masonchwa hinkwawu ya Vafilista ni ta yi nyikela ka swinyanyani swa matilo ni ka swiharhi swa khwati; se vanhu va misava hinkwayu va ta swi tiva swaku ku ni Xikwembu aIsrayele.+
47 Kutani hinkwavu lava nga kona lani, va ta swi tiva swaku Yehovha a nga ponisi hi xipada kumbe hi tlharhi,+ phela nyimpi i ya Yehovha,+ naswona a ta mi nyikela hinkwenu ka mavoko ya hina.”+
48 Se Mufilista a tshinela hi kutsongokutsongo kusuhi na Davhida, a tshinela kusuhi swaku a ta kumana na Davhida, kambe hi ku hantlisa Davhida a tsutsuma a ya lani masonchwa ya Vafilista a ma li kona swaku a ta tlhangana ni Mufilista.
49 Kutani Davhida a peta voko ka xipaxtani xa yena, a humesa ribye a li peta ka xibalakatsa, a txopa Mufilista ka ximombo. Ribye li nghena ka ximombo xa Mufilista, se Mufilista a wa hansi hi ximombo.+
50 Davhida a mu hlulise swoleswo Mufilista hi xibalakatsa ni ribye; a txope Mufilista a mu dlaya, hambileswi Davhida a a nga na xipada.+
51 Davhida a tsutsuma a ya fika a nyima henhla ka Mufilista, a khoma xipada xa yena,+ a xi tlomula lani a a xi tlhome kona a gama a mu tsema nhloko, swaku a ta vona swaku a file hikakunene. A nkama Vafilista va nga vona swaku nhenha ya vona yi file, va baleka.+
52 A nkama ma nga vona leswo, masonchwa ya Israyele ni ya Yuda ma vanga guwa na ma hlongolisa Vafilista ku sukela ka nkova+ anze ka swipfalu swa Ekroni.+ A mintsumbu ya Vafilista a yi yo mbaa mbaa mbaa, ku sukela aXarayimi+ anze Gati ni Ekroni.
53 A nkama Vayisrayele va nga vuya hi ku hlongoliseni ka Vafilista, va teketele hinkwaswu leswi a swi li ka matende ya Vafilista.
54 Se Davhida a teka nhloko ya Mufilista a famba na yona aYerusalema, kambe matlharhi ya Mufilista a ma veka ka tende la yena.+
55 Nkama lowu Sawulo a nga vona Davhida na a huma swaku a ya tlhangana ni Mufilista, a vutise Abineri+ murhangeli wa masonchwa a ku: “He Abineri, kasi a mufana lweyi i n’wana wa mani?”+ Abineri a mu hlamula a ku: “A ni lavi ku ku hembela wena hosi, a ni swi tivi!”
56 Hosi yi ku: “Zama ku tiva swaku mufana lweyi i n’wana wa mani.”
57 A nkama Davhida a nga vuya hi ku dlayeni ka Mufilista, hi ku hantlisa Abineri a mu teka a famba na yena ka Sawulo na Davhida a khome nhloko ya Mufilista.+
58 Sawulo a mu vutisa a ku: “He djaha, u n’wana wa mani?” Davhida a mu hlamula a ku: “Ni n’wana wa Yese+ mutirhi wa wena wa le Betlehema.”+
Tinhlamunselu ta le hansi
^ Ku nga sonchwa leli a li rhangela masonchwa man’wanyani.
^ Hi Xiheberu: “6 wa swisungunu ni xiyandla xin’we.” Vona Xiyengetelo B14.
^ Hi Xiheberu: “5.000 wa tixikele.” Vona Xiyengetelo B14.
^ Hi Xiheberu: “600 wa tixikele”. Vona Xiyengetelo B14.
^ Hi Xiheberu: “efa”. Vona Xiyengetelo B14.
^ Hi Xiheberu: “leiti”.
^ Kumbe: “impoxtu; tinemba.”
^ Hi Xiheberu: “wa ku kala a nga tsemanga nsuvu.”
^ Hi Xiheberu: “wanuna wa nyimpi”.
^ Kumbe: “bere”.
^ Kumbe: “nkolo”.
^ Hi Xiheberu: “wa ku kala a nga tsemanga nsuvu”.
