Eka malembe ya 40 lama hundzeke, hi February 2, 1973, eWallkill le New York, U.S.A., ku sungule ku tirhisiwa michini leyintshwa leswaku ku kandziyisiwa timagazini ta Xihondzo xo Rindza ni Xalamuka!

Eka malembe ya khume ku nga si endliwa sweswo, Timbhoni ta Yehovha ti xave ndhawu kwalaho leswaku ti ta rima ti kuma swakudya swa lava tirhaka eyindlu-nkulu ya tona eBrooklyn, le New York. Kambe ndhawu yoleyo a yi ta tlhela yi tirhiseriwa ku humesa muxaka wun’wana wa swakudya, ku nga swakudya swa moya.—Matewu 24:45-47.

Philip Wilcox, loyi hi nkarhi wolowo a a ri mulanguteri wa ndhawu yo kandziyisela eka yona, u tsundzuka leswi mayelana ni siku leri michini yi sunguleke ku tirha ha rona eWallkill: “Swi hi tekele kwalomu ka n’hweti ku va hi hlanganisa michini leyi, leyi nga ni rivilo lerikulu. Loko hi yi hlanganisile, hi sungule ku yi ringeta ku vona loko yi tirha. Ku nga ri khale hi sungule ku kandziyisa magidi ma nga ri mangani ya timagazini. Hi tlhele hi ti rhumela endhawini yo kandziyisela eka yona eBrooklyn laha ti rhumeriweke emavandlheni lama endleke swikombelo. A hi tiyimisele ku londzovota timagazini hinkwato.”

Timbhoni ta Yehovha ti ake ndhawu leyintshwa yo kandziyisela eka yona leyi a yi ta pfuneta eka ntirho wa tona lowukulu wo kandziyisa lowu hi nkarhi wolowo a wu endleriwa le Brooklyn. Eku sunguleni ka va-1970, a ku ya ku va ni xilaveko xa minkandziyiso ya Bibele ku tlula leyi a yi kandziyisiwa hi siku, hikwalaho ndhawu yo kandziyisela eka yona ya le Brooklyn yi boheke ku tirha vusiku ni nhlikanhi leswaku yi kota ku fikelela swikombelo leswi endliwaka.

Loko muako wo sungula wo kandziyisela eka wona wu herile le Wallkill, ku nghenisiwe michini ya mune yo kandziyisa, ku tlhela ku va ni ndhawu yo paka minkandziyiso leyi rhumeriwaka swin’we ni Holo ya Mfumo. Hambiswiritano, loko ndhawu leyi yi nga si tirha hi ku helela, ku akiwe muako wun’wana lowukulu lowu khomaneke ni lowo sungula. Xilaveko xa minkandziyiso ya Bibele xi andzile lerova ku engeteriwe michini yin’wana ya tsevu yo kandziyisa eka muako wolowo lowu a wa ha akiwa.

Loko malembe ma ri karhi ma famba, thekinoloji ya michini yo kandziyisa yi antswisiwile naswona xilaveko xa minkandziyiso ya Bibele xi ve lexi andzaka. Leswaku hi kota ku fambisana ni ku cinca koloko, hi boheke ku xava michini yin’wana ni ku ndlandlamuxa ndhawu yo kandziyisela eka yona eWallkill hi ku phindha-phindha. Hi 1980, muchini wa khale lowu vuriwaka letterpress wu siviwe hi michini leyi nga ni rivilo lerikulu.

Hi 2004, ndhawu yo kandziyisela eka yona ya le Brooklyn yi pfariwile ivi tibuku ti sungula ku kandziyisiwa eWallkill. Hi 2010, ntirho wo kandziyisa timagazini wu tlhele wu rhurhiseriwa le n’walungu, ku nga erhavini ra Timbhoni ta Yehovha ra le Canada. Muchini lowuntshwa lowu nga kona kwalaho wu kota ku kandziyisa timagazini ta 200 000 hi awara.

Namuntlha ndhawu yo kandziyisela ya le Wallkill yi ni michini ya rivilo lerikulu naswona ku ni vavanuna ni vavasati lava tirhaka hi ku tirhandzela va 281. N’wexemu, ku kandziyisiwe tibuku ni Tibibele leti tlulaka 17 wa timiliyoni. Handle ka ndhawu yo kandziyisela ya Wallkill na Canada le Amerika N’walungu, Timbhoni ta Yehovha ti ni tindhawu tin’wana ta 13 to kandziyisela eka tona leti kumekaka eAfrika, Asia, Australia, Yuropa ni le Amerika Dzonga—leti pfunetaka ku enerisa xilaveko xa moya xa vanhu va timiliyoni.—Matewu 5:3.