Hi November 2012, Timbhoni ta Yehovha ti xavise Hotela ya Bossert. Swilotlelo swi nyikiwe n’wini wa yona lontshwa naswona ku fana ni vaendzi vo tala, Timbhoni ti humile ti famba. Mali leyi hotela leyi yi xavisiweke ha yona yi ta tirhiseriwa ku yisa emahlweni ntirho wa misava hinkwayo wo dyondzisa Bibele wa Timbhoni ta Yehovha.

Timbhoni ti xavise muako lowu wa swithezi swa 14 lowu akiweke hi xitayela xa Italian-Renaissance hileswi vatirhi va le ntsindza wa tona va nga ta suka eBrooklyn le New York kutani va rhurhela emiakweni leyintshwa eWarwick le New York. Ku rhurha koloko ku languteriwe leswaku ku teka malembe yo hlayanyana.

Louis Bossert, muxavisi wa timbalelo wa le New York, u ake muako wa Bossert hi 1909. A wu ta va “hotela,” leyi eka yona a ku ta tshama vaaki va nkarhinyana ni va nkarhi hinkwawo. Leswi yi hatleke yi tala, u yi engeterile hi 1914, naswona se a yi lehe hi mpimo lowu lavaka ku yi phindha kambirhi leyo sungula. Hi 1916 ku engeteriwe rhesiturente elwangwini ra yona leri vitaniwaka Lwangu ra Marine.

Hi va-1980, Timbhoni ta Yehovha ti xave muako lowu kutani ti wu pfuxeta leswaku wu fikelela swilaveko swa vatirhi va le ntsindza wa tona lava a va ta tshama kwalaho. Vatirhi va cince swihambukelo swi va tiholo to dyela eka tona naswona rhesiturente ya le lwangwini yi ve holo yo wisela eka yona ya vatshami va kwalaho ni vaendzi va vona.

Ku sukela hi 2010, muako lowu wu rhurhele Timbhoni ta Yehovha leti humaka emisaveni hinkwayo leti teleke ku ta valanga miako leyi nga ntsindza.

N’wini wa wona lontshwa u hlela ku wu pfuxeta kutani a wu endla hotela. Ku cinciwa ka muako wa Bossert wu nga ha vi tifuleti leti nga ni kamara rin’we ro tshama ni xihambukelo kutani wu va hotela ya manyunyu swi ta olova hileswi wu nga exiyin’weni lexinene.

Loko Timbhoni ta Yehovha ti nga si rhurhela emuakweni wa Bossert, se a wu ri ni malembe wu tshikiwile wu nga khathaleriwi. Makhumbi ya wona yo basa a ma thyakile naswona tikhonisi letikulu leti vatliweke ta terra-cotta ta le handle leti fambaka ehenhla ka muako a ti tshovekile naswona a ti nga ha languteki. Mafasitere ya kona a ma ri ya khale naswona a ma nga wu pfali kahle moya. Matuva hi wona ntsena lawa a ma tshama eLwangwini ra Marine. Kutani ku sunguriwe ntirho lowukulu wo pfuxeta muako lowu. Timbhoni ta Yehovha leti humaka eswifundzheni hinkwaswo swa United States ti nyikele hi nkarhi ni vutshila bya tona entirhweni lowu, lowu hetiweke hi 1991.

Hi nkarhi wa ku pfuxetiwa ka wona, Timbhoni ti basise ni ku lunghisa ribye ra muhuthu ni ra granite leri ku akiweke ha rona ehandle. Ti suse tikhonisi leti vatliweke ti ti siva hi leti fanaka na tona leti endliweke hi fiberglass leyi nga tikiki. Ti hoxe mafasitere lama endliweke hi pulanga ra buraweni.

Ti tlhele ti pfuxeta endzeni ka muako hi ku helela, ti tikarhatela ku lunghisa ndhawu leyi nga ekusuhi ni nyangwa wo nghena, leyi eku sunguleni a yi saseke ngopfu. Leswaku ti lunghisa makhumbi ya mavulu, ti kume maribye wolawo endhawini leyi lawa yo sungula a ma ceriwe eka yona le Italy. Nakambe vatirhi va pfuxete silingi leyi sasekisiweke hi swifaniso swa vumba leswi onhiweke hi mati.

Ku lunghisa tiphuphu letikulu ta nsimbi ta le kusuhi ni nyangwa wo nghena swi ve ntlhontlho lowukulu. Eku sunguleni, tiphuphu teto a ti sasekisiwe hi endlelo ra scagliola, ku nga ndlela yo sindza ya le Italy leyi endleka leswaku nchumu wu languteka onge i mavulu. Hambiswiritano, a ti pendiwe minkarhi yo tala hi khale ka vini va muako lowu. Ku hava ni un’we wa vatirhi volavo va ku tirhandzela loyi a a swi tiva ku sindza hi ndlela ya scagliola. Layiburari ya yunivhesiti leyi nga ekusuhi ni kwalaho yi va nyike buku leyi hlamuselaka tindlela to sindza tiphuphu leswaku ti languteka onge i ta mavulu. Leswi vatirhi lava se a va ri ni rungula rero, va hete mavhiki va ri karhi va lunghisa tiphuphu leswaku ti fana swinene ni le ku sunguleni.

Loko ku pfuxetiwa ka muako lowu ku hetiwile hi 1991, a wu ri exiyin’weni lexinene naswona wu sasekile. Hikwalaho ko xiya matshalatshala lama endliweke, muako wa Bossert wu nyikiwe Sagwadi ya Lucy G. Moses Preservation hikwalaho ka ntirho lowu hlamarisaka wa ku wu pfuxeta.