Tikereke tin’wana ti vitana Mikayele “Saint Michael,” swi vonaka onge Yesu a a vitaniwa hi vito leri loko a nga si ta laha misaveni ni le ndzhaku ka loko a te emisaveni. a Mikayele u holove na Sathana endzhaku ka loko Muxe a file naswona Mikayele u pfune ntsumi leswaku yi va byela Daniyele rungula ra Xikwembu. (Daniyele 10:13, 21; Yuda 9) Mikayele u hanya hi ku landza vito rakwe leri vulaka leswaku “I Mani Loyi A Fanaka Ni Xikwembu?” U lwela vuhosi bya Xikwembu naswona u lwa ni valala va xona.​—Daniyele 12:1; Nhlavutelo 12:7.

 Twana ku hikwalaho ka yini swi twala ku vula leswaku Yesu i Mikayele ntsumi leyikulu.

•   Mikayele i “ntsumi leyikulu.” (Yuda 9) Xiga lexi nge “ntsumi leyikulu,” leswi vulaka “ndhuna ya tintsumi” xi humela eka matsalwa mambirhi eBibeleni. Eka matsalwa wolawo hinkwawo, xiga lexi xi le ka vun’we leswi vulaka leswaku ku ni ntsumi yin’we leyi nga ni xikhundlha xolexo. Rin’wana ra matsalwa wolawo ri vula leswaku Hosi Yesu la pfuxiweke u “ta xika hi le tilweni hi rito ro lerisa, hi rito ra ntsumi leyikulu.” (1 Vatesalonika 4:16) Yesu u ni “rito ra ntsumi leyikulu” hikuva hi yena Mikayele ntsumi leyikulu.

•   Mikayele u rhangela vuthu ra tintsumi. “Mikayele ni tintsumi ta yena va lwa ni dragona,” ku nga Sathana. (Nhlavutelo 12:7) Mikayele u ni vulawuri lebyikulu etilweni, hikuva u vitaniwa “un’wana wa tihosana letikulu” ni “hosana leyikulu.” (Daniyele 10:13, 21; 12:1) Hilaha xidyondzi David E. Aune wa Testamente Leyintshwa a vulaka hakona, swithopo leswi swi kombisa leswaku Mikayele i “ndhuna ya vuthu ra tintsumi.”

   Bibele yi boxa un’we ntsena la kongomisa vuthu ra tintsumi. Yi vula leswaku ‘Hosi Yesu u ta humelela hi le tilweni a ri ni tintsumi takwe ta matimba a ri endzilweni lowu pfurhaka, leswaku a xupula lava nga xi tiviki Xikwembu.’ (2 Vatesalonika 1:7, 8; Matewu 16:27) Yesu “u ye etilweni naswona tintsumi ni valawuri ni lava nga ni matimba va vekiwe ehansi ka yena.” (1 Petro 3:21, 22) A swi nga ta twala ku va Xikwembu xi veka Yesu na Mikayele leswaku va va tindhuna leti rhangelaka tintsumi to kwetsima. Kutani swa twala ku gimeta hi leswaku vito leri nge Yesu ni le ri nge Mikayele i ya munhu un’we.

•   Mikayele u “ta teka goza” hi “nkarhi wa maxangu” lowu nga si tshamaka wu va kona. (Daniyele 12:1) Eka buku ya Daniyele, xiga lexi nge “yima” mikarhi yo tala xi vula hosi leyi tekaka goza leswaku yi endla ntirho wa nkoka. (Daniyele 11:2-4, 21, Vuhundzuluxeri Bya Misava Leyintshwa Bya Matsalwa Yo Kwetsima) Yesu Kreste loyi a vitaniwaka “Rito ra Xikwembu,” u ta teka goza a lovisa valala va Xikwembu ni ku sirhelela vanhu va Xikwembu tanihi “Hosi ya tihosi.” (Nhlavutelo 19:11-16) U ta endla sweswo hi nkarhi wa “nhlomulo lowukulu lowu nga si tshamaka wu va kona hi mpfhuka misava yi va kona.”—Matewu 24:21, 42.