TIVHESE TA BIBELE LETI HLAMUSERIWEKE

Genesa 1:1—“Eku Sunguleni Xikwembu Xi Tumbuluxe Tilo Ni Misava”

TLANGA

“Eku sunguleni Xikwembu xi tumbuluxe tilo ni misava.”—Genesa 1:1, Bibele—Matsalwa Yo Kwetsima Ya Misava Leyintshwa.

“Eku sunguleni, Xikwembu xi tumbuluxile tilo ni misava.”—Genesa 1:1, Bibele—Mahungu Lamanene.

Leswi Genesa 1:1 Yi Vulaka Swona

Marito lama yo sungula ya le Bibeleni ma hlamusela swilo swimbirhi swa nkoka leswi nga ntiyiso. Xo sungula “tilo ni misava,” swi ve ni masungulo. Kasi xa vumbirhi swi tumbuluxiwe hi Xikwembu.—Nhlavutelo 4:11.

Bibele a yi hlamuseli leswaku Xikwembu xi tumbuluxe tilo ni misava rini kumbe ndlela leyi xi swi tumbuluxeke ha yona. Kambe ya hlamusela leswaku Xikwembu xi tumbuluxe tilo ni misava hi ku tirhisa “ntamu [wa xona] lowukulu ni hikwalaho ka matimba [ya xona] yo hlamarisa.”—Esaya 40:26.

Rito leri nge “tumbuluxe” ri hundzuluxeriwe ku suka eka riendli ra Xiheveru leri tirhiseriwaka ntsena ku hlamusela ntirho lowu Xikwembu xi wu endleke. a EBibeleni, i Yehovha b Xikwembu ntsena loyi a vuriwaka Mutumbuluxi.—Esaya 42:5; 45:18.

Mongo Wa Genesa 1:1

Vhese leyi yo sungula ya buku ya Genesa yi vulavula hi rungula ro tumbuluxa leri nga eka Genesa tindzima 1 na 2. Ku sukela eka Genesa 1:1 ku ya eka 2:4, hi ku komisa, Bibele yi hlamusela leswi Xikwembu xi swi endleke loko xi tumbuluxa misava ni swilo hinkwaswo leswi nga eka yona, ku katsa ni wanuna wo sungula ni wansati. Endzhaku ka sweswo, Bibele yi hlamusela swo tala hi ku tumbuluxiwa ka wanuna ni wansati.—Genesa 2:7-25.

Genesa yi hlamusela leswaku Xikwembu xi endle ntirho wo tumbuluxa hi “masiku” ya tsevu lama landzelelanaka. Lawa a ku nga ri masiku lama leheke tiawara ta 24, kambe i nkarhi lowu Bibele yi nga hlamuseliki leswaku a wu lehe ku fikela kwihi. Entiyisweni, rito “siku” a ro vula ntsena nkarhi lowu leheke tiawara ta 24. Mhaka leyi yi kombisiwe eka Genesa 2:4 leyi tirhisaka “siku” ni “nkarhi” hi nkarhi wun’we ku katsakanya ntirho hinkwawo lowu Xikwembu xi wu endleke hi masiku ya tsevu, ku ri leswi xi nga swi endla hi “siku” rin’we.

Mavunwa Lama Vanhu Va Ma Vulaka Hi Genesa 1:1

Mavunwa: Xikwembu xi tumbuluxe tilo ni misava eka malembe ya magidi ma nga ri mangani lama hundzeke.

Ntiyiso: Bibele a yi hlamuseli leswaku tilo ni misava swi tumbuluxiwe rini. Marito lama nga eka Genesa 1:1 a ma kanetani ni leswi vanhu va manguva lawa va swi vulaka leswaku tilo ni misava swi ni tibiliyoni ta malembe swi ri kona. c

Mavunwa: Genesa 1:1 yi vula leswaku Xikwembu i Vunharhu bya Tilo hikuva rito leri tirhisiweke laha ra Xiheveru leri nge “Xikwembu” ri le ka vunyingi.

Ntiyiso: Rito ra Xiheveru ’Elo·himʹ, leri nga evunyingini leri hundzuluxeriweke ri va “Xikwembu,” a ri vuli vanhu vo tala, kambe ro vula vukulu bya xona. The New Catholic Encyclopedia ya pfumela leswaku rito ’Elo·himʹ leri nga evunyingini leri nga eka Genesa 1:1 “mikarhi hinkwayo ri va ri ri eka vun’we kambe vunyingi bya rito leri byo kombisa xichavo ku nga ri nhlayo ya vanhu.”—Second Edition, Vholumo 6, tluka 272.

Hlaya Genesa ndzima 1 swin’we ni tinhlamuselo ta le hansi ni tivhese leti fambisanaka na ndzima leyi.

a HCSB Study Bible yi vula leswi hi rito leri: “Riendli ra Xiheveru bara’, leri vulaka ‘ku tumbuluxa,’ a ri si tshama ri kombetela eka munhu tanihi loyi a tumbuluxaka. Xisweswo rito bara’ ri hlamusela ntirho lowu endliwaka hi Xikwembu ntsena.”—Tluka 7.

b Yehovha i vito ra Xikwembu.—Pisalema 83:18.

c The Expositor’s Bible Commentary loko yi hlamusela nkarhi lowu yimeriwaka hi xiga xa Xiheveru lexi nga hundzuluxeriwa xi va “eku sunguleni” yi ri: “Xiga lexi a xi hlamuseli leswaku nkarhi lowu a wu lehe ku fikela kwihi.”—Revised Edition, Vholumo I, tluka 51.