“Hikuva Xikwembu a xi hi nyikanga moya wa vutoya, kambe xi hi nyike moya wa matimba ni wa rirhandzu ni wa mianakanyo leyinene.”—2 Timotiya 1:7, Bibele Ya Matsalwa Yo Kwetsima Ya Misava Leyintshwa.

 “Hikuva Xikwembu a xi hi nyikanga moya wa vutoya, kambe xi hi nyike moya wa matimba, ni wa rirhandzu, ni wa ku tikhoma.”—2 Timotiya 1:7, Bibele Ya Mahungu Lamanene.

 Xikwembu xi nga pfuna munhu leswaku a va ni xivindzi xo endla swilo leswinene. A xi swi lavi leswaku munhu a pfumelela “vutoya” byi dzima timitsu embilwini yakwe, ku nga ku chava loku nga n’wi sivelaka leswaku a endla ku rhandza ka Xona.

 Xiya vumunhu byinharhu lebyi Xikwembu xi hi nyikeke byona lebyi hlamuseriweke eka vhese leyi lebyi nga hi pfunaka hi hlula ku chava kumbe vutoya.

 “Matimba.” Vakreste va le nkarhini lowu nga hundza va ve ni xivindzi xo kota ku tirhela Xikwembu hambiloko va ri ehansi ka swiyimo swo tika ni loko va xanisiwa hi valala va vona. A va pfumelelanga ku chava ku va heta matimba. (2 Vakorinto 11:23-27) Va swi kote njhani sweswo? Muapostola Pawulo u te: “Eka hinkwaswo ndzi ni matimba hikwalaho ka loyi a ndzi nyikaka matimba.” (Vafilipiya 4:13) Xikwembu xi nyika vagandzeri va xona “matimba lama tlulaka lama tolovelekeke” leswaku va kota ku hlula miringo.—2 Vakorinto 4:7.

 “Rirhandzu.” Rirhandzu leri Mukreste a nga na rona eka Xikwembu ri n’wi pfuna leswaku a va ni xivindzi xo yimela leswi nga swinene. Hilaha ku fanaka, rirhandzu leri Mukreste a nga na rona eka vanhu van’wana ri n’wi hlohlotela ku rhangisa leswi vuyerisaka vona ku tlula leswi vuyerisaka yena, u endla tano hambiloko a kanetiwa kumbe a langutane ni khombo.—Yohane 13:34; 15:13.

 “Mianakanyo leyinene.” EBibeleni, mianakanyo leyinene hakanyingi swi vula ku va Mukreste a ri ni matimba yo teka swiboho swa vutlhari a ri karhi a kongomisiwa hi Bibele. Munhu loyi a nga ni mianakanyo leyinene wa swi kota ku ehleketa kahle ni ku vulavula hi ndlela leyi khorwisaka hambiloko a ri ehansi ka swiyimo swo tika. Wa swi kota ku endla swiboho leswi fambisanaka ni miehleketo ya Xikwembu naswona wa swi tiva leswaku vuxaka byakwe ni Xikwembu hi byona bya nkoka ku tlula mavonelo ya vanhu van’wana.

 Muapostola Pawulo u tsale buku ya Timotiya wa Vumbirhi tanihi papila leri yaka eka munghana wakwe Timotiya la rhandzekaka tlhelo mutirhikulobye eHosini. Eka papila leri, Pawulo u khutaze Timotiya loyi a a ha ri muntshwa leswaku a tirha hi matimba entirhweni wo chumayela. (2 Timotiya 1:1, 2) Swi nga endleka leswaku Timotiya a a ri ni tingana naswona sweswo a swi ta n’wi sivela ku endla hinkwaswo leswi nga ematimbeni yakwe leswaku a pfuna vandlha ra Vukreste. (1 Timotiya 4:12) Kambe Pawulo u tsundzuxe Timotiya leswaku u amukele nyiko, ku nga ntirho wo hlawuleka evandlheni. U tlhele a n’wi khutaza leswaku a nga chavi ku tirhisa vulawuri byakwe tanihi mulanguteri wa vandlha naswona a nga chavi loko a chumayela ni loko a tiyisela mahlomulo hikwalaho ka ripfumelo rakwe.—2 Timotiya 1:6-8.

 Hambileswi marito lawa a ma kongomisiwe eka Timotiya kambe ma tlhela ma tiyisa lava lavaka ku tirhela Xikwembu namuntlha leswaku Xi ta va pfuna va endla tano hambiloko va langutana ni mitlhontlho.