Timbhoni ta Yehovha ta le Turkey ti ve kona ku sukela hi 1931. Ti xanisiwe hi ndlela ya tihanyi ku ya eku heleni ka va-1980. Eka malembe lama landzeleke, hulumendhe yi tshike ku tiyisa voko kutani yi pfumelela Timbhoni leswaku ti gandzela kambe yi ala swikombelo swa tona swa leswaku ti tsarisiwa ximfumo. Xiyimo xi cince hi July 2007, loko tihuvo ta le Turkey ti teke xiboho xo yima ni Timbhoni ta Yehovha naswona ti tsarisiwe ximfumo. Namuntlha, Timbhoni ti kota ku hlengeletana leswaku ti gandzela ni ku tlhela ti endla ntirho wa tona hikwalaho ka leswi ti nga ni ntshunxeko.

Nilokoswiritano, hulumendhe ya le Turkey a yi yi tekeli enhlokweni mfanelo ya vanhu lava alaka ku ya enyimpini hileswi ripfalo ra vona ri nga va pfumeleriki. Ku ringana malembe yo tala, vanhu lava alaka ku ya enyimpini hileswi ripfalo ra vona ri nga va pfumeleriki, ku nga Timbhoni ta Yehovha va vitaniwe hi ku phindhaphindha leswaku va ya enyimpini, va tengisiwa, va hakerisiwa mali yo tala ni ku tlhela va khotsiwa. Ku sukela hi 2011, Huvo ya Matiko ya Yuropa ya Timfanelo ta Vanhu (ECHR) yi endle xiboho kanharhu yi ri karhi yi yima ni Timbhoni ta Yehovha naswona hi 2012 Nhlangano wa Matiko wa Komiti ya Timfanelo ta Vanhu wu yime ni mhaka leyi. Hambiswiritano, tiko ra Turkey ri hambeta ri tengisa vantshwa va Timbhoni lava alaka ntirho wa vusocha.

Hi 2003, tiko ra Turkey ri antswise nawu wa rona wo aka lowu pfumelelaka vanhu lava nga riki Mamoslem leswaku va aka ni ku tlhela va va ni tindhawu ta vona vini ta vugandzeri. Hambiswiritano, valawuri va le ka timasipala ni tihuvo ta le kaya va ale ku nyika mpfumelelo eka “tindhawu to gandzela,” ku nga Tiholo ta Mfumo ta Timbhoni ta Yehovha. Milandzu yimbirhi malunghana ni mhaka leyi yi yisiwe eka ECHR.