Ku sukela hi January 2018, xifunengeto xa Xiyimiso Xa Mahanyelo Ni Ntirho Wa Hina Wo Chumayela xi ve ni swiringanyeto swo sungula mabulo. Hi khutaziwe ku burisana ni vanhu ematshan’wini yo phakela mikandziyiso. Leswaku ku pfuniwa vahuweleri ku antswisa swingheniso swa vona, ku endliwe tivhidiyo leti kombisaka ndlela yo sungula mabulo hi ku tirhisa Bibele ntsena. Xana leswi swi vula leswaku a hi fanelanga hi tirhisa mikandziyiso loko hi chumayela ensin’wini? A swi tano! Hi xikombiso, swiphephana swi nga hi pfuna leswaku hi sungula mabulo. Hi nga tirhisa endlelo leri landzelaka loko hi fambisa swiphephana:

1. Vutisa xivutiso lexi nga eku sunguleni ka xiphephana.

2. N’wi kombe nhlamulo leyi humaka eBibeleni leyi nga eka tluka ra vumbirhi. Loko nkarhi wu mi pfumelela mi nga tlhela mi bula hi rungula ro karhi leri nga endzeni ka xiphephana.

3. Nyika n’wini wa muti xiphephana, u tlhela u n’wi khutaza leswaku a ti hlayela xona loko a kuma nkarhi.

4. U nga se famba, n’wi kombe “Xivutiso Xo Anakanyisisa Ha Xona” kutani u hlela ku tlhela u vuya leswaku u ta xi hlamula hi ku tirhisa Bibele.

Loko u tlhelela, hlamula xivutiso xa yena naswona u tlhela u siya xivutiso lexi mi nga ta bula ha xona nkarhi lowu taka. U nga tirhisa xivutiso lexi kumekaka eka website kumbe eka buku leyi kombisiweke eka tluka ro hetela. Loko swi fanerile, n’wi kombe broxara ya Mahungu Lamanene Lama Humaka Eka Xikwembu! kumbe nkandziyiso lowu kumekaka eka Switirhisiwa Swo Pfuneta Ku Dyondzisa