Xana u yi hlaye hi vukheta minkandziyiso ya sweswinyana ya Xihondzo xo Rindza? A hi vone loko u ta swi kota ku hlamula swivutiso leswi landzelaka:

Hi xihi xidyoho lexi Yesu a vulavula ha xona lexi hlamuseriwe eka Matewu 18:15-17?

A vulavula hi xidyoho lexi nga lulamisiwaka hi vanhu lava katsekaka. Kambe loko xidyoho xa kona xi ri xikulu lerova loko xi nga lulamisiwi xi nga endla leswaku munhu a susiwa evandlheni. Hi xikombiso, xidyoho xa kona xi nga ha katsa ku lumbeta kumbe vukanganyisi.—w16.05, tl. 7.

U nga endla yini leswaku u vuyeriwa loko u hlaya Bibele?

U nga ha endla leswi landzelaka: Yi hlaye hi xikongomelo xo lava ku dyondza swo karhi, lavisisa leswi u nga swi tirhisaka naswona tivutise swivutiso leswi: ‘Ndzi nga swi tirhisa njhani leswi ndzi swi dyondzeke leswaku ndzi pfuna van’wana?’ Nakambe endla ndzavisiso hi rungula leri wa ha ku ri hlayaka.—w16.05, matl. 28-31.

Xana swi hoxile ku va Mukreste a rila loko a feriwile hambileswi a swi tivaka leswaku ku ta va ni ku pfuxiwa ka vafi?

Ku va Mukreste a ri ni ntshembo wa leswaku vafi va ta pfuxiwa a swi vuli swona leswaku a nga ku twi ku vava loko a feriwe hi munhu loyi a n’wi rhandzaka. Abrahama u tlhave mukhosi loko nsati wakwe Sara a file. (Gen. 23:2) Hi ku famba ka nkarhi ku vava loku munhu a ku twaka ku nga ha hunguteka.—wp16.3, tl. 4.

Hi ku ya hi Ezekiyele ndzima 9, wanuna loyi a ri ni rimhondzo ra matsalana ro chela inki ni vavanuna va tsevu lava khomeke matlhari yo pfotlosa va yimela yini?

Va yimela mavuthu ya le tilweni lama katsekeke loko ku lovisiwa Yerusalema ni lama nga ta katseka loko ku herisiwa misava leyi yo homboloka ya Sathana hi nkarhi wa Armagedoni. Kambe enkarhini wa sweswi, wanuna loyi a nga ni rimhondzo ra matsalana ro chela inki u yimela Yesu Kreste, loyi a nga ta fungha lava nga ta pona.—w16.06, matl. 31-32.

Hi swihi swiyimo leswi Bibele yi poneke eka swona?

Yi pone (1) ku va rungula ra yona ri lahleka tanihi leswi a yi koperiwa emadzoveni lama bolaka, (2) nkaneto wa va n’watipolotiki ni varhangeri va vukhongeri lava a va lava ku yi herisa; ni ku (3) ku cinciwa ka rungula ra yona.—wp16.4, matl. 4-7.

Vakreste va nga olovisa vutomi bya vona hi tindlela tihi?

Kambisisa leswi bohaka leswaku u swi xava kutani u tshika swilo leswi nga bohiki leswaku u va na swona. Endla xiboho xa leswi u faneleke u swi xava ni leswaku u ta tirhisa mali muni. Xavisa, lahla kumbe u nyika van’wana swilo leswi u nga ha swi tirhisiki naswona u nga furheki swikweleti. Anakanya hi ndlela leyi u nga hetaka nkarhi lowutsongo u ri entirhweni wa ku tihanyisa ni ku hlela ndlela leyi u nga hetaka nkarhi wo tala entirhweni wa nsimu ha yona.—w16.07, tl. 8.

I yini lexi Yehovha a xi tekaka xi ri xa risima ku tlula nsuku kumbe silivhere?

Yobo 28:12, 15 yi kombisa leswaku vutlhari lebyi humaka eka Xikwembu i nchumu wo antswa ku tlula nsuku na silivhere. Loko u ri karhi u byi lavisisa, tikarhatele ku tshama u ri karhi u titsongahata ni ku va ni ripfumelo leri tiyeke.—w16.08, matl. 18-19.

Xana swi fanerile leswaku makwerhu a fuwa malebvu?

Eka mindhavuko yin’wana, malebvu lama tsemetiweke kahle ma amukeleka ni ku xiximeka naswona a ma nge va khunguvanyisi vanhu ensin’wini. Nilokoswiritano, van’wana va nga ha hlawula ku ka va nga ma fuwi. (1 Kor. 8:9) Eka mindhavuko yin’wana kumbe etindhawini tin’wana, a swi tolovelekanga ku va Mukreste a fuwa malebvu naswona swi tekiwa swi nga amukeleki.—w16.09, tl. 21.

Ha yini hi fanele hi tshemba leswaku nyimpi ya Davhida na Goliyadi leyi tsariweke eBibeleni yi ve kona hakunene?

Goliyadi a a lehe ku tlula ni munhu wo leha swinene emisaveni hinkwayo namuntlha. Davhida a a ri munhu wa xiviri, hi ku ya hi vumbhoni lebyi yimburiweke lebyi vulavulaka hi yindlu ya Davhida. Yesu Kreste na yena u vulavule hi Davhida tanihi munhu wa xiviri. Vuxokoxoko bya tindhawu leti rhekhodiweke bya fana ni leswi sweswi hi swi tivaka hi tindhawu teto namuntlha.—wp16.5, tl. 13.

Xana vutivi, ku twisisa ni vutlhari swi hambana njhani?

Munhu loyi a nga ni vutivi hi loyi a ngheniseke rungula ro karhi emianakanyweni yakwe. Munhu la nga ni ku twisisa u kota ku vona ndlela leyi timhaka ti fambisanaka ha yona. Kambe munhu la nga ni vutlhari u kota ku hlanganisa vutlhari ni ku twisisa kutani a swi tirhisa hi ndlela leyinene.—w16.10, tl. 18.