Ndzi velekeriwe eximutanini xa le Saxony laha khale a ku ri German Democratic Republic (GDR). Xiyimo xa le kaya a xi tsakisa swinene, naswona vatswari va mina va ndzi dyondzise mahanyelo lamanene. Tiko ra GDR a ri fumiwa hi Vukhomunisi naswona eka vanhu vo tala va kwalaho a va teka vukhongeri byi nga ri bya nkoka. Naswona mina a ndzi nga pfumeli leswaku Xikwembu xi kona. Eka malembe ya mina yo sungula ya 18, vutomi bya mina a byi dzike swinene eka tidyondzo timbirhi, ku nga dyondzo ya leswaku Xikwembu a xi kona ni ya Vukhomunisi.

Ha yini Vukhomunisi a byi ndzi tsakisa? Hikuva a ndzi tsakela mhaka ya leswaku vanhu hinkwavo va ringana. Ku engetela kwalaho, a ndzi tshemba leswaku nhundzu a yi fanele yi hangalasiwa hi ku ringana, tanihi leswi sweswo a swi ta herisa vusweti ni leswaku vanhu va fuma hi ndlela leyi hundzeletiweke. Kutani ndzi sungule ku gingiriteka ngopfu eka nhlangano wa vantshwa wa Vukhomunisi. Loko ndzi ri ni malembe ya 14, ndzi hete nkarhi wo tala ndzi ri karhi ndzi tirha ku basisa mbango eka tsima ro endla maphepha ya malakatsa leswaku ma tlhela ma tirhisiwa nakambe. Varhangeri va doroba ra kwalaho ra Aue, va wu tsakele swinene ntirho wa mina lerova va ndzi nyike sagwadi. Hambileswi a ndza ha ri ntsongo ndzi kote ku hlangana ni van’watipolitiki lavakulu va le GDR. A ndzi vona onge ndzi fikelela tipakani letinene naswona vumundzuku bya mina a byi ta va lebyinene.

Hiloko vutomi bya mina byi cinca hi xihatla. Hi lembe ra 1989, Rirhangu ra Berlin ri hirimuxiwile naswona Vukhomunisi bya le Yuropa Vuxa byi herisiwile. Swihlamariso swi te hi ku landzelelana. Hakatsongotsongo ndzi sungule ku swi xiya leswaku tiko ra GDR a ri nga fambisiwi hi vululami. Hi xikombiso, vanhu lava a va nga byi seketeli Vukhomunisi a va nga tekeriwi enhlokweni. Leswi a swi koteka njhani? Xana hina Makhomunisi a hi nga pfumeli leswaku vanhu hinkwavo va ringana? Xana Vukhomunisi bya pfuna? Ndzi sungule ku vilela.

Ndzi cince leswi a ndzi swi rhangisa evuton’wini bya mina ivi ndzi sungula ku landzelela swa vuyimbeleri ni ku dirowa. Tanihi leswi a ndzi dyondza eka xikolo xa vuyimbeleri, na hileswi a swi ta koteka leswaku ndzi rhurhela eyunivhesiti, ndzi sungule ku tsakela ku dyondzela ntirho wo va xiyimbeleri. Ku engetela kwalaho, ndzi tshike mahanyelo lamanene lama ndzi ma dyondzeke ndza ha ri ntsongo. Leswi a swi ri swa nkoka eka mina enkarhini wolowo, a ku ri ku titsakisa, naswona  sweswo a swi katsa ku rhandzana ni vanhwanyana vo tala hi nkarhi wun’we. Kambe vuyimbeleri, ku dirowa ni ku hanya vutomi byo tilawula a swi endlanga leswaku ndzi tshika ku vilela. Hambi ku ri swifaniso leswi ndzi swi pendeke, a swi kombisa ku chava lokukulu. Xana vumundzuku a byi ndzi khomele yini? Naswona a ku ri xihi xikongomelo xa vutomi bya mina?

Eku heteleleni, loko ndzi kume tinhlamulo ta swivutiso leswi a ndzi ri na swona, ti ndzi hlamarisile swinene. Vusiku byin’wana exikolweni, ndzi tshame ni ntlawa wa swichudeni naswona a hi bula hi vumundzuku. Mandy * a ri xichudeni tlhelo Mbhoni ya Yehovha. Eka madyambu wolawo, u ndzi nyike nkongomiso lowunene. U te: “Andreas, loko u lava tinhlamulo ta swivutiso swa wena hi vutomi ni hi vumundzuku, hlaya Bibele.”

A ndzi nga tshembi hi ku helela leswaku ndzi nga ti kuma tinhlamulo eBibeleni, kambe ndzi yi kambisisile. Mandy u ndzi khutaze ku hlaya Daniyele ndzima 2 naswona leswi ndzi swi hlayeke swi ndzi hlamarise ngopfu. Vuprofeta lebyi byi hlamusele ntlhandlamano wa mifumo ya misava, ku nga mifumo leyi a yi ta hi khumba swinene ku ta fikela ninamuntlha. Mandy u ndzi kombe ni vuprofeta byin’wana bya le Bibeleni lebyi a byi vulavula hi vumundzuku. Eku heteleleni ndzi ti kumile tinhlamulo ta swivutiso swa mina! Kambe i mani loyi a tsaleke vuprofeta byebyo, naswona i mani loyi a nga vhumbhaka vumundzuku hi ku hetiseka? Xana ku nga va ku ri leswaku Xikwembu xi kona hakunene?

Mandy u ndzi hlanganise na Horst na Angelika, vatekani lava nga Timbhoni lava ndzi pfuneke ku twisisa Rito ra Xikwembu ku antswa. Hi xihatla ndzi xiye leswaku vukhongeri bya Timbhoni ta Yehovha hi byona byi ri byoxe lebyi tirhisaka vito ra Xikwembu, ku nga Yehovha. (Pisalema 83:18; Matewu 6:9) Ndzi dyondze leswaku Yehovha u tshembisa vanhu vutomi lebyi nga heriki emisaveni leyi nga paradeyisi. Pisalema 37:9 yi ri: “Lava tshembaka Yehovha hi vona lava nga ta dya ndzhaka ya misava.” Eka mina leswi a swi ti komba onge ntshembo lowu wu pfulekele munhu un’wana un’wana loyi a tikarhatelaka ku hanya hi milawu ya Xikwembu ya mahanyelo leyi hlamuseriweke eBibeleni.

Hambiswiritano, ku cinca vumunhu bya mina bya khale ndzi hanya hi milawu ya Bibele a swi nga olovi. Tanihi leswi a ndzi tikukumuxa hi ku va muyimbeleri loyi a humeleleke, a ndzi fanele ndzi dyondza ku titsongahata. Ku tlula kwalaho, a swi nga olovi ku tshika vutomi bya mina byo biha. Ndza tsaka swinene leswi Yehovha a va lehiselaka mbilu, a va kombisaka tintswalo ni ku va twisisa lava ringetaka ku endla leswi Bibele yi swi dyondzisaka!

Eka malembe ya mina yo sungula ya 18, vutomi bya mina a byi lawuriwa hi dyondzo ya Vukhomunisi ni ku nga pfumeli leswaku Xikwembu xi kona, kambe sweswi Bibele yi cince vutomi bya mina. Leswi ndzi swi dyondzeke swi hungute ku vilela ka mina hi vumundzuku kutani swi endla leswaku ndzi va ni xikongomelo evuton’wini. Hi 1993, ndzi khuvuriwile ndzi va Mbhoni ya Yehovha naswona hi 2000 ndzi tekane na Tabitha, mugandzerikulobye loyi a hisekaka. Hi heta nkarhi wo tala hi ri karhi hi pfuna ku dyondza Bibele. Vo tala lava hi hlanganaka na vona va ni matimu yo fana ni ya mina, yo kulela eka dyondzo ya Vukhomunisi ni ya ku nga pfumeli leswaku Xikwembu xi kona. Ndzi titwa ndzi enerisekile loko ndzi va kombisa ndlela leyi va nga tivaka Yehovha ha yona.

Loko ndza ha ku sungula ku tihlanganisa ni Timbhoni ta Yehovha, vatswari va mina a va nga tsakanga. Hambiswiritano, va swi vonile leswaku ku tihlanganisa ka mina ni Timbhoni swi cince vutomi bya mina byi va lebyinene. Ndza tsaka hileswi namuntlha va hlayaka Bibele va tlhela va hlanganyela ni Timbhoni ta Yehovha.

Mina na Tabitha hi tsakile evukatini bya hina hikuva hi ringeta hi matimba ku tirhisa xitsundzuxo xa le Bibeleni lexi vulavulaka hi ta vatekani. Hi xikombiso, ku yingisa xitsundzuxo xa le Bibeleni xa mayelana ni ku tshembeka evukatini, swi tiyisa vukati bya hina.—Vaheveru 13:4.

A ndza ha chavi nchumu evuton’wini naswona a ndza ha vileli hi vumundzuku. Ndza tsaka hileswi ndzi nga un’wana wa vamakwerhu lava nga kona emisaveni hinkwayo lava tiphinaka hi ku rhula ni vun’we. Eka ndyangu lowu wa vamakwerhu hi khomana hi ndlela leyi fanaka. Leswi hileswi a ndzi swi lava ku sukela khale.