“Xin’wana ni xin’wana lexi mi nga ta xi kombela eka Tatana hi vito ra mina, u ta mi nyika xona.”—Yohane 16:23.

Marito ya Yesu ma swi veka erivaleni leswaku Yehovha u lava hi khongela eka yena hi ku tirhisa vito ra Yesu ku nga ri hi ku tirhisa swifaniso, vakwetsimi, tintsumi kumbe va le hansi. Loko hi khongela eka Xikwembu hi vito ra Yesu, hi kombisa leswaku ha swi twisisa leswaku Xikwembu xi kota ku hi twa hikwalaho ka leswi Yesu a hi endleleke swona. Yesu u te: “A nga kona loyi a nga yaka eka Tatana handle ko ya hi mina.”—Yohane 14:6.

“Xi chululeleni timbilu ta n’wina.”—Pisalema 62:8.

Loko hi khongela eka Yehovha, hi fanele hi vulavula na yena ku fana na loko hi vulavula na tatana la nga ni rirhandzu. Ematshan’weni yo hlaya xikhongelo xa hina ebukwini kumbe hi xi krema kunene, hi fanele hi vulavula na yena hi xichavo lexikulu, hi phofula ta le mbilwini.

“Xikwembu xa hi twa loko hi kombela xin’wana ni xin’wana lexi fambisanaka ni ku rhandza ka xona.”—1 Yohane 5:14.

Yehovha Xikwembu u tirhisa Bibele ku hi byela leswi a nga ta hi endlela swona ni leswi a lavaka hi n’wi endlela swona. Leswaku Xikwembu xi yingisa swikhongelo swa hina hi fanele hi khongelela leswi “fambisanaka ni ku rhandza ka xona.” Leswaku hi kota ku endla tano, hi fanele hi dyondza Bibele leswaku hi ta kota ku xi tiva kahle. Loko hi endla tano, xi ta amukela swikhongelo swa hina.

Khongelela Ku Kuma Swilaveko Swa Nkoka. Hi nga khongela eka Xikwembu leswaku xi hi nyika swilaveko swa nkoka, ku nga ha va swakudya, mpahla ni ndhawu yo tshama. Hi nga khongelela ku va ni vutlhari leswaku hi kota ku endla swiboho leswinene ni matimba yo kota ku tiyisela miringo. Hi nga tlhela hi khongelela ku va ni ripfumelo leri tiyeke, hi kombela ku rivaleriwa swidyoho swa hina ni ku kombela leswaku Xikwembu xi hi pfuna.—Luka 11:3, 4, 13; Yakobo 1:5, 17.

Khongelela Van’wana. Vatswari lava rhandzaka vana va vona va tsaka loko vana va vona va rhandzana. Yehovha na yena u lava leswaku vana va yena va laha misaveni va rhandzana. I swa nkoka ku khongelela nuna kumbe nsati wa wena, ndyangu wa ka n’wina, vana va wena ni vanghana va wena. Yakobo u tsale a ku, “mi khongelelana.”—Yakobo 5:16.

Khensa Xikwembu. Bibele yi vula leswi hi Muvumbi wa hina: “Xi endle leswinene, xi mi nisela timpfula ni ku mi nyika tinguva ta ndzalo, xi mi phamela mi xurha ni ku tsakisa timbilu ta n’wina.” (Mitirho 14:17) Loko hi ehleketa hi swilo hinkwaswo leswi Xikwembu xi hi endleke swona, swi ta endla leswaku hi xi khensa loko hi khongela. Ndlela leyi hi hanyaka ha yona yi fanele yi kombisa leswaku ha xi khensa.—Vakolosa 3:15.

Mikarhi yin’wana loko hi tiphofula eka Xikwembu ivi xi nga hatli xi hi hlamula, hi nga hela matimba. Xana hi fanele hi vona onge Xikwembu a xi na mhaka na hina? Nikatsongo. Xiya leswi vanhu lava landzelaka va swi vulaka leswi kombisaka leswaku mikarhi yin’wana swo lava hi nga tshiki ku khongela.

Steve, loyi ku vulavuriweke ha yena eka nhlokomhaka yo sungula u ri: “Loko a ku nga ri mhaka ya xikhongelo, a ndzi ta va ndzi lahle thawula khale swinene evuton’wini.” I yini lexi endleke a tshika ku titwa hi ndlela yoleyo? U sungule ku kambisisa Bibele ivi a dyondza leswaku u fanele a ya emahlweni a khongela. Steve, u ri: “Ndzi khongele eka Xikwembu ndzi xi khensa leswi ndzi nga na vanghana lava ndzi seketelaka. Sweswi ndzi tsake ku tlula eku sunguleni.”

Ku vuriwa yini hi Jenny, loyi a a ehleketa leswaku a swi n’wi faneli ku va Xikwembu xi n’wi yingisela? U ri: “Loko ndzi titwa ndzi nga pfuni nchumu, ndzi kombele Xikwembu leswaku xi ndzi pfuna ndzi twisisa leswaku hikwalaho ka yini ndzi titwa ndzi nga pfuni nchumu.” Xana swi n’wi pfunile? U ri: “Ku vulavula ni Xikwembu swi ndzi pfunile leswaku ndzi tivona hilaha Xikwembu xi ndzi vonaka hakona, ndza swi vona leswaku hambiloko mbilu ya mina yi ndzi byela leswaku ndzo va xikangalafula, kambe eka Xikwembu ndzi wa nkoka. Swi tlhele swi ndzi pfuna leswaku ndzi nga lahli thawula kambe ndzi ya emahlweni ndzi zama.” Ku ve na vuyelo byihi? U ri: “Xikhongelo xi ndzi pfune ku vona Yehovha tanihi Xikwembu, Tatana ni Munghana la khathalaka, la nga ta ndzi pfuna loko ndzi ri karhi ndzi ya emahlweni ndzi endla leswi a swi lavaka.”

Nakambe ehleketa hi leswi humeleleke Isabel. Loko a ha ri muyimani, dokodela wakwe u n’wi byele leswaku n’wana wakwe u ta velekiwa a ri ni vulema lebyikulu. Mhaka leyi yi n’wi tseme nhlana. Van’wana va n’wi byele leswaku a susa khwiri. U ri: “A ndzi twa onge va ndzi rhwexe ntshava lerova a ndzi vona swi antswa ku funya buwa.” U endle yini? U ri: “Ndzi khongele eka Xikwembu leswaku xi ndzi pfuna.” U hetelele a veleke n’wana wa jaha loyi a lamaleke loyi a n’wi thyeke vito ra Gerard. Xana Xikwembu xi swi hlamurile swikhongelo swakwe? Ina. Swi hlamuriwe njhani? Isabel u ri: “Loko ndzi vona jaha ra mina leri sweswi ri nga ni malembe ya 14 ri tiphina hi vutomi hambileswi ri lamaleke, ndza swi vona leswaku ri ve nhlamulo leyinene ya swikhongelo swa mina, i nyiko leyikulu leyi humaka eka Yehovha Xikwembu.”

Marito lama ya Isabel ma endla hi ehleketa hi marito ya mupisalema loyi a nga te: “U ta twa xikombelo xa lavo rhula, wena Yehovha. U ta tiyisa timbilu ta vona u tlhela u va yingisela.” (Pisalema 10:17) Hakunene leswi i swivangelo leswinene leswi hi nga na swona swo hambeta hi khongela!

EBibeleni ku tsariwe swikhongelo swo tala swa Yesu. Xin’wana xa swikhongelo swakwe leswi dumeke hi lexi a xi dyondziseke valandzeri vakwe. Hi nga dyondza yini eka xona?